ዛረዋ 5

ላኤን ሙሴ ሃሳያ

(5:1—26:19)

ታሙ አዛዞቱዋ

(ከሳ 20:1-17)

1ሙሴ እስራኤልያ አሳ ኡባ እትፐ ጼሲደ፥ ሀዋዳን ያጌዳ፤ “ህንተኖ እስራኤልያ አሳዉ፥ ታን ሀች ህንተንቶ ኦድያ አዋዩዋነ ህግያ ስስተ፤ ህንተ ኡንቱንታ ታማርተነ ምንሲደ ኦተ። 2መና ጎዳይ ኑ ጾሳይ ሲና ደርያ ቦላን ኑናና ጫቁዋ ጫቀቴዳ። 3መና ጎዳይ ሀ ጫቁዋ ጫቀቴዳዌ ኑ አዎቱዋ ጻላላና ግደና፤ ሀች ደኡዋን ደእያ ኑ ኡባናካ ጫቀቴዳ። 4ሄ ደርያ ቦላን ኤጽያ ታማ ግዶን ግዲደ፥ መና ጎዳይ ህንተ ስንን ኤቂደ ህንተናና ሃሳዬዳ። 5ታንካ ሄ ዎደ መና ጎዳይ ግያዋ ህንተንቶ ኦዳናዉ፥ ጾሳፐነ ህንተፐ ግዱዋን ኤቃድ፤ አያዉ ጎፐ፥ ህንተ ታማዉ ያዪደ፥ ደርያ ፑደ ከስበይክታ። ጾሳይካ ሀዋዳን ያጌዳ፤

6“ግብጼ ጋድያፐ አይለተ ጎልያፐ ኔና ዎዜዳዌ ታን መና ጎዳ ነ ጾሳ።

7“ታፐ አትና፥ ሀራ ጾሳቱ ነዉ ደኦፕኖ።

8“ቦላ ሳሉዋን ደእያዋ ግድና፥ ዎይ ጋርሳ ሳኣን ደእያዋ ግድና፥ ዎይ ሳኣፐ ጋርሳና ደእያ ሃ ግዶን ደእያዋ ግድናካ፥ አያ ምስልያነ ነዉ ኤቃ ኦፓ።#ዎጋ 26:1፤ ዛረ. 4:15-18፤ 27:15 9ኔን ኡንቱንቶ ሆኮፓ፤ ዎይ ኡንቱንቶ ጎይኖፓ፤ አያዉ ጎፐ፥ ታን ታና እጽያዋንታ አዎቱዋ ናጋራ ድራዉ፥ ናናቱዋ ሄዘንነ ኦይደን የለታ ጋካናዉ ሙርያዋ፤ ታን፥ መና ጎዳይ ነ ጾሳይ ቃናትያ ጾሳ።#ከሳ 34:6-7፤ ፓይ. 14:18፤ ዛረ. 7:9-10 10ሽን ታን ታና ሲቅያዋንታነ ታ አዛዙዋ ናግያዋንታ ሻአ የለታ ጋካናዉ ታ አገና ሲቁዋ በሳይ።

11“መና ጎዳ ነ ጾሳ ሱን ጮ ጼሶፓ፤ አያዉ ጎፐ፥ መና ጎዳይ ባረ ሱን ጮ ጼስያዋ ሙረናን አገና።#ሳፃ 19:12

12“መና ጎዳይ ነ ጾሳይ ኔና አዛዜዳዋዳን፥ ጌሻ ኦደ ሳምባታ ጋላሳ ናጋ።#ከሳ 16:23-30፤ 31:12-14 13ኔን ኦያ ኦሶ ኡባ ኡሱፑን ጋላሳን ኦ።#ከሳ 23:12፤ 31:15፤ 34:21፤ 35:2፤ ዎጋ 23:3 14ሽን ላፑን ጋላሳይ መና ጎዳዉ፥ ነ ጾሳዉ ሳምባታ። ሄ ጋላስ አይ ኦሶነ ኦፓ፤ ኔን ዎይ ነ አቱማ ናአይ፥ ዎይ ነ ማጫ ናታ፥ ዎይ ነ ቆማይ፥ ዎይ ነ ቦራይ፥ ዎይ ነ ሀሪ፥ ዎይ ነ ሀራ መሄቱ፥ ዎይ ነ ካታማን ደእያ በቲ፥ ሄ ጋላስ አያ ኦሶነ ኦፕተ። ኔን ሸምፕያዋዳን ነ አቱማነ ማጫ ቆማቱካ ሸምፕኖ። 15ኔን ግብጼ ጋድያን አይልያ ግዳደ ደኤዳዋ ዶጎፓ፤ ቃይ መና ጎዳይ ነ ጾሳይ ባረ ዎልቃማ ኩሽያንነ ባረ ምጨቴዳ ቀስያን ያፐ ኔና ከሴዳዋ ዶጎፓ። መና ጎዳይ ነ ጾሳይ ሳምባታ ጋላሳ ኔን ናጋናዳን፥ ኔና አዛዜዳዌካ ሄዋ ግሻሳ።

16“መና ጎዳይ ነ ጾሳይ ነዉ እምያ ጋድያን ነ ኔረካ አዱቃና ማላነ ነዉ ሎአና ማላ፥ መና ጎዳይ ነ ጾሳይ ኔና አዛዜዳዋዳን፥ ነ አዉዋነ ነ ዳዮ ቦንቻ።#ዛረ. 27:16፤ ማቶሳ 15:4፤ 19:19፤ ማር. 7:10፤ 10:19፤ ሉቃሳ 18:20፤ ኤፈ. 6:2-3

17“አሳ ዎፓ።#ዶመ 9:6፤ ዎጋ 24:17፤ ማቶሳ 5:21፤ 19:18፤ ማር. 10:19፤ ሉቃሳ 18:20፤ ሮመ 13:9፤ ያቆባ 2:11

18“ሻርሙጾፓ።#ዎጋ 20:10፤ ማቶሳ 5:27፤ 19:18፤ ማር. 10:19፤ ሉቃሳ 18:20፤ ሮመ 13:9፤ ያቆባ 2:11

19“ዉኦፓ።#ዎጋ 19:11፤ ማቶሳ 19:18፤ ማር. 10:19፤ ሉቃሳ 18:20፤ ሮመ 13:9

20“ነ ሾሩዋ ቦላን ዎርዱዋ ማርካቶፓ።#ከሳ 23:1፤ ማቶሳ 19:18፤ ማር. 10:19፤ ሉቃሳ 18:20

21“ነ ሾሩዋ ማቻቶ አሞቶፓ፤ አ ጎልያ፥ አ ሾይቃ፥ አ አቱማ ቆማ፥ ዎይ አ ማጫ ቆማቶ፥ ዎይ አ ቦራ፥ ዎይ አ ሀርያ፥ ዎይ አዉ ደእያዋ አያነ አሞቶፓ ያጌዳ።#ሮመ 7:7፤ 13:9

22“ደርያ ቦላን ታማ ግዶፐ፥ ሻርያ ግዶፐነ ጎርዴዳ ማ ግዶፐ መና ጎዳይ ቁ ጌዳ ኮሻን ሺቁዋ ኡባዉ ኦዴዳ ቃላቱ ሀዋንታ፤ እ ኡንቱንቱ ቦላን አያነ ጉጅቤና። ቃይ ኡንቱንታ እ ላኡ ማሰቴዳ ሹቻቱ ቦላ ጻፊደ፥ ታዉ እሜዳ።#እብራ. 12:18-19

አሳ ያሻ

(ከሳ 20:18-21)

23“ደሪ ታማን ጹገትሽን፥ ማ ግዶፐ ኮሻ ህንተ ስሴዳ ዎደ፥ ህንተ ዛርያ ካፓቱነ ህንተ ጭማቱ ታኮ ዪደ፥ 24ሀዋዳን ያጌድታ፤ ‘በአ፥ ኑን መና ጎዳ ኑ ጾሳ ኮሻ ታማ ግዶፐ ስሴዳ ዎደ፥ መና ጎዳይ ኑ ጾሳይ ባረ ቦንቹዋነ ባረ አንጋ ኑና በሴዳ። ቃይ ኑን ጾሳይ አናና ሃሳዪደ አሳይ ደኡዋን ደአናዉ ዳንዳይያዋ ሀቼ በኤዶ። 25ሽን ሀ ዎልቃማ ታማይ ኑና ይሳናዉ ዳንዳዬ፤ ያትና፥ ኑን አያዉ ሀይቄቶ? መና ጎዳ ኑ ጾሳ ቃላ ኑን ላኤን ስሶፐ፥ ኑን ሀይቄቶ። 26አያዉ ጎፐ፥ አሹዋ ማዬዳዋን፥ ኑን ስሴዳዋዳን ታማ ግዶን ግዲደ ሃሳይሽን፥ ደኦ ጾሳ ቃላ ስሲደ፥ ፓጻ ደኤዳ አሳይ ኦኔ? 27ሄዋ ድራዉ፥ ሙሴ! ኔን ሺቃደ፥ መና ጎዳይ ኑ ጾሳይ ግያዋ ኡባ ስሳ፤ መና ጎዳይ ኑ ጾሳይ ነዉ ኦድያዋ ኡባ ኔን ኑዉ ኦዳ፤ ኑንካ ስሲደ ኦና’ ያጌድታ።

28“ህንተ ታዉ ሃሳይሽን፥ መና ጎዳይ ህንተ ግያዋ ስሲደ፥ መና ጎዳይ ታና ሀዋዳን ያጌዳ፤ ‘ሀ አሳይ ነዉ ኦዴዳዋ ኡባ ስሳድ፤ ኡንቱንቱ ጌዳዋ ኡባ ልከ ጌድኖ። 29ኡንቱንቱዉነ ኡንቱንቱ ናናዉ መናዉ ኡባባይ ሎአ ግዳናዳን፥ ታዉ ያያናዉነ ታ አዛዞቱዋ ናጋናዉ ኡንቱንቶ ኡባቶካ ሀዋ ማላ ዎዛናይ ደእ ኤረኔሻ! 30ሀእ ኔን ባደ፥ ኡንቱንቱ ባረንቱ ዱንካንያዉ ስማናዳን ኦዳ። 31ሽን ኔን ሀዋን ታ ማታን ኤቃሻ፤ ኡንቱንቱ ላታናዳን ታን ኡንቱንቶ እምያ ጋድያን ኡንቱንቱ ኦና ማላ፥ ኔን ኡንቱንታ ታማርሳና ታ አዛዙዋ፥ ታ አዋዩዋነ ታ ህግያ ኡባ ታን ነዉ ኦዳና’ ያጌዳ።

32“ህንተኖ እስራኤልያ አሳዉ፥ ሄዋ ግዶፐ መና ጎዳይ ህንተ ጾሳይ ህንተና አዛዜዳዋ ኡባ ኦናዉ ናገትተ፤ አፐ ኡሸቻ ዎይ ሀድርሳ ጎፕተ። 33ህንተ ደኡዋን ደአና ማላ፥ ኡባባይ ህንተንቶ እንጀታና ማላ፥ ቃይ ህንተ ላትያ ቢታንካ ህንተ አዱቂደ ደአና ማላ፥ መና ጎዳይ ህንተ ጾሳይ ህንተና አዛዜዳ ኦገ ኡባን ሄመትተ።

Currently Selected:

ዛረዋ 5: DFBE

Highlight

Copy

Compare