ዛረዋ 4

ሙሴ እስራኤላቱዋ አዛዘታናዳን ኦዴዳ

1ሄዋፐ ጉይያን፥ ሙሴ አሳ ሀዋዳን ያጌዳ፤ “ሀእካ እስራኤልያ አሳዉ፥ ህንተ ደኡዋን ደአናዳንነ መና ጎዳይ፥ ህንተ ማይዛ አዎቱዋ ጾሳይ፥ ህንተንቶ እምያ ቢታ ህንተ ላታናዳን፥ ታን ህንተና ታማርስያ አዋዩዋነ ህግያ ስስተነ ኦተ። 2ታን ህንተና አዛዝያ መና ጎዳ ህንተ ጾሳ አዛዙዋ ናግተፐ አትና፥ አ ቦላ አይነ ጉጆፕተ፤ ቃይ አፐ አይነ ፓጭሶፕተ።#ሳፃ 22:18-19 3ባኣል-ፓኦራ ደርያ ቦላን መና ጎዳይ ኦዳዋ ህንተ ህንተ አይፍያን በኤድታ፤ መና ጎዳይ ህንተ ጾሳይ ባኣል-ፓኦራን ደእያ ባኣላዉ ጎይኔዳዋንታ ኡባ ህንተ ግዶፐ ይሴዳ።#ፓይ. 25:1-9 4ሽን ህንተ መና ጎዳዉ፥ ህንተ ጾሳዉ፥ አማነቴዳ ድራዉ፥ ሀች ጋካናዉ ኡባይካ ደኡዋን ደኢታ።

5“በእተ፥ ህንተ ላታናዉ ገልያ ጋድያን ኦና ማላ፥ መና ጎዳይ፥ ታ ጾሳይ ታና አዛዜዳዋዳን፥ አዋዩዋነ ህግያ ታን ህንተና ታማርሳድ። 6ህንተ ኡንቱንታ ናግተነ ኦተ፤ ሄዋ ህንተ ኦፐ፥ ህንተ አይ ኬሻ አዳ ኤራንቼንቶነ ሀራ አሳይ ህንተና በአና። ኡንቱንቱ ሀ አዋዩዋባ ስስያ ዎደ፥ ‘ቱሙካ ሀ ዎልቃማ ካተተይ አዳ ኤራንቻነ አኬካንቻ ካዉተ’ ያጋና።

7“ኑን አ ጼስያ ዎደ አዉደነ፥ መና ጎዳይ ኑ ጾሳይ ኑዉ ማታ ግድያዋዳን፥ ማታ ጾስ አዉ ደእያ አይ ዎልቃማ ካዉተይ ደኢ? 8ታን ሀች ህንተ ስንን ዎያ ሀ ህገ ኡባዳን ጽሎ ግዴዳ አዋዩነ ህጊ ደእያ ሀራ አይ ዎልቃማ ካዉተይ ደኢ?

9“ስም ህንተ ደእያ ላይ ኡባን ሀ ህንተ በኤዳዋ ኡባ ዶገናዳንነ ህንተ ሁጲያፐ ይሰናዳን ናገትተ፤ ህንተ ናናቱዋነ ህንተ ናናቱ ናናቱዋ ታማርስተ። 10ሲና ደርያ ቦላን መና ጎዳ ህንተ ጾሳ ስንን ህንተ ኤቄዳ ዎደ፥ ጾሳይ ታና፥ ‘ሀ ሳኣን ደኤዳ ዎደ ኡባን፥ ኡንቱንቱ ታዉ ያይያዋ ታማራናዳንነ ባረንቱ ናናቱዋካ ሄዋ ታማርሳናዳን፥ ታን ታ ቃላ ኡንቱንታ ስሳና ማላ፥ አሳ ታኮ ሺሻ’ ጌዳዋ ሀሳይተ።

11“ሄ ዎደ ህንተ ሺቂደ ደርያ ጻጱዋን ኤቄድታ፤ ሳሎ ግዱዋ ጋካናዉ፥ ሄ ደርያ ቦላን ታማይ ኤጼ፤ ሄ ደርያ ጻጱ ሳካና ማንነ ሻራን ጎዘት ኡቴዳ።#ከሳ 19:16-18፤ እብራ. 12:18-19 12መና ጎዳይካ ታማ ግዶፐ ህንተንቶ ሃሳዬዳ፤ ህንተ አ ኮሻ ስሴድታፐ አትና፥ አ በእበይክታ። 13ህንተ ኦናዳን እ ህንተና አዛዜዳ ባረ ጫቁዋ ህንተንቶ ኦዴዳ፤ ሄዋንቱካ ታሙ አዛዞቱዋ። እ ኡንቱንቱ ላኡ ማሰቴዳ ሹቻቱ ቦላ ጻፌዳ።#ከሳ 31:18፤ 34:28፤ ዛረ. 9:10 14ህንተ ላታናዉ ብያ ጋድያን ኦናዳን፥ አዋዩዋነ ህግያ ህንተና ታማርሳና ማላ፥ መና ጎዳይ ታና ሄ ዎደ አዛዜዳ።#ከሳ 21:1

ኤቃ ምስልያዉ ጎይነናዳን እመቴዳ አዛዙዋ

15“መና ጎዳይ ሲና ደርያ ቦላን ታማ ግዶፐ ህንተንቶ ሃሳዬዳ ጋላስ፥ ህንተ አ በእቤና ድራዉ፥ ሎይ ናገትተ። 16አቱማ ዎይ ማጫ ማላን ኦሰቴዳዋ ግድና#ከሳ 20:4፤ ዎጋ 26:1፤ ዛረ. 5:8 17ሳኣን ደእያ ዶኣ ኡባ ሌምሱዋ ግድና፥ ሳሉዋ ጉፋንዋን ፓልያ ካፉዋ ኡባ ሌምሱዋ ግድና፥#ሮመ 1:23 18ሳኣ ቦላን ቃጽያባቱ ሌምሱዋ ግድና፥ ቢታፐካ ጋርሳና ሃ ግዶን ደእያ ሞልያ ሌምሱዋ ግድናካ፥ ህንተ ቱነናዳን ማሰቴዳዋ ህንተንቶ ጾሳ ኦደ ጎይኖፕተ። 19ቃይ ሳሉዋ ፑደ ጼሊደ፥ መና ጎዳይ ህንተ ጾሳይ ሳሉዋፐ ጋርሳና ደእያ ካዉተቶ ኡባዉ እሜዳ አዋ፥ አግና፥ ጾልንተቱዋነ ሳሉዋ መታቱዋ ኡባ በኢደ፥ ህንተ ኡንቱንቶ ጎይኒደ፥ ባለናዳን ናገትተ። 20ሽን መና ጎዳይ ህንተና ሀች ህንተ ግድያዋዳን፥ ባረዉ ዱማቴዳ አሳ ኦናዉ ብራታ ጮጭያ ማላ ግድያ ግብጼፐ ከሲደ አሄዳ።#ከሳ 19:5፤ ዛረ. 7:6፤ 14:2፤ 26:18፤ ቲቶ 2:14፤ 1 ጰጽ. 2:9

21“ቃይ ህንተ ጋሱዋን መና ጎዳይ ታና ሀንቀቲደ፤ ታን ዮርዳኖሳ ፕነናዳንነ፥ መና ጎዳይ፥ ህንተ ጾሳይ፥ ላታ ኦደ ህንተንቶ እምያ ሎኦ ቢታ ታን ገለናዳን ጫቄዳ።#ፓይ. 20:12 22ሄዋ ድራዉ፥ ታን ዮርዳኖሳ ሻፋ ፕነናን ሀ ጋድያን ሀይቃና፤ ሽን ህንተ ፕኒደ፥ ሄ ሎኦ ቢታ ላቲታ። 23ሄዋ ድራዉ፥ መና ጎዳይ ህንተ ጾሳይ ህንተናና ጫቀቴዳ ጫቁዋ ዶጎፕተ። ቃይ መና ጎዳይ ህንተ ጾሳይ ህንተና ኦፕተ ጌዳ አይ ማላን ማሰቴዳ ምስልያ ግዶፐነ ህንተንቶ ኤቃ ኦናዳን ናገትተ። 24አያዉ ጎፐ፥ መና ጎዳይ ህንተ ጾሳይ ምያ ታማነ ቃናትያ ጾሳ።#እብራ. 12:29

25“ህንተ ናናቱዋነ፥ ናናቱ ናናቱዋ የሊደ ሄ ጋድያን አዱሳ ዎድያ ደእያ ዎደ፥ አይ ማላን ግዶፐነ ማሰቴዳ ምስልያዉ ጎይኒደ ቱኖፐ፥ ቃይ መና ጎዳ ህንተ ጾሳ ሀንቀናዉ አ ስንን ኢታባ ኦፐ፥ 26ህንተ ዮርዳኖሳ ሻፋ ፕኒደ ላታናዉ ብያ ጋድያፐ እቱነ አተናን፥ ኤለ ያናዉ፥ ታን ህንተ ቦላን ሀች ሳሉዋነ ሳኣ ማርካያይ። ህንተ ኡባናካ ያናፐ አትና፥ ሄ ጋድያን አዱሳ ዎድያ ደእክታ። 27መና ጎዳይ ህንተና ሀራ አሳ ግዶን ላላና፤ ሄ ህንተና መና ጎዳይ ላልያ ካዉተቱዋ ግዶን ህንተ ፓይዱ ጉ ግዳናዋ።#ዛረ. 28:36 28ሄዋን ህንተ ምፐነ ሹቻፐ አሳ ኩሽያን ጊጌዳ በኤና፥ ስሰና፥ ሜናነ ስንገና ጾሳቶ ጎይናና። 29ሽን ሄዋን ደኢደ፥ ህንተ መና ጎዳ፥ ህንተ ጾሳ ኮያና፤ ህንተ አ ህንተ ኩመን ዎዛናፐነ ህንተ ኩመን ሸምፑዋፐ ኮዮፐ ደማና።#ኤር. 29:13 30ሀ ኡባ መቱዋ ግዶን ህንተ ኡንኤቲደ ደኢደ፥ ዎድያ ዉርሰን መና ጎዳኮ፥ ህንተ ጾሳኮ፥ ህንተ ስማናነ አ ቃላዉካ አዛዘታና። 31መና ጎዳይ ህንተ ጾሳይ ማሮተን ኩሜዳ ጾሳ ግድያ ድራዉ፥ እ ህንተና አገና፤ ዎይ ይሰና፤ ህንተ አዋቶ እ ጫቄዳ ጫቁዋካ ዶገና።

32“ጾሳይ ጋድያን አሳ መዳ ጋላሳፐ ዶሚደ፥ ህንተፐ ካሰ አዳ ዎድያ አነ ፓይድተ፤ ሀዋ ማላ ግታባይ ሙለካ ሀን ኤርንቶ ዎይ ስሰት ኤርንቶ፥ ሳሎ ሀ ጋጻፐ ያ ጋጻ ጋካናዉ አነ ኦችተ። 33ታማ ላጩዋ ግዶና ጾሳይ ስሲደ፥ ህንተ የናን ደኡዋን ደኤዳዋዳን፥ ጾሳይ ስሲደ፥ ደኡዋን ደኤዳ ሀራ አሳይ ደኢ? 34ዎይ መና ጎዳይ ህንተ ጾሳይ ህንተ ጼልሽን፥ ግብጼ ጋድያን ህንተንቶ ኦዳዋዳን፥ ፓጭያን፥ ማላታን፥ ማላልስያዋን፥ ኦላን ዎልቃማ ኩሽያንነ ምጨቴዳ ቀስያን፥ ቃይ ዎልቃማ ያሻን ሀራ ካዉተ ግዶ ገሊደ፥ እት ካዉተ ባረዉ አካናዉ ባጸቴዳ ሀራ ጾስ ደኢ? 35መና ጎዳይ ጾሳ ግድያዋ ህንተ ኤራና ማላ፥ ሄዋ እ ህንተና በሴዳ፤ አፐ አትና ሀራይ ባዋ።#ማር. 12:32 36እ ህንተና ታማርሳናዉ ኮዬዳ ድራዉ፥ ባረ ኮሻ ሳሉዋፐ ህንተና ስሴዳ። ቃይ ሀ ሳኣን ባረ ዎልቃማ ታማ ህንተና በሴዳ፤ ሄ ታማ ግዶፐ ህንተ አ ቃላ ስሴድታ። 37እ ሄዋ ኦዳዌ ህንተ አዎቱዋ ሲቄዳዋፐ ደንዴዳዋን፥ ኡንቱንቱፐ ጉይያን የለትያ ኡንቱንቱ ዛራቱዋ ዶሬዳ ግሻሳ። ቃይ ህንተናካ ግብጼፐ ባረ ዎልቃማ ዎልቃን ከሴዳ ግሻሳ። 38ሀቼ ህንተ በእያዋዳን፥ ህንተና ገልሳናዉነ ኡንቱንቱ ቢታ ህንተንቶ ላታ ኦደ እማናዉ፥ ህንተፐ ዳርያነ ዎልቃምያ ካዉተቱዋ ህንተ ስንፐ የደርሴዳ።

39“ስም ሄዋ ግዶፐ፥ ቦላ ሳሉዋን ግድና፥ ጋርሳ ሳኣን ግድና፥ መና ጎዳይ ጾሳ ግድያዋ ኤርተ፤ ህንተ ዎዛናንካ ዎተ፤ ሀራ ጾሳይ ባዋ። 40ሄዋ ድራዉ፥ ህንተንቱነ ህንተፐ ጉይያን ህንተ ናናዉ ኡባባይ ሎኦ ግዳናዳን፥ ቃይ መና ጎዳይ ህንተ ጾሳይ ህንተንቶ መናዉ እምያ ጋድያን ህንተ ህንተረ አዱቃናዳን፥ ታን ሀች ህንተና አዛዝያ አዋዩዋነ ህግያ ናግተ” ያጌዳ።

ሸምፑዋ ዎዳዋንቱ ባቃቲደ አትያ ካታማቱዋ

41ሄዋፐ ጉይያን፥ ሙሴ ዮርዳኖሳ ሄፍንን አዋይ ዶልያ ባጋና ሄዙ ካታማቱዋ ዱማዬዳ።#ኢያሳ 20:8-9 42ሄዋ እ ዱማዬዳዌ ካሰ ሞርከተይ ባይናን ደእሽን፥ ኤረናን፥ ባረ ሾሩዋ ዎዳ አሳይ ያ ባቃታናሳ። ሄ ካታማቱዋፐ እቶ ባቃቲደ፥ ሄ ብታኒ ባረ ሸምፑዋ አሻናዉ ዳንዳዬ። 43ሄዋ ድራዉ፥ ሮቤላ ዛርያዉ መላ ቢታን ቃሳን ደእያ ቤጸራ ካታማ፥ ጋዳ ዛርያዉ ጋላኣደን ደእያ ራሞታነ ምናሰ ዛርያዉ ባሳነን ደእያ ጎላና ካታማቱዋ ዱማዬዳ።

ህጊ እመትያዋ ኤርሱዋ

44ሙሴ እስራኤልያ አሳዉ እሜዳ ጾሳ ህጊ ሀዋ። 45-46ሀ ዎጋ፥ አዋዩዋነ ህግያ ኡንቱንቱ ግብጼፐ ከሲደ፥ ቤት-ፓኦራ ካታማ ስንን ደእያ፥ ዮርዳኖሳፐ አዋይ ዶልያ ባጋና ደእያ ዛንጋራን ደእሽን፥ ኡንቱንቶ እሜዳ። ሄ ሳአይ ሀሰቦናን ኡቲደ አሞረ ሞድያ ካትያ ስሆና ቢታ ግዶና። ሙሴነ እስራኤልያ አሳይ ግብጼፐ ከሴዳ ዎደ፥ ስሆና ኦሊደ ጾኔድኖ። 47ሄ ዎደ ኡንቱንቱ አ ቢታነ ባሳነ ካትያ ኦጋ ቢታ፥ ሄዌካ ቃይ ዮርዳኖሳፐ አዋይ ዶልያ ባጋና ደእያ ላኡ አሞረ ካተቱ ቢታ ላቴድኖ። 48ሄ ቢታይ አርኖና ሻፋ ዶናን ደእያ አሮኤራ ካታማፐ ቢደ፥ ስርዮነ ደርያ ጋኬ፤ ሄ ስርዮነ ጌተት ጼሰትያ ደሪ ሄርሞነ ግያ ደርያ። 49ቃይካ ሄ ቢታይ ዮርዳኖሳፐ አዋይ ዶልያ ባጋና ደእያ አራባ ቢታ ኡባ አኪደ ቢደ፥ ፕስጋ ደርያ ጻጱዋን ደእያ ሀይቁዋ አባ ጋኬ።

Currently Selected:

ዛረዋ 4: DFBE

Highlight

Copy

Compare