ኪታ 20

ጳዉሎስ ማቅዶንያነ ግሪከ ቤዳ

1ዋላሳይ እርጼዳዋፐ ጉይያን፥ ጳዉሎስ ካልያዋንታ አህሲደ ዞሬዳ፤ ኡንቱንታ፥ “ሳሩዋን ደእተ” ጊደ፥ ማቅዶንያ ባናዉ ከሴዳ። 2ሄ ጋድያና አደ፥ ቃላ ኦዲደ፥ አሳ ሎይ ምንሴዳዋፐ ጉይያን፥ ግሪከ ጋደ ዬዳ። 3እ ሄዋን ሄዙ አገና ኡቲደ፥ ማርካብያን ሶርያ ባናዉ ቆፕሽን፥ አይሁዳቱ ባረና ዎናዉ ኮይያዋ በኢደ፥ ማቅዶንያና ጉየ ስማናዉ ባረ ቆፋ ቃቼዳ።

4ጳዉሎሳ ሞይዜዳዋንቱ፥ ቤርያፐ ጳርሃሳ ናኣ ሶሲጳጽሮሳ፥ ተሰሎንቀፐ አርስጽሮኮሳነ ስኮንድሳ፥ ደርበፐ ጋዮሳነ ኢስያፐ ትክቆሳነ ጽሮፍሞሳ፥ ቃይ ጽሞቶሳ። 5ሄዋንቱ ስንዉ ቢደ፥ ኑና ጽሮኣዳን ናጊኖ። 6ኑን ኡክ ባላ ጋላሳ ቦንቾዋፐ ጉይያን፥ ፕልጵስዮሳ ግያ ጋድያፐ ማርካብያን ደንዲደ፥ እቼሹ ጋላሳን ጽሮኣዳን ኡንቱንታ ጋኪደ፥ ያን ላፑ ጋላሳ ኡቴዶ።

ጳዉሎስ ጽሮኣዳ ቤዳ

7ኑን ዎጋ ጋላስ#20:7 ዎጋ ጋላስ፦ ግሪክያ ማጻፋን፥ ሳምባታቱዋፐ እቱዋን ያጌ። ኡክ መንናዉ ሺቅ ደእሽን፥ ጳዉሎስ ዎንትና ባናዉ ቆፔዳ ድራዉ፥ ኡንቱንቶ ቃላ ኦዲደ፥ ቃማ ብላሂ ጋካናዉ የዉዋ አዱሴዳ። 8ኑን ሺቅ ኡቴዳ ፖቅያን ጮራ ጾምፒ ደኤ። 9ኤዉጽኮሳ ግያ እት ዎዳላይ ማስኮትያ ቦላ ኡቲደ፥ ዳርስ ገምእሼዳ። ጳዉሎስ ሃሳያ አዱሴዳ ዎደ፥ ኤዉጽኮስ ገምእሹዋን ሀይሬዳዌ ሄዘንያ ፖቅያፐ ሳኣን ኩንዲደ ሀይቄዳዋ አሳይ ደንዳ። 10ሽን ጳዉሎስ ዎደ፥ አ ቦላ ጉፋኔዳ። አ እድሚደ፥ “አ ሸምፑ ከስቤና ድራዉ ህርጎፕተ” ያጌዳ። 11ያቲደ ፑደ ፖቅያ ከሲደ፥ ኡክ መንደ ሜዳ፤ ሳአይ ዎንታና ጋካናዉ፥ ዳሮ ዎድያ ሃሳዬዳዋፐ ጉይያን ቤዳ። 12ዎዳላይ ፓጽና፥ ሶይ አፊደ፥ ዳርስ ናሸቴድኖ።

ጳዉሎስ ጽሮኣዳፐ ምሊጸ ቤዳ

13ሽን ጳዉሎስ ባረና ያፐ ኑን ሞካና ማላ፥ ኑዉ ኦዴዳ ድራዉ፥ ካሰቲደ ማርካብያኮ ቢደ፥ አሶሳ ባናዉ ደንዴዶ፤ አያዉ ጎፐ፥ ገድያን ባናዉ እ ቆፔዳ ድራዉ ኑና ሄዋዳን አዛዜዳ። 14እ ኑናና አሶሳን ጋከትና፥ ማርካብያን አ አኪደ ምጽሊነ ዬዶ። 15ዎንተ ጋላስ ያፐ ማርካብያን ደንዲደ፥ ክዮሳ ሄራ ጋኬዶ፤ ቃይ ዎንተ ጋላስ ሳሞሳ ፕኔዶ፤ ትሮግልዮመን አቂደ፥ ዎንትና ምሊጸ ዬዶ። 16አያዉ ጎፐ፥ ጳዉሎስ ኢስያን ዳሪ ጋምኤናን ኤፈሶነ ላንቂያና አናዉ ባረ ቆፋ ቃቼዳ፤ ባረዉ ዳንዳየቶፐ፥ ጰንጸቆስተ ጌተትያ ጋላስ የሩሳላመ ጋካናዉ ኤሌሌ።

ጳዉሎስ ኤፈሶነ ጭማቶ ዉርሰ ሃሳያ ሃሳዬዳ

17ጳዉሎስ ምሊጸፐ ኤፈሶነ ኪቲደ፥ አማንያ አሳ ካለያዋንታ ጼግሴዳ። 18-19ዎሳ ጎለ ጭማቱ ጳዉሎሳኮ ዪና፥ ኡንቱንታ እ ሀዋዳን ያጌዳ፤ “ታን ኢስያ ገሌዳ ኮይሮ ጋላሳፐ ዶምና፥ ካዉሻተንነ ዳሮ አፎን ጎዳዉ ኦደ፥ አይሁዳቱዋ ሺቁዋፐ ታና ጋኬዳ ፓጨ ግዴዳ ዎድያ ኡባን ህንተንቱና ዋናደ ደኣድታንቶ ህንተንቱ ኤሪታ። 20-21ናጋራፐ ጾሳኮ ስምያዋነ ኑ ጎዳ የሱስ ክርስቶሳ አማንያዋ አይሁዳቶነ አይሁዳ ግደናዋንቶ ማርካታደ፥ ሺቁዋንካ ህንተንቱ ጎለን ጎለንካ ህንተንቶ ኦዳደ ታማርሴዳዋፐ አትን፥ ህንተንታ ጎእያባፐ እትባነ ፓጭሳ በይከ።

22“በእተ፤ ሀእካ ታን ጌሻ አያናዉ አዛዘታደ፥ የሩሳላመባይ፤ ያን ታዉ አዬ ከሳነንቶነ ኤርከ። 23ጌሻ አያናይ ቃሹነ ዋዪ ታና ናግያዋ ካታማ ኡባን ታዉ ኦዴ። 24ሽን ታ ዎ ፖላናዉነ ጎዳ የሱስ ክርስቶሳፐ ታን አኬዳ ኦሱዋ ጾሳ አ ኬካተ ዎንጋላ ምሽራቹዋ ማርካትያዋ ፖላናዉ፥ ታ ሸምፑዋ ማደናዋዳን ፓይዳይ።

25“በእተ፤ ታን ሀእካ ጾሳ ካዉተባ ኦዳደ፥ ህንተንቱ ኡባ ግዶን ዩያድ፤ ስም ሀዋፐ ስንዉ ህንተንቱፐ ኦንነ ታና በኤናዋ ኤራይ። 26ሄዋ ድራዉ፥ ህንተንቱፐ እት ኡራይ ባዮፐካ ታን ሄዋን ገለናዋ ሀቼ ህንተንቶ ጌሻደ ኦዳይ። 27አያዉ ጎፐ፥ ጾሳይ ኦናዉ ቆፔዳዋ ኡባ ህንተንቶ አይነ አሸናን ኦዳድ።

28“የሱስ ባረ ሱን ዎዜዳ ጾሳ አማንያዋንታ ናግተ፤ ቃይ ጌሻ አያናይ ህንተንታ ካፓቱዋ ኦደ ሱንዳ ዉድያ ኡባነ ህንተንቱ ሁጲያ ናግተ። 29-30ታን ቤዳዋፐ ጉይያን፥ ዉድያዉ ቃረተና ኢታ ዎራካናቱ ህንተንቱ ግዶ ገላናዋንታነ፥ ካልያዋንታ ባረንቱ ጌዱዋ ካለናዉ ዎርዱዋ ሃሳይያ አሳቱ ህንተንቱ ግዶፐ ደንዳናዋ ኤራይ። 31ሄዋ ድራዉ፥ ታን ሄዙ ላይ ቃማነ ጋላሳ አፎን ህንተንታ ሁጲያን ሁጲያን ምንስያዋ አጋቤናዋ ቆፒደ ገንጭተ።

32“ሀእካ ህንተንታ ምንሳናዉነ ጌሻ አሳ ኡባ ግዶን ላትሳናዉ ዳንዳይያ ጾሳዉነ አ አ ኬካተ ቃላዉ ህንተንታ ሀዳራ እማይ።

33“ታን ኦፐነ ብራ ዎይ ዎርቃ ዎይ ማዩዋ አሞታበይከ፤ 34ታን ሀ ታ ኩሽያን ታናነ ታናና እትፐ ደእያዋንታ ኮሼዳዋ ኦዳዋ ህንተንቱ ህንተንቱ ሁጰዉ ኤሪታ። 35ህንተንቱ ሀዋዳን ዳቡር ኦደ፥ ዳቡራንቻቱዋ ማዳናዉነ ጎዳ የሱስ ባረ ሁጰዉ፥ ‘አክያዋፐ እምያዌ አንጀቴዳዋ’ ጌዳዋዳን፥ አ ቃላ ህንተንቱ ዎዛና አናዉ በስያዋ ታን ጮራ ኦግያን ህንተንታ በሳድ” ያጌዳ።

36ጳዉሎስ ሄዋ ሃሳይ ዉርሲደ፥ ኡንቱንቱ ኡባና እትፐ ጉልባቲደ፥ ጾሳ ዎሴዳ። 37ኡንቱንቱ ኡባይ ጳዉሎሳ እድሚደ፥ ዬኪደ የሬድኖ። 38ኡባፐ እ፥ “ታና ላኤንዋ ኡባካ በእክታ” ያጌዳ ቃላይ ኡንቱንታ ዳሮ ቃረና ማርካብያ ጋካናዉ አ ሞይዜድኖ።

Currently Selected:

ኪታ 20: DFBE

Highlight

Compare

Copy