ኪታ 21
21
ጳዉሎስ የሩሳላመ ቤዳ
1ኑን ኤፈሶነ ጭማቱዋፐ ሻከቲደ፥ ቆሳ ጌተትያ ሃን ዶደቶ ሳኣ ዪ አጌዶ፤ ዎንትሳ ጋላስ ሮዳ ጋኬዶ፤ ሄዋፐ ጳጽራ ቤዶ። 2ፕንቀ ፕንያ ማርካብያ ደሚደ፥ አን ገሊደ ባናዉ ደንዴዶ። 3ኑን ቆጲሮሳፐ በአናዉ ዳንዳይያሳ ዪደ፥ አዋይ ከስያሳ ጼልያ ዎደ ቆጲሮሳ ሀድርሳ ባጋ የጊደ፥ ሶርያ ቤዶ፤ ሄዋፐ ጉይያን ጺሮሳ ጋኬዶ፤ አያዉ ጎፐ፥ ማርካቢ ባረ ጫና ጺሮሳን ዎ። 4ያን ካልያዋንታ ደሚደ፥ ኡንቱንቱና ላፑ ጋላሳ ኡቴዶ፤ ጳዉሎስ የሩሳላመ ቤና ማላ፥ ኡንቱንቱ አዉ አያናን ኦዴድኖ። 5ኑን ኡንቱንቱና ኡትያ ዎዲ ዉርና፥ ከሲደ ቤዶ፤ ኡንቱንቱ ኡባቱ ባረንቱ ማጫዋንቱናነ ባረንቱ ናናና እትፐ ካታማፐ ካረዉ ከሳና ጋካናዉ፥ ኑና ሞይዜድኖ፤ ኑን አባ ዶናን ጉልባቲደ፥ ጾሳ ዎሴዶ። 6ሄዋፐ ጉይያን፥ እቱ እቱዋ ሳሮቲደ፥ ማርካብያን ገሌዶ፤ ኡንቱንቱ ባረንቱ ሶይ ስሜድኖ።
7ኑን አባ ኦግያ ዉርሲደ፥ ጺሮሳፐ ጰጸለማይሰ ጋኬዶ፤ እሻቱዋ ሳሮቲደ፥ ኡንቱንቱ ማታን እት ጋላሳ ፔሼዶ። 8ዎንትሳ ጋላስ ከሲደ፥ ቂሳርያ ቤዶ፤ ዎንጋላ ምሽራቹዋ ኦድያ ፕልጶሳ ሶይ ጋኪደ፥ አ ማታን ኡቴዶ፤ የሩሳላመን ዶረቴዳ ላፑናቱዋፐ እ እቱዋ። 9ፕልጶሳዉ ናባቱዋ ግዴዳ ኦይዱ ዎዶሮ ማጫ ናናቱ ደኢኖ።
10ኑን ኡንደኔዳ ጋላሳ ኡቴዳ ዎደ፥ ናብያ አጋቦሳ ግያ ብታኒ ይሁዳፐ ቂሳርያ ዬዳ። 11ኑኮ ዪደ፥ ጳዉሎሳ ሳቂያ አኪደ ባረ ኩሽያነ ባረ ገድያ ቃቺደ፥ “ጌሻ አያናይ ግያዌ ሀዋ፤ ሀ ሳቂያ ጎዳ የሩሳላመን አይሁዳቱ ሀዋዳን ቃቺደ፥ አይሁዳ ግደና አሳቶ አደ እማና” ያጌዳ።
12ኑን ሄዋ ስሴዳ ዎደ፥ ኑንነ ያን ደእያ አሳቱ ጳዉሎስ የሩሳላመ ቤና ማላ ዎሴዶ። 13ሽን ጳዉሎስ ዛሪደ፥ “ህንተንቱ ዬኪደነ ታ ዎዛና ቃረትሲደ ዋኒቴ? ታን ጎዳ የሱሳ ሱን ድራዉ ቃሸታናዋ ጻላላ ግደናን፥ ሀራይ አቶ የሩሳላመን ሀይቃናዉካ ጊጋ ኡታድ” ያጌዳ።
14ዞርያ እ አከናን እጽና፥ “ጎዳይ ጌዳዌ ሀኖ” ያጊደ ጮኡ ጌዶ።
15ያን አማሬዳ ዎድያ ጋምኤዳዋፐ ጉይያን፥ ጊገቲደ የሩሳላመ ባናዉ ከሴዳ። 16ቂሳርያን ደእያ ካልያዋንቱፐ አማሬዳዋንቱ ቃይ ኑናና ቤድኖ፤ ኡንቱንቱ ኑን አቃናሳ ምናሶና ግያ ቆጲሮሳ ብታንያ ሶይ ኑና አፌድኖ፤ ምናሶን ዳሮ ዎድያፐ ዶሚደ ካልያዋ።
ጳዉሎስ የሩሳላመን ያቆባ ኦቼዳ
17ኑን የሩሳላመ ጋኬዳ ዎደ፥ እሻቱ ኑና ናሸቻን ሞኬድኖ። 18ዎንትሳ ጋላስ፥ ጳዉሎስነ ኑን ያቆባና ጋከታናዉ ቤዶ። ዎሳ ጎለ ጭማቱ ኡባቱካ ደኢኖ። 19ጳዉሎስ ኡንቱንታ ሳሮቴዳዋፐ ጉይያን፥ አይሁዳ ግደና አሳ ግዶን ባረ ባጋና ጾሳይ ኦዳዋ ኡንቱንቶ ዉርሲደ ኦዴዳ።
20ኡንቱንቱ ሄዋ ስሴዳ ዎደ ጾሳ ጋላቲደ፥ ጳዉሎሳ ሀዋዳን ያጌድኖ፤ “ኑ እሻዉ፥ አይሁዳቱዋ ግዶን ጾሳ አማኔዳዋንቱፐ አፑን ሻአይ ደኢኖንቶ በኣሳ፤ ኡንቱንቱ ኡባይ ህግያ ምንስ ናጊኖ። 21የሩሳላመ አይሁዳቱ፥ አይሁዳ ግደናዋንቱ ጋድያን ደእያ አይሁዳ ኡባቱ ባረንቱ ናና ቃጻረና ማላ፥ ዎይ አይሁዳቱ ኦያዋ ካለና ማላ፥ ሙሴ ህግያካ ባይዛና ማላ ኔን ታማርስያዋ ስሴድኖ። 22ያትና፥ አዬ ሎኡ? ኔን ዬዳዋ ጮራቱ ስስያ ድራዉ፥ ሺቀናን አግክኖ።
23“ሄዋ ድራዉ፥ ሀዋ ኑን ነዉ ኦድያዋ ኦ፤ እትፐ ሺቁ ደእያ ኦይዱ አሳቱ ኑ ማታን ደኢኖ።#ፓይ. 6:13-21 24ኡንቱንታ አካደ ኡንቱንቱና ጌያ፤ ቃይ ኡንቱንቱ ባረንቱ ሁጲያ ሜደታና ማላ፥ ኡንቱንቶ ሚሻ እማ፤ ኡንቱንቱ ኡባይ ነዋ ሲሴዳዌ ቱማ ግደናዋነ ኔን ነ ሁጰዉካ ቃይ ሙሴ ህግያ ናጋደ ማራን ደእያዋ ኤራና።
25“ሽን አማኔዳ አይሁዳ ግደና አሳቱዋ ግዶፐ፥ ኡንቱንቱ ኤቃዉ ያርሼዳዋ ሜና ማላነ ሱ ኡሸና ማላ፥ ባኩቴዳ መህያ አሹዋ ሜና ማላነ ዎሹመና ማላ፥ ኑን የዉዋ ቃቺደ፥ ኡንቱንቶ ዳብዳቢያ ጻፌዶ” ያጌድኖ።
26ሄዋፐ ጉይያን፥ ጳዉሎስ ዎንትሳ ጋላስ አሳቱዋ አኪደ፥ ኡንቱንቱና ጌዬዳ፤ እ ባረንታ ጌሹሳ አዉደ ፖልንቶ ኤርሳናዉነ ቃይ ያርሹዋ ሁጲያን ሁጲያን አዉደ እማነንቶ ኤርሳናዉ ጌሻ ጎልያ ገሌዳ።
ጳዉሎስ ጌሻ ጎልያን ኦይቀቴዳ
27-28ላፑ ጋላሳይ ዉራና ሀኖደ፥ ኢስያፐ ዬዳ አይሁዳቱ ጌሻ ጎልያን ጳዉሎሳ በኢደ፥ አሳ ኡባ ሀንቀደ፥ “እስራኤልያ አሳዉ፥ ኑና ማድተ፤ እስራኤልያ አሳ፥ ሙሴ ህግያነ ሀ ጌሻ ጎልያ እጺደ፥ ኡባ ሳን አሳ ኡባ ታማርስያዌ ሀ ብታንያ፤ ጉጂደ ቃይ ግሪከ አሳካ ጌሻ ጎልያ ገልሲደ፥ ሀ ጌሻ ሳኣ ቱንሴዳ” ያግ ዋሲደ፥ ጳዉሎሳ ኦይቄድኖ። 29ኡንቱንቱ ካሰ ኤፈሶነን ደእያ ጽሮፍሞሳ ጳዉሎሳና ካታማን በኤዳ ድራዉ፥ ጌሻ ጎልያ ጳዉሎስ አ ገልሴዳዋ ኡንቱንቶ ማላቴዳ።
30ካታማ ኡባይ ሻቢረቴዳ፤ አሳይ ኡባይ ሺቂደ ጳዉሎሳ ኦይቂደ፥ ጌሻ ጎልያፐ ካረዉ ጎች ከሴዳ፤ ሄ ማንእያን ጌሻ ጎልያ ፐንገቱ ቃሸት አጌድኖ። 31አሳይ ጳዉሎሳ ዎና ሀንሽን፥ “የሩሳላመ ካታማይ ሙለካ ሻቢረት ድጌዳ” ግያ ሃሳያይ ሮመ ጋድያ ኦላ ካፖ ጋኬዳ። 32ሄ ኦላ ካፑ ዎታዳራቱዋነ ጼታቱዋ ካፓቱዋ እትፐ አኪደ፥ ዎጺደ አሳ ቦላ ከስ ዎዳ፤ አሳይ ኦላ ካፑዋነ ዎታዳራቱዋ በኤዳ ዎደ፥ ጳዉሎሳ ሾጭያዋ ባሽ አጌዳ።
33ሄ ዎደ፥ ሄ ኦላ ካፑ ሺቅ፥ ጳዉሎሳ ኦይቂደ፥ ላኡ ሳንላታን ቃሸታና ማላ አዛዚደ፥ እ ኦነንቶነ ቃይ አያ ኦደንቶነ አሳ ኦቼዳ። 34አሳፐ ባጋይ እትባዉ ዋስያ ዎደ፥ ባጋይ ሀራባዉ ዋሴ፤ ዋሱ ጮሬዳ ድራዉ፥ ኦላ ካፖ ቱሙዋ ኤራናዉ ዳንዳየተናን እጽና፥ ዎታዳራቱ ጳዉሎሳ ባረንቱ ደኢያሳ አፋና ማላ፥ ኡንቱንታ አዛዜዳ። 35የደ ከስያ ደ ጳዉሎስ ጋኬዳ ዎደ፥ አሳ ሱገ ድራዉ፥ ዎታዳራቱ አ ቶኬድኖ። 36አያዉ ጎፐ፥ ጮራ አሳይ፥ “አ ዎ!” ያጊድነ ዋሲደ ካሌ።
ጳዉሎስ ሞቶ ዛሩዋ እሜዳ
37ዎታዳራቱ ጳዉሎሳ ባረንቱ ደኢያሳ አፋና ሀንሽን ጳዉሎስ ኦላ ካፑዋ፥ “ታን ነዉ እትባ ኦዶ?” ያጌዳ።
ሄ ኦላ ካፑ ጳዉሎሳ፥ “ኔን ግሪከ ቃላ ኤራይ? 38ኔን ሀዋፐ ካሰ ዎደ፥ ዋላሳ ከሳደ ሸምፑዋ ዎዳዋንቱፐ ኦይዱ ሻአ አሳቱዋ አሳይ ባይና መላ ሳኣ ካለዳ ግብጼ ብታንያ ግድኪ?” ያጌዳ።
39ሽን ጳዉሎስ፥ “ታን አይሁዳ አሳ፤ ቃይ ክልቂያን ደእያ ጸርሴሰን የለቴዳ ሁጰ ካታማን ደእያ አሳ። ሀያና ታና አሳዉ ሃሳይሳርኪ?” ያጌዳ።
40ኦላ ካፑ አ፥ “ሃሳያ” ያግና፥ ጳዉሎስ የደ ከስያ ደን ኤቂደ፥ አሳይ ጮኡ ጋና ማላ፥ ባረ ኩሽያን አሳኮ ጾርሴዳ። አሳይ ጮኡ ጊና፥ እብራይስጸ ቃላን ሃሳዪደ፥ ሀዋዳን ያጌዳ።
Currently Selected:
ኪታ 21: DFBE
Highlight
Share
Compare
Copy
Want to have your highlights saved across all your devices? Sign up or sign in
The Word for the World Ethiopia
