ኪታ 19

ጳዉሎስ ኤፈሶነ ቤዳ

1አጲሎስ ቆሮንቶሳን ደእሽን፥ ጳዉሎስ ቆሞ ባጋና አደ፥ ኤፈሶነ ቤዳ፤ እት እት ካልያዋንታ ደሜዳ። 2ጳዉሎስ ኡንቱንታ፥ “ህንተንቱ አማኔዳ ዎደ ጌሻ አያና አኬድቴ?” ያጊደ ኦቼዳ።

ኡንቱንቱ፥ “ቱይት፥ አክበይኮ፤ ሀራይ አቶ፥ ጌሻ አያናይ ደእያዋካ ስስበይኮ” ያጌድኖ።

3ጳዉሎስ ኡንቱንታ፥ “ያትና፥ አያን ጻማቀቴድቴ?”#19:3 አያን ጻማቀቴድቴ? ሀዋ ጉሳይ ኦ ሱንን ጻማቀቴድቴ፥ ጉሳ። ያጌዳ።

ኡንቱንቱ፥ “ኑን ዮሃንሳ ጽንቃታን ጻማቀቴዶ” ያጊደ ዛሬድኖ።

4ጳዉሎስ፥ “ዮሃንስ ባረፐ ጉይያን ይያ የሱስ ክርስቶሳን አሳይ አማናና ማላ፥ አሳዉ ኦዲደ፥ ናጋራፐ ስምያ ጽንቃታን ጻማቄዳ” ያጌዳ።

5ኡንቱንቱ ሄዋ ስሴዳ ዎደ፥ ጎዳ የሱስ ክርስቶሳዉ ግዳናዉ ጻማቀቴድኖ። 6ጳዉሎስ ባረ ኩሽያ ኡንቱንቱ ቦላ ዎዳ ዎደ ጌሻ አያናይ ኡንቱንቱ ቦላን ዎና፥ ዱማ ዱማ ቃላን ሃሳዬድኖ፤ ቃይ ትምቢትያካ ኦዴድኖ። 7ሄዋን ታማነ ላኡ አሳቱዋ ግድያዋንቱ ደኢኖ።

8ጳዉሎስ አይሁዳ ዎሳ ጎለ ገሊደ፥ ጾሳ ካዉተባ ፓሉመቲድነ አኬክሲደ፥ አሳና ሄዙ አገና ግድያዋ ኬና ያየናን ሃሳዬ። 9ሽን ኡንቱንቱፐ እቱ እቱ ማካሊደ፥ ጮራ አሳ ስንን ጎዳ ኦግያ ቦሪደ አማነናን እጽና፥ ጳዉሎስ ኡንቱንቱፐ ሻከት፥ ባረና ካልያዋንታ ባረናና አፌዳ፤ ጽራኖሳ ግያ ትምርተ ጎልያን ኡባ ጋላስ ፓሉመቴ። 10ጳዉሎስ ላኡ ላይ ጋካናዉ ቃላ ኦዴዳ፤ ሄዋ ድራዉ፥ ኢስያን ደእያ አሳይ ኡባይ፥ አይሁዳቱካ አይሁዳ ግደናዋንቱካ ጎዳ ቃላ ስሴድኖ።

ጾሳይ ጳዉሎሳ ኩሽያን ኦዳ ኦራባ

11ጾሳይ ጳዉሎሳ ባጋና ዱማ ማላታ ኦዳ። 12ሄዋ ድራዉ፥ አሳይ አ ቦላይ ቦቼዳ ማራብያ ዎይ ማዩዋ ሀርጋንቻቶ አፌ፤ ሀርጋንቻቱካ ፓጺኖ፤ ኢታ አያናቱካ ኡንቱንቱፐ ከሲኖ።

13ኢታ አያናቱዋ ከሲደ ዩይያ አይሁዳቱዋፐ እቱ እቱ፥ “ጳዉሎስ ቃላ ኦድያ የሱሳ ሱንን ኑን ህንተንታ ከስተ ጊደ አዛዜቶ” ያጊደ፥ ኢታ አያናቱ ደእያ አሳቱዋ ቦላን ጎዳ የሱሳ ሱን ጼስ በኤድኖ። 14ቄሳቱዋ ካፑዋ አስቄዋ ግያ እት አይሁዳ ብታንያዉ ሄዋ ኦዳ ላፑ ናናይ ደኢኖ።

15ኢታ አያናይ ኡንቱንቶ ዛሪደ፥ “ታን የሱሳ ኤራይ፤ ጳዉሎሳካ ኤራይ። ሽን ህንተንቱ ኦኔ?” ያጌዳ።

16ኢታ አያናይ ደእያ ብታኒ ኡንቱንቱ ቦላ ጉፕ ዎና፥ ኡንቱንቱ ማሱንጺደ፥ ሄ ጎልያፐ ካሎ ዎጻና ጋካናዉ፥ ዎልቃሚደ ጾኔዳ። 17ኤፈሶነን ደእያ አይሁዳቱነ አይሁዳ ግደናዋንቱ ኡባይ ሄዋ ስሲደ ኡባይ ዳሮ ያዬድኖ፤ ጎዳ የሱሳ ሱንይካ ዳሮ ቦንቼቴዳ። 18አማንያዋንቱፐ ጮራ አሳቱ ባረንቱ ኦዳዋ ፓጺድነ ቆንጭያን ኦዲደ ዪኖ። 19ብትያዋንቱፐ ጮራቱ ባረንቱ ማጻፋቱዋ ሺሺደ፥ አሳ ኡባ ስንን ጉዴድኖ፤ ሄ ማጻፋቱዋ ጋትያ ሄትያ ዎደ፥ እሻታሙ ሻአ ብራ ሳንትምያ ግዴዳ። 20ሄዋ ማላ ዎልቃማ ኦግያን ጾሳ ቃላይ ድጬነ አኬ።

ኤፈሶነ ካታማን ዋላሳይ ደንዴዳ

21ሄዌ ፖለቴዳዋፐ ጉይያን ጳዉሎስ፥ “ታን የሩሳላመ ባደ ሮመካ ቃይ በአናዉ በሴ”#19:21 ጳዉሎስ ሀዋ አያና ጌሻን ካለሰቲደ ሃሳዬዳዋ። ያጊደ፥ ማቅዶንያናነ አካይያና አደ፥ የሩሳላመ ባናዉ ቆፋ ቃቼዳ። 22ቃይ ባረና ማድያዋንቱፐ ላአቱዋ ጽሞቶሳነ ኤራስጾሳ ማቅዶንያ ኪቲደ፥ ባረዉ ኢስያን አማሬዳ ዎድያ ጋምኤዳ።

23ጎዳ ኦግያ ድራዉ፥ ሄ ዎደ ዳሮ ዋላሳይ ከሴዳ። 24አያዉ ጎፐ፥ ጻጋራ ብራ ሙሽሲደ ትግ መያ ድመጽሮሳ ግያ እት ብታኒ አርጸሚስ ጌሻ ጎልያ ምስልያ ብራፐ ትግ ትጊደ፥ ኦሳንቻቶ ዳሮ ዎያ ደሜ። 25ሄዋንታነ ኡንቱንቱዋ ማላ ኦሱዋ ኦያዋንታ እትፐ ሺሺደ፥ ሀዋዳን ያጌዳ፤ “አሳዉ፥ ኑ ዱረተይ ሀ ኦሱዋና ግድያዋ ህንተ ኤሪታ። 26ሄዌ ጳዉሎስ፥ ‘አሳ ኩሺ መዳዋንቱ ጾሳቱዋ ግድክኖ’ ያጊደ፥ ኤፈሶነ ጻላላን ግደናን አማሬዳ ጋዳቱዋፐ አትን፥ ኢስያን ኡባን ጮራ አሳዉ ኦድ አማንዳዋ ህንተንቱ በኤድታነ ስሴድታ። 27ሎኤናባይ፥ ኑ ኦሱ ካታናዋ ጻላላ ግደና፤ ሽን ኢስያን ደእያ ኡባቱነ ሳኣ ኡባን ደእያዋንቱ ጎይንያ ዎልቃማ ጾሳቶ ጌተትያ አርጸሚስ ጌሻ ጎሊ ቦንቼተናን አታናዋነ፥ እዝ ዳሮተይ ኩንዳናዋ” ያጌዳ።

28አሳይ ሄዋ ስሴዳ ዎደ ሎይ ሀንቀቲደ “ኤፈሶነ አርጸሚሳ ዎልቃማ” ያጊደ ጫቦቴድኖ። 29ካታማ ኡባን ዋላሳይ ደንዴዳ፤ ጳዉሎሳና ሀመትያ ማቅዶንያ አሳቱዋ ጋዮሳነ አርስጽሮኮሳ ባረንቱና ኦይቂ አኪደ፥ እትፐ ካሳ ሳኣ ዎጼድኖ። 30ጳዉሎስካ አሳይ ሺቄዳሳ ገላናዉ ኮዬዳ። ሽን ካልያዋንቱ አ ድጌድኖ። 31ኢስያ ጋድያ ካፓቱዋፐ ጳዉሎሳ ላገቱዋፐ እቱ እቱ ጳዉሎሳዉ ኪቲደ፥ ካሳ ሳኣን ቆንጭያ ከሲደ እ ቤተና ማላ፥ አ ዎሴድኖ።

32ሺቁዋን ዋላሳይ ደንድና፥ ዳርያ ባጋ አሳይ ሀራይ አቶ አያዉ ሺቄደንቶ ኤረና ድራዉ፥ እቱ እትባዉ ዋላቀትያ ዎደ፥ የኩ ቃይ ሀራባዉ ዋላቀቴ። 33አይሁዳቱ እስክንድራ አ በስና፥ እት እት አሳይ እ ሃሳያና ማላ፥ አሳ ግዶፐ ስንዉ አ አዳ፤ አሳይ ጮኡ ጋና ማላ፥ እ ባረ ኩሽያን ጾርስ በሲደ፥ አሳዉ ሞተታናዉ ኮዬዳ። 34ሽን እስክንድረ አይሁዳ አሳ ግዴዳዋ አሳይ ኤሬዳ ዎደ፥ ላኡ ሳተ ግድያዋ ኬና ኡባይ እት ቃላን፥ “ኤፈሶነ አርጸሚሳ ዎልቃማ” ያጊደ ጫቦቴድኖ።

35ካታማዉ ጻፈ ግዴዳዌ አሳ ጮኡ ኦደ፥ ሀዋዳን ያጌዳ፤ “ኤፈሶነ አሳዉ፥ ኤፈሶነ ካታማይ ዎልቃማ አርጸሚስስነ ሳሉዋፐ ዎዳ ኤቃ ሹቻዉ ኤቃ ጎልያ ናግያዋ ግዴዳዋ ኤረና አሳይ ኦኔ? 36ሀዋ ካድያ አሳይ ባይና ድራዉ፥ ህንተንቱ ዎፑ ጋናዉነ ድርበናን አጋናዉ በሴ። 37አያዉ ጎፐ፥ ሀዋንቱ ጌሻ ጎልያ ሚሻ ዉእቤናዋንታ ኑ ጾሳቱዋካ ቦርቤናዋንታ አሄድታ። 38ሄዋ ድራዉ፥ ድመጽሮስነ አናና ደእያ ኦሳንቻቱ አሳ ሞታናዉ ኮዮፐ፥ ፕርዳ ጎሊ ዶያ ደኤ፤ ቃይ ጋድያ ሞድያዋንቱካ ደኢኖ፤ ኡንቱንቱ ባረንቱ ግዶን ሞተቲኖ። 39ሽን ህንተ ሀራ የዉዋ ኮዮፐ፥ ህግያ ሺቁዋን የዉዋ ቃቻና። 40አያዉ ጎፐ፥ ሀቼ ሀኔዳዋ ሻቢረ ጊደ፥ ሮመ ጋድያ አሳቱ ኑና ሞታና፤ ሀ ሺቆካ ጋሱ ባይና ድራዉ፥ ኑን ጋሱዋ ኦዳናዉ ዳንዳዮኮ” 41ያጊደ ሺቁዋ ላሌዳ።

Currently Selected:

ኪታ 19: DFBE

Highlight

Compare

Copy