ኪታ 13

ባርናባስነ ሳኦል ጌሻ አያናይ ዶርና፥ ታማርሳናዉ ኪተቴድኖ

1አንጾክያን ደእያ አማንያ አሳ ግዶን ናባቱነ ታማርስያዋንቱ ደኢኖ፤ ኡንቱንቱካ ባርናባሳ፥ ካረ ግያ ስሞና፥ ቀሬናፐ ዬዳ ሉቅዮሳ፥ ጋድያ ሞድያ ሄሮድሳና#13:1 ሄሮድሳ፦ ሄሮድ አንትጳሳ ጌተትያ ዎጋ ሄሮድሰ ናኣ። ሄዌኔካ ጋሊላ ግያ ጋድያ ሞድያዋ። ሉቅ። 3:1 ጼልተ። ድጬዳ ምናሀነ ሳኦላ። 2ኡንቱንቱ ጎዳዉ ጎይንሽናነ ጾምሽን፥ ጌሻ አያናይ፥ “ታን ጼሴዳ ኦሶ ባርናባሳነ ሳኦላ ታዉ ዱማይተ” ያጌዳ።

3ኡንቱንቱ ጾሜዳዋፐነ ዎሴዳዋፐ ጉይያን፥ ባረንቱ ኩሽያ ባርናባሳ ቦላንነ ሳኦላ ቦላን ዎደ፥ ኡንቱንታ የዴድኖ።

ባርናባስነ ሳኦል ቆጲሮሳ ቤድኖ

4ሄዋ ድራዉ፥ ጌሻ አያናይ ኡንቱንታ ኪትና፥ ሴሉቅያ ዎድኖ፤ ሄዋፐ ዎንግርያን ገሊደ፥ ቆጲሮሳ ሃን ዶደቴዳሳ ቤድኖ። 5ኡንቱንቱ ስልማና ጋኪደ፥ አይሁዳ ዎሳ ጎለቱዋን ጾሳ ቃላ ኦዴድኖ፤ ኡንቱንታ ማዳናዉ ዮሃንስ#13:5 ዮሃንሳ፦ ሀራ ሱንይ ማር. 12:12፣ 25 ጼልተ። ኡንቱንቱና ደኤ።

6ኡንቱንቱ ቆጲሮሳ ሃን ዶደቴዳ ሳኣ ኡባ ጳፉ ጋካናዉ ዩዪደ፥ ናብያ እት ዎርዳንቻ፥ አይሁዳ አሳ ባር-የሱሳ ግያ ሻሬቹዋ ደሜድኖ። 7ሄ ሻሬቹ ጋድያ ሞድያ ሳርግዮሳ ጳዉሎሳ ግያ አኬካንቻ ብታንያና ደኤ። ሳርግዮሳ ጳዉሎሳ ባርናባሳነ ሳኦላ ባረኮ ጼሲደ፥ ጾሳ ቃላ ስሳናዉ ኮዬዳ። 8ሽን ሻሬቹዋ ኤልማስ (ግሪከ ቃላን ሄዌ አ ሱን) ጋድያ ሞድያዋ አማኑዋ ድጋናዉ ኮዪደ፥ ኡንቱንቱ ሃሳያ ጳልቄዳ።

9ሽን ጳዉሎሳ ግያ ሳኦል ባረናን ጌሻ አያናይ ኩምና፥ ሻሬቹዋ ጫድ ጼሊደ፥ 10አ፥ “ላ ሀ ጻላህያ ካፑዋ ናአዉ፥ ገነተይ ኡባይነ ኢታተይ ኡባይ ኩሜዳዎ፥ ጽሎተ ኡባ ሞርከዉ፥ ጎዳ ኦግያ ሱርያ ጌላይያዋ አግኪ? 11በአ፤ ሀእ ጎዳ ኩሺ ነ ቦላ ደኤ፤ ኔን ቆቃ ግዳና፤ አማሬዳ ዎዲ ጋካናዉ፥ አዋ ፖኡዋ በአካ” ያጌዳ።

ሄ ማንእያን ሻኖቻይነ ማይ አ አይፍያ ጎዝና፥ ባረ ኩሽያ ኦይቂደ፥ ካለያ ኡራ ኮዪደ ዩዬዳ። 12ሄ ዎደ ጋድያ ሞድያዌ ሄዋ በኤዳ ዎደ፥ ጎዳይ ታማርስያዋን ማላለቲደ አማኔዳ።

ባርናባስነ ጳዉሎስ ጲሲድያን ደእያ አንጾክያ ቤድኖ

13ጳዉሎስነ አናና ደእያዋንቱ ጳፉፐ ደንዲደ፥ ጵንፍልያን ደእያ ጰርገ ዎንግርያን ቤድኖ፤ ዮሃንስ ኡንቱንቱፐ ሻከት፥ የሩሳላመ ስሜዳ። 14ሽን ኡንቱንቱ ጰርገፐ አደ፥ ጲሲድያን ደእያ አንጾክያ ጋኬድኖ፤ ሳምባታ ጋላሳን አይሁዳ ዎሳ ጎለ ገሊደ ኡቴድኖ። 15ሙሴ ህጊነ ናባቱዋ ማጻፋይ ናባበቴዳዋፐ ጉይያን፥ አይሁዳ ዎሳ ጎለ ካፓቱ፥ “ኑ እሻቶ አሳ ምንስያ ቃላይ ህንተንቶ ደኦፐ፥ አሳዉ ሃሳዬርክቴ” ያጊደ ኡንቱንቶ ኪቴድኖ።

16ጳዉሎስ ደንድ ኤቂደ፥ ባረ ኩሽያን ጾርሲደ፥ ሀዋዳን ያጌዳ፤ “እስራኤልያ አሳቶ፥ ጾሳዉ ያይያዋንቶ ስስተ። 17ሀ እስራኤልያ አሳ ጾሳይ ኑ አዎቱዋ ዶሪደ፥ ግብጼ ጋድያን እማተን ኡንቱንቱ ደእሽን፥ ኡንቱንታ ጮርሴዳ፤ ባረ ዎልቃማ ዎልቃንካ ግብጼ ጋድያፐ ኡንቱንታ ከሴዳ።#ከሳ 1:7፤ 12:51 18ባዙዋን ኦይታሙ ላይ ኬና ኑ አዎቱዋ እ ዳንዳዬዳ።#ፓይ. 14:34፤ ዛረ. 1:31 19ካናነ ግያ ጋድያን አይሁዳ ግደና ላፑ ካዉተ ይሲደ፥ ኡንቱንቱ ጋድያ ባረ አሳ ላትሴዳ።#ዛረ. 7:1፤ ኢያሳ 14:1 20ሄዋፐ ጉይያን፥ ናብያ ሳሜላ ዎድያ ጋካናዉ፥ ኦይዱ ጼታነ እሻታሙ ላይ ኬና ዳናቱዋ ኡንቱንቶ እሜዳ።#ዳኔላ 2:16፤ 1 ሳሜላ 3:20 21ሄዋፐ ጉይያን፥ ኡንቱንቱ ባረንቶ ካትያ እማና ማላ ዎስና፥ ጾሳይ ቢንያማ ዛርያፐ ቂሳ ናኣ ሳኦላ ኦይታሙ ላይዉ ካተታና ማላ፥ ኡንቱንቶ እሜዳ።#1 ሳሜላ 8:5፤ 10:21 22ጾሳይ ሳኦላ ሻሬዳዋፐ ጉይያን፥ ኡንቱንቱ ቦላ ዳዊተ ካተታና ማላ፥ አ ደንዳ፤ ዳዊተባ ማርካቲደ፥ ‘ታን ኮይያ ኡባባ ታ ዎዛናዳን ኦያ እሰይ ናኣ ዳዊታ ደማድ’ ያጌዳ።#1 ሳሜላ 13:14፤ 16:12፤ ማዝ. 89:20

23“ጾሳይ፥ ‘ታን ዳዊታ ዛርያፐ እስራኤልያ አሳ አሽያዋ አሀና’ ቃላ ገሌዳዋዳንካ፥ የሱሳ አሄዳ። 24የሱስ ያናፐ ካሰ እስራኤልያ አሳይ ኡባይ ባረንቱ ናጋራፐ ስሚደ ጻማቀታና ማላ፥ ዮሃንስ ቃላ ኦዴዳ።#ማር. 1:4፤ ሉቃሳ 3:3 25ቃይ ዮሃንስ ባረ ኦሱዋ ዉርሳና ሀኒደ አሳ፥ ‘ታና ኦና ጊደ ቆፒቴ? ታን ህንተ ናግያዋ ግድከ፤ ሽን በእተ፥ አ ገድያ ጫማ ቃሹዋካ ገድያፐ ብላናዉ ታዉ በሰናዌ ታፐ ጉየና ዬ’ ያጌዳ።

26“ታናዳን አማንያዋንቶ፥ አብራሃመ ዘረቶ፥ ቃይ ሀዋን አይሁዳ ግደናዋንቶ ጾሳዉ ያይያዋንቶ፥ ሀ አቶተ ቃላይ ኑዉ ኪተቴዳ። 27አያዉ ጎፐ፥ የሩሳላመን ደእያ አሳይነ ኡንቱንቱ ካፓቱ የሱሳነ ሳምባታ ጋላሳ ኡባን ናባበትያ ናባቱዋ ቃላ አኬክቤና ድራዉ፥ አ ቦላ ፕርዲደ፥ ናባቱዋ ቃላ ፖሌድኖ። 28የሱሳ ዎሳናዉ እት ጋሱካ ኡንቱንቶ ቤተናን እጽና፥ ጵላጾስ አ ዎና ማላ ዎሴድኖ።

29“ኡንቱንቱ የሱሳባይ ጾሳ ማጻፋን ጻፈቴዳዋ ኡባ ፖሌዳ ዎደ፥ ማስቃልያፐ አ ዎደ ሞጌድኖ። 30ሽን ጾሳይ ሀይቁዋፐ የሱሳ ደንዳ። 31ሄዋፐ ጉይያን እ ባረናና ጋሊላፐ የሩሳላመ ዬዳ አሳቶ ጮራ ጋላሳ ቤቴዳ ኡንቱንቱ ሀእ አባ አሳዉ ማርካቲኖ።

32“ጾሳይ ኑ አዋቶ እማና ጌዳ ዎንጋላ ምሽራቹዋ ኑን ህንተንቶ ኦዴቶ። 33ዳዊተ ማዝሙርያ ማጻፋን ላኤን ሸምፑዋን፥

“ ‘ኔን ታ ናኣ።

ሀቼ ታን ነ አዉዋ ግዳድ’

ጌተቲደ ጻፈቴዳዋዳን፥ ጾሳይ የሱሳ ደንደ፥ ኑ አዋቶ እማና ጌዳዋ ኑዉ ኡንቱንቱ ናናዉ ፖሌዳ።#ማዝ. 2:7 34ላኤንዋ እ ሀይቀና ማላ፥ ሀይቁዋፐ አ ደንዳዎ ጾሳይ፥ ‘ታን ዳዊተዉ እማና ጌዳ አማነቴዳ ጌሻ አንጁዋ ህንተንቶ እማና’ ያጊደ ሃሳዬዳ። 35ሄዋ ድራዉ፥ ማዝሙርያ ማጻፋን ሀራሳን ቃይ፥ ‘ነ ጌሻ ናኣ አሃካ ሙስሳካ’ ያጌዳ።#ማዝ. 16:10 36አያዉ ጎፐ፥ ዳዊተ ባረ ዎድያን ጾሳ ቆፋ ኦዳዋፐ ጉይያን ሀይቂደ፥ ባረ አዎቱዋና ሀይቂ ሙሴዳ። 37ሽን ጾሳይ ሀይቁዋፐ ደንዳዌ ሙስቤና።

38-39“ሄዋ ድራዉ፥ ታናዳን አማንያዋንቶ፥ ናጋራ አቶ ጌተቴዳዌ ህንተንቶ የሱሳ ባጋና ኦደቴዳዌነ፥ ሙሴ ህግያን ጽላናዉ ህንተንቶ ዳንዳየተና ኡባባፐ አን አማንያ ኡባይ ጽላናዌ ህንተንቶ ኤረቶ። 40ሄዋ ድራዉ፥ ናባቱ ጌዳዌ ህንተ ቦላ ጋከና ማላ ናገትተ፤

41“ ‘ጾሳይ ጌዳባ ቅሊጭያዋንቶ፥#እምባ. 1:5

በእተ፤ ሀራይ አቶ እት ኡራይ ህንተንቶ ኦድንቶካ፥

ህንተ አማነና ኦሱዋ ታን ህንተንቱ ዎድያን፥

ኦያ ድራዉ፥ ፖራ ጊተ፤ ሀይቂተ’

ጌድኖ” ያጌዳ።

42ጳዉሎስነ ባርናባስ አይሁዳ ዎሳ ጎልያፐ ከስሽን፥ አሳይ ኡንቱንታ ላኤንዋ ሳምባታንካ ሄዋ ጉጂደ ኦዳና ማላ ዎሴድኖ። 43ሺቁ ላለቴዳዋፐ ጉይያን፥ ጮራ አይሁዳቱነ አይሁዳቱዋ አማኑዋን ገሊደ ጾሳዉ ያይያ ጮራቱ፥ ጳዉሎሳነ ባርናባሳ ካሌድኖ፤ የሱስ ኪቴዳዋንቱ ጾሳ አ ኬካተን ምን ደአና ማላ፥ ኡንቱንቶ ኦዲደ ምንሴድኖ።

44ላኤንዋ ሳምባታን አማሬዳ አሳቱዋፐ አትን፥ ካታማ አሳይ ኡባይ ጾሳ ቃላ ስሳናዉ ሺቄዳ። 45ሽን አይሁዳቱ ጮራ አሳ በኤዳ ዎደ፥ ጳዉሎሳ ቃናቴድኖ፤ አ ሃሳያ ጳልቂደ፥ አ ቦሬድኖ።

46ጳዉሎስነ ባርናባስ ጻሊደ፥ “ጾሳ ቃላይ ካሰቲደ ህንተንቶ ኦደታናዉ ኮሼ፤ ሽን ቃላ ህንተ እጼዳ ድራዉነ መና ደኡዋ አካናዉ ህንተንቶ በሰና ጊደ፥ ህንተ ህንተንቱ ሁጲያን ፕርዴዳ ድራዉ፥ በእተ፥ ኑን አይሁዳ ግደናዋንቱኮ ስሜቶ። 47አያዉ ጎፐ፥ ጎዳይ ኑና፥#ኢሳ. 42:6፤ 49:6

“ ‘አሳይ ኡባይ ህንተ ባጋና አታና ማላ፥

ህንተንታ ታን፥

አይሁዳ ግደናዋንቶ ፖኡዋ ኦድ’ ያግ አዛዜዳ”

ያጌድኖ።

48አይሁዳ ግደናዋንቱ ሄዋ ስሴዳ ዎደ፥ ናሸቲደ ጾሳ ቃላ ቦንቼድኖ፤ ቃይ መና ደኦ ዶረቴዳ ኡባይ አማኔድኖ።

49ጎዳ ቃላይ ሄ ጋድያ ኡባ ጋኬዳ። 50ሽን አይሁዳቱ ጾሳዉ ጎይንያ ቦንቼቴዳ ማጫዋንታነ ካታማን ደእያ ዎልቃማ አሳቱዋ ጳዉሎሳ ቦላንነ ባርናባሳ ቦላ ደንና፥ አሳቱ ኡንቱንታ የደርሱዋ ዶሚደ፥ ባረንቱ ጋድያፐ ከሴድኖ። 51ሽን የሱስ ኪቴዳዋንቱ ኡንቱንታ እጽያዋንቶ ማላታ ግዳና ማላ፥ ባረንቱ ገድያፐ ባና ሾጪደ፥#13:51 ባረንቱ ገድያፐ ባና ሾጪደ፦ ሀዌ አሳይ አከናን እጾዋ በስያ ኦግያ። እቆንዮነ ካታማ ቤድኖ። 52ቃይ አንጾክያን ደእያ ካልያዋንቱንካ ጌሻ አያናይነ ናሸቻይ ኩሜዳ።

Currently Selected:

ኪታ 13: DFBE

Highlight

Compare

Copy