ኪታ 14

ጳዉሎስነ ባርናባስ እቆንዮነ ቤድኖ

1ካሰዋዳንካ ጳዉሎስነ ባርናባስ እቆንዮነን አይሁዳቱዋ ዎሳ ጎለ ገሊደ፥ ቃላ ኦዴድኖ፤ ሄዋፐ ጉይያን ጮራ አይሁዳቱነ አይሁዳ ግደናዋንቱ አማኔድኖ። 2ሽን አማንቤና አይሁዳቱ አይሁዳ ግደናዋንቱ ዎዛና ላሚደ፥ እሻቱዋ ቦላ ሀንቀድኖ። 3የሱስ ኪቴዳዋንቱ ሄዋን ዳሮ ዎድያ ጋምኤድኖ፤ ኡንቱንቱ ጎዳባ ያየናን ኦዴድኖ፤ ጎዳይ ማላታነ ኦራባ ኡንቱንቱ ኦና ማላ፥ ኡንቱንቶ ዎልቃ እሜዳዋን ባረ አ ኬካተ ቃላባይ ቱማ ግዴዳዋ ማርካቴዳ። 4ሽን ካታማ አሳይ ሻከት፥ ባጋይ አይሁዳቱዋኮ፥ ባጋይ የሱስ ኪቴዳዋንቱኮ ስሜድኖ።

5አይሁዳ ግደናዋንቱነ አይሁዳቱ ባረንቱ ካፓቱዋና እትፐ የሱስ ኪቴዳዋንታ ቆሀናዉነ ሹቻን ጫዳናዉ ቆፔዳ ዎደ፥ 6የሱስ ኪቴዳዋንቱ ሄዋ ኤሪደ፥ ልስጽራነ ደርበ ጌተትያ ልቃኦንያ ካታማቱዋነ ኡንቱንቱ ሄራን ደእያ ጋድያ ብ አጌድኖ፤ 7ሄዋን ዎንጋላ ምሽራቹዋ ኦዲኖ።

8ባረ ዳይ ኡሉዋፐ የለቶደፐ ዶሚደ፥ ላኡ ገዲ ስልና፥ ኡባካ ሀመተና እት ብታኒ ልስጽራን ደኤ። 9ሄ ብታኒ ጳዉሎስ ኦድሽን ስሴ፤ ጳዉሎስ አ ጫድ ጼልያ ዎደ፥ ፓጻናዉ አዉ አማኑ ደእያዋ በኢደ፥ 10ኮሻ ቂሲደ አ፥ “ስት ጋደ ነ ገድያን ኤቃ” ያጌዳ፤ ጉፕ ደንዲደ፥ ሀመታ ዶሜዳ።

11ጳዉሎስ ኦዳዋ አሳይ በኢደ፥ ባረ ኮሻ ልቃኦንያ ቃላን ቁ ኦደ፥ “ጾሳቱ አሳ ማላቲደ ኑኮ ዎድኖ” ያጌዳ። 12አሳይ ባርናባሳ፥ “ድያ”#14:12 ድያ፦ ጉሳይ ግሪካቱዋ ጾሳቱዋ ኡባቱዋፐ ቦላ ጌተት ፓይደትያ ኡንቱንቱ ኤቃ። ጊደ፥ ጳዉሎስ ሃሳያዉ ዋናትያ ድራዉ፥ አ፥ “ሄርሜሳ” ጊደ ሱንዳ። 13ጌሻ ጎሊ ካታማ ማታን ደእያ ድያ ቄሳይነ አሳይ ኮሩማቱዋነ ዳሪ ሎእያ ጪሻቱዋ የሱስ ኪቴዳዋንቶ ያርሹዋ ያርሻናዉ ኮዪደ፥ ፐንግያ አሄድኖ።

14ሽን የሱስ ኪቴዳ ባርናባስነ ጳዉሎስ ሄዋ ስሴዳ ዎደ ባረንቱ ማዩዋ ፔደ፥ አሳ ግዶ ዎጺደ፥ 15ባረንቱ ኮሻ ቁ ኦደ፥ ሀዋዳን ያጌድኖ፤ “አሳዉ፥ ሀዋ አያዉ ኦቴ? ኑንካ ህንተንቱዋዳን መቴዳ አሳ፤ ሀ ፓና የዉዋፐ ሳሉዋነ ሳኣ፥ አባነ ኡንቱንቱ ግዶን ደእያ ኡባባ መዳ ደኡዋ ጾሳኮ ህንተ ስማና ማላ፥ ህንተንቶ ኑን ዎንጋላ ምሽራቹዋ ኦዴቶ።#ከሳ 20:11፤ ማዝ. 146:6 16እ በን አሳ ዘረይ ኡባይ ባረንቱ ኦግያ ባና ማላ የድ አጌዳ። 17ህንተንቶ እራ ሳሉዋፐ ቡክሴዳ፤ ካካ እ ዎድያን እሜዳ፤ ቃይ ቁማ እሚደ፥ ህንተንታ ሎይ ናሸቼ፤ ያቲደ ህንተንቶ ሎኦባ ኦደ፥ ኡባ ዎደካ ባረዉ ማርካ ይቤና” ያጌድኖ። 18የሱስ ኪቴዳዋንቱ ሄዋ ጊደ፥ ባረንቶ አሳይ ያርሸና ማላ፥ መቶቲደ ድጌድኖ።

19አንጾክያፐነ እቆንዮነፐ ዬዳ አይሁዳቱ አሳ ባረንቱ ባጋ ዛሪደ፥ ሹቻን ጳዉሎሳ ጫዴድኖ፤ ኡንቱንቶ ሀይቄዳዋ ማላትና፥ ካታማፐ ካረዉ አ ጎች ከሴድኖ። 20ሽን ካልያዋንቱ አ ማታን ዩይ አደ ኤቂሽን፥ እ ደንዲደ፥ ካታማ ገሌዳ። ዎንተ ጋላስ ባርናባሳና እትፐ ደርበ ቤዳ።

ጳዉሎስነ ባርናባስ አንጾክያ ስሜድኖ

21-22ኡንቱንቱ ደርበ ካታማን ዎንጋላ ምሽራቹዋ ኦዲደ፥ ጮራ አሳይ የሱሳ አማናና ማላ ኦዳዋፐ ጉይያን፥ ልስጽራ፥ እቆንዮነነ ጲሲድያን ደእያ አንጾክያ ስሜድኖ፤ ያቲደ ሄዋን ካልያዋንታ ምንሲደነ ኡንቱንቱ አማኑዋን ምን ደአና ማላ ዞሪደ፥ “ኑን ጾሳ ካዉተ ገላናዉ ሎይ ዋየታና በሴ” ያጌድኖ። 23ቃይ አማንያዋንቶ ደእያ ሳን ደእያ ሳን ጭማቱዋ ዶሪደ፥ ጾሜዳዋፐነ ዎሴዳዋፐ ጉይያን፥ ኡንቱንቱ አማኔዳ ጎዳዉ ኡንቱንታ ሀዳራ እሜድኖ።

24ጲሲድያ ጋድያፐ አደ፥ ጵንፍልያ ዬድኖ፤ 25ጰርገን ቃላ ኦዴዳዋፐ ጉይያን፥ አጻልያ ቤድኖ። 26ሄዋፐ ኡንቱንቱ ባረንቱ ፖሌዳ ኦሱዋ ድራዉ፥ አሳይ ኡንቱንቱ ሀዳራ ጾሳ አ ኬካተዉ እሜዳ አንጾክያ ማርካብያን ስሜድኖ።

27አንጾክያ ጋኬዳ ዎደ አማንያ አሳ ሺሺደ፥ ጾሳይ ባረንቱና እትፐ ኦዳ ኡባባነ፥ አይሁዳ ግደና አሳይ አማናና ማላ፥ ኡንቱንቶ ፐንግያ ዶዬዳዋ፥ አሳዉ ኦዴድኖ። 28ያቲደ ሄዋን ካልያዋንቱና ዳሮ ዎድያ ጋምኤድኖ።

Currently Selected:

ኪታ 14: DFBE

Highlight

Compare

Copy