2 ሳሜላ 18
18
አበሴሎም ጾነቲደ ሀይቄዳ
1ዳዊተ ባረ አሳቱዋ ኡባ እትፐ ሺሺደ ሻላቃቱዋነ ጼቱዋ ካፓቱዋ ኡንቱንቱ ቦላ ሱንዳ። 2ዳዊተ አሳ ሄዙ ጩጉዋን ሻኬዳ፤ እት ጩጉዋ እዮኣበ አዛዜዳ፤ ላኤን ጩጉዋ እዮኣባ እሻይ፥ ጻሩይ ናአይ አብሻይ አዛዜዳ፤ ሄዘን ጩጉዋ ቃይ ጋትያ እታይ አዛዜዳ። ካቲ አሳ፥ “ታን ታ ሁጲያዉካ ህንተናና እትፐ ባና” ያጌዳ።
3ሽን አሳይ አ፥ “ኔን ባናዉ በሰና! ኑን ባቃትንቶነ፥ ኡንቱንቱ ኑባ ኮይክኖ፤ ሀራይ አቶ ኑን ባጋይ ሀይቂንቶነ፥ ኑባ ኡንቱንቱ ጉዳ ጊክኖ። ሽን ኔን ኑፐ ታሙ ሻአቱዋፐ ዳራሳ፤ ሄዋ ድራዉ፥ ኔን ካታማን ኡታደ፥ ኑዉ ማዱዋ ኪቶፐ ሎአ” ያጌዳ።
4ካቲ ኡንቱንታ፥ “ህንተና ሎኤዳባ ታን ኦና” ያጌዳ።
ዳዊተ ድርሳ ፐንግያን ኤቂደእሽን፥ አሳይ ኡባይ ጼቱ ጼቱ፥ ሻአይ ሻአይ ባረ ጩጉዋን ጩጉዋን ሳልፒደ ከሴዳ። 5ያትና፥ ካቲ እዮኣባ አብሻያነ እታያ፥ “ታ ድራዉ ጊደ፥ ሄ ያላጋ ብታንያ አበሰሎማ ቆሆፕተ” ያጊደ አዛዜዳ። ካቲ አበሰሎማባ ጋዳዋቱ ኡባዉ ኦድያ ዎደ፥ ኦላንቻቱ ኡባይ ስሴድኖ።
6ዳዊታ ኦላንቻቱ እስራኤላቱዋና ኦለታናዉ ጋጻርያን ሳልፔድኖ፤ ኦላ ሳአይ ኤፍሬማ ዎራና። 7ሄ ሳኣን ዳዊታ ኦላንቻቱ እስራኤልያ ኦላንቻቱዋ ጾኔድኖ፤ ሄ ጋላስ ሎይ ዳሮ አሳይ፥ ላታሙ ሻአ አሳይ ሀይቄዳ። 8ኦላይ ጋጻርያ ኡባ ጋኬዳ፤ ሄ ጋላስ ዎራይ ዉርሴዳ አሳይ ማሻይ ዉርሴዳ አሳፐ ዳራ።
9አበሴሎም አኬከናን ደኢደ ዳዊታ አሳቱዋና ጋከቴዳ፤ አበሴሎም ባረ ባቁሉዋ ቶጊደ፥ ዳሮ ዳሻይ ደእያ ዎላ ጋርሳ ባቁሉ ገሌዳ፤ አበሰሎማ ሁጲ ዎላ ባላን ኦይቀቴዳ። አበሴሎም ሳኣፐነ ሳሉዋፐ ግዱዋን ካቀት ደእሽን፥ እ ቶጌዳ ባቁሉ ስንዉ ብ አጌዳ። 10አሳፐ እቱ ሄዋ በኢደ እዮኣባ፥ “በአ! አበሴሎም እት ዎላ ቦላ ካቀቴዳዋ ታን በኣድ” ያጊደ ኦዴዳ።
11እዮኣበ ባረዉ ኦዴዳ ብታንያ፥ “ሄ? በኣድ ጋይ? አያዉ ቢታዉ ዱገ ሾጫበይኪ? ኔን ሾጬዳዋ ግድንቶ፥ ታን ነዉ ታሙ ጻጋራ ብራነ እት ሳቂያ እማናዋ ሽን” ያጌዳ።
12ብታኒ፥ “ኔን ሻአ ጻጋራ ብራ ታ ኩሽያን ዎንቶካ፥ ታን ካትያ ናኣ ቦላ ታ ኩሽያ ደንከ! ኑን ኡባይ ስስሽን፥ ካቲ ኔናነ አብሻያ እታያ፥ ‘ታ ድራዉ ጊደ፥ ያላጋ ብታንያ አበሰሎማ አሽተ’ ያጊደ አዛዜዳ። 13ታን ካትያ አዛዙዋ ሻራደ አበሰሎማ ዎዳዋ ግድንቶ፥ ካቲ ኡባባ ስስያዋዳን ሄዋካ ስሳናዌ አተና። ኔን ሄ ዎደ ታፐ ሃኩዋን ኤቃና” ያጌዳ።
14እዮኣበ አ፥ “ታን ኔናና ሀዋዳን ጋምእከ” ያጌዳ፤ ሄዙ ቶራ ባረ ኩሽያን አኪደ፥ አበሴሎም ዎላን ካቀቲደ ፓጻ ደእያዋ ዎዛና አይፍያን ጫዴዳ። 15እዮኣባ ኦላ ሚሻ ቶክያ ታማቱ አበሰሎማ ዶዲደ፥ ሾጭ ዎድኖ።
16ሄዋፐ ጉይያን፥ እዮኣበ ኦላ ኤሳናዉ ማላካታ ፑኔዳ፤ አሳይ እስራኤላቱዋ የደርስያዋ አጌዳ። 17ኡንቱንቱ አበሰሎማ አክ አፊደ፥ ዎራን ደእያ ዎልቃማ ኦላ ግዶን የጊደ፥ ዳሮ ሹቻ አ ቦላ ዶሬድኖ። ሄ ዎደ እስራኤልያ አሳይ ኡባይ ባረ ሶ ባረ ሶ ባቃቴዳ።
18አበሴሎም ፓጻ ደኢደ፥ “ታ ሱን ሀሳይስያ ናእ ታዉ ባዋ” ያጊደ፥ ባረና ሀሳይስያ ሹቻ ማሴዳ ቱሳ ካትያ ሀዉልትያ ኤሴዳ፤ ሄ ቱሳ ባረ ሱንን ጼሴዳ። ሀቼ ጋካናዉ፥ ሄ ቱሳይ “አበሰሎማ ቱሳ” ጌተቴ።
ዳዊተ አበሴሎም ሀይቄዳዋ ስሲደ ዬኬዳ
19ሄዋፐ ጉይያን፥ ጻዶቃ ናኣ አህማኣጽ እዮኣባ፥ “አ ሞርከቱዋ ኩሽያፐ መና ጎዳይ አ አሼዳ ምሽራቹዋ ስሳናዉ፥ ታን ካትያኮ ዎጻ ባደ ኦዳይ” ያጌዳ።
20እዮኣበ አህማኣጻ፥ “ቱይት! ሀቼ ኔን ምሽራቹዋ ኦድያ ጋላሳ ግደና፤ ሀራ ጋላስ ኦዳናዉ ዳንዳያሳ። ካትያ ናአይ ሀቼ ሀይቄዳ ድራዉ፥ ኔን ሀቼ ኦዳናዉ ኮሸና” ያጌዳ።
21እዮኣበ ቶጵያ አሳ ግድያ እት ብታንያ ጼሲደ፥ “ባ፤ ኔን በኤዳዋ ካትያዉ ኦዳ” ያጌዳ፤ ሄ ብታኒ እዮኣባዉ ጎይኒደ ዎጼዳ።
22ጻዶቃ ናአይ አህማኣጽ ላኤንዋ እዮኣባ፥ “አይነ ሀኖ፤ ታን ሀ ቶጵያ ብታንያ ጌዱዋ ዎጻይ” ያጌዳ።
እዮኣበ፥ “ታ ናአዉ፥ ነዉ ዎይታ አህያ ኦዱ ባይናሽን፥ ኔን አያዉ ዎጻናዉ ኮያይ?” ያጌዳ።
23አህማኣጽ እዮኣባ፥ “አይነ ሀኖ፤ ታን ዎጻናዉ ኮያድ” ያጌዳ።
እዮኣበ አ፥ “ያኖፐ ዎጻ” ያጌዳ። ሄዋ ድራዉ፥ አህማኣጽ ደምባ ኦግያ ኦይቂደ ዎጼዳ፤ ቶጵያ ብታንያ የጊደ አዳ።
24ግምቢያ ፐንግያዉ ካረ ዶየትያ ሳንቃፐነ ሶ ዶየትያ ሳንቃፐ ግዱዋን አኮ ሳኣን ዳዊተ ኡት ደእሽን፥ ናግያ ብታኒ ግምቢያና ኦይቀቴዳ ፐንግያ ጼራ ሁጲያ ፑደ ከሴዳ፤ ጼሊደ፥ እት ብታኒ ባረካ ዎጽያዋ በኤዳ። 25ናግያ ብታኒ ካትያ ጼሲደ ኦዴዳ።
ካቲ፥ “እ ባረካ ደኦፐ፥ ምሽራቹዋ አኪደ ዬ” ያጌዳ። ዎጽያ ብታኒ ኡንቱንቱኮ ማቲደ ዬዳ።
26ናግያዌ ሀራ አስካ ዎጽያዋ በኤዳ፤ ፐንግያ ናግያ ብታንያ፥ “በአ! ሀራ ብታኒካ ባረካ ዎጼ” ያጌዳ።
ካቲ፥ “ሀ ብታኒካ ቃይ ምሽራቹዋ አኪደ ዬ” ያጌዳ።
27ናግያዌ፥ “ኮይሮ ብታንያ ዎይ ጻዶቃ ናኣ አህማኣጻ ዎ ታዉ ማላቴ” ያጌዳ።
ካቲ፥ “እ ሎኦ አሳ፤ እ ሎኦ ኦዱዋና ዬ” ያጌዳ።
28አህማኣጽ ካትያ ጼሲደ፥ “ኡባባይካ ሎኦ!” ያጌዳ። ካትያ ስንን ግስ ጉፋኒደ፥ “ታ ጎዳ ካትያ ቦላ ባረንቱ ኩሽያ ደንዳ አሳቱዋ ነዉ አደ እሜዳ መና ጎዳይ ነ ጾሳይ ጋላተቶ” ያጌዳ።
29ካቲ፥ “ያላጋ ብታኒ አበሴሎም ሳሬ?” ያጊደ ኦቼዳ።
አህማኣጽ፥ “እዮኣበ ታና ኪታና ሀንያ ዎደ፥ ዎልቃማ ጉሩባይ ደእያዋ በኣድ፤ ሽን እ አዬንቶነ ታን ኤራበይከ” ያጌዳ።
30ካቲ አ፥ “ያ ሺቃ ኤአ” ያጌዳ፤ እ ያቶፐ ሺቂደ ኤቄዳ።
31ሄዋፐ ጉይያን፥ ቶጵያ ብታኒ ጋኪደ ካትያዉ፥ “ታ ጎዳዉ ካትያዉ፥ ምሽራቹዋ! ነ ቦላ ደንዴዳዋንቱ ኡባ ኩሽያፐ መና ጎዳይ ሀቼ ኔና አሼዳ” ያጌዳ።
32ካቲ ቶጵያ ብታንያ፥ “ያላጋ ብታኒ አበሴሎም ሳሬ?” ያጊደ ኦቼዳ።
ቶጵያ ብታኒ ካትያ፥ “ታ ጎዳዉ ካትያዉ፥ ነ ሞርከቱነ ነ ቦላ ኢታባ ኦናዉ ደንድያዋንቱ ኡባቱ ሄ ያላጋ ብታንያዳን ሀንኖ” ያጌዳ።
33ካቲ ዳሮፐ ካዮቴዳ፤ ግምቢያ ፐንግያ ሁጲያን ደእያ ጎልያ ገሊደ ዬኬዳ፤ ካቲ ቢደ፥ “አየ ታ ናአዉ አበሰሎማ! ታ ናአዉ! ታ ናአዉ አበሰሎማ! ነ ድራዉ ታን ሀይቃርክታሻ! አየ ታ ናአዉ አበሰሎማ! ታ ናአዉ!” ያጊደ ዬኬዳ።
Currently Selected:
2 ሳሜላ 18: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
