2 ሳሜላ 19
19
1“አበሰሎማዉ ካቲ ዬኬነ ዝላሌ” ያጊደ እዮኣባዉ ኦዴድኖ። 2ኦላንቻቱ ኡባይ፥ “ካቲ ባረ ናአዉ ዬኬ” ግያዋ ስሴዳ ድራዉ፥ ሄ ጋላስ ኡንቱንቱ ኡባይ ጾኔዳ ጾኑ ዬኮ ላመቴዳ። 3ኦላፐ ባቃቲደ ዬላቴዳ ኦላንቻቱዋዳን፥ አሳይ ሄ ጋላስ ዉኤቲደ ካታማ ገሌዳ። 4ካቲ ባረ ዴሙዋ ጉሎቴዳ፥ ባረ ቃላ ቂሲደ፥ “አየ ታ ናአዉ አበሰሎማ! አየ አበሰሎማ ታ ናአዉ! ታ ናአዉ!” ያጊደ ዝላሌዳ።
5ሄዋፐ ጉይያን፥ እዮኣበ ሄ ጎልያ ቢደ ካትያ፥ “ነ ሸምፑዋ፥ ነ አቱማ ናናቱዋን ነ ማጫ ናናቱዋ ሸምፑዋ፥ ነ ማቼቻቱዋነ ነ ባኮቱዋ ሸምፑዋ ሀቼ አሼዳ ነ አሳ ኡባ ኔን ሀቼ ካዉሻዳ። 6ኔና እጽያዋንታ ኔን ሲቃሳ፤ ኔና ሲቅያዋንታ ኔን እጻሳ። ነ ኦላንቻቱነ ኡንቱንቱ ካፓቱ ነዉ አያነ ግደናዋ ኔን ሀቼ ቆንጭሳዳ። ኑን ኡባይ ሀይቂና፥ አበሴሎም ሀቼ ፓጻ አቴደንቶ፥ ኔን ናሸታናዋ ታን በኣድ። 7ሀእ ደንዳ! ካረ ከሳደ ነ አሳ ምን። መና ጎዳይ ኤሮ! ኔን ከሳና ዮፐ፥ ሀቼ ቃማ ኔናና እት አሳይነ አተና። ነ ያላጋተፐ ሀቼ ጋካናዉ፥ ኔና ጋኬዳ ኢታ ኡባፐ ሀዌ ነዉ አያ ኢታ ግዳና” ያጌዳ።
8ካቲ ደንዲደ ግምቢያ ፐንግያን ኡቴዳ። “ካቲ ፐንግያን ኡቴዳ” ግያዋ አሳቱ ኡባይ ስሴዳ ዎደ፥ ካትያ ስን ዬድኖ።
ዳዊተ የሩሳላመ ስሜዳ
ሄ ዎደ እስራኤልያ አሳቱ ኡባይ ባረንቱ ሶ ባረንቱ ሶ ባቃቴድኖ። 9እስራኤልያ ዛራቱ ኡባይ እቱ እቱዋና ሀዋዳን ያጊደ ፓሉመቲኖ፤ “ካቲ ዳዊተ ኑና ኑ ሞርከቱዋ ኩሽያፐ አሼዳ፤ ኑና ፕልስጼማ አሳቱዋ ኩሽያፐ ዎ አኬዳ፤ ሽን እ ሀእ አበሰሎማ ጋሱዋን ቢታ አጊደ ባቃቴዳ። 10ኑ ቦላ ካተታናዳን ኑን ኦኬዳ አበሴሎም ኦላን ሀይቂክቼዳ። ያትና፥ ካትያ ጉየ አሀናዉ ህንተንቱ አያዉ ጮኡ ጌድቴ?” ያጌድኖ።
11ካቲ ዳዊተ ቄሳቶ ጻዶቃዉነ አብያታራዉ ኪታ የዲደ፥ “ይሁዳ ጭማቱዋ ሀዋዳን ያግተ፤ ‘ዳዊተ ሀዋዳን ያጌ፤ “እስራኤልያ አሳይ ኡባይ ሃሳይያዌ ካትያ ጋኬዳ። ካትያ አ ጎልያ ዛር አሀናዉ ህንተንቱ አያዉ ሀራቱዋፐ ጉየ አቲቴ? 12ህንተንቱ ታ እሻቱዋ፤ ህንተንቱ ታ አሾነ ታ ሱ። ያትና፥ ካትያ ጉየ ዛር አሀናዉ ህንተንቱ አያዉ ሀራቱዋፐ ጉየ አቲቴ?” ያጌ’ ያግተ። 13ቃይ አማሳዮዉካ፥ ‘ዳዊተ ኔና፥ “ኔን ታ አሾነ ታ ሱ ግድኪ? ሀችፐ ዶምና፥ ታን ኔና እዮኣባ ሳኣን ታ ኦላንቻቶ ጋዳዋ ከሳና ዮፐ፥ ጾሳይ ታና ዎ!” ያጌ’ ያግተ” ያጌዳ።
14ካትያ ሃሳያይ ይሁዳ አሳቱዋ ኡባ ዎዛና እቱዋ ኦደ ማይዜዳ። ሄዋ ድራዉ፥ ኡንቱንቱ ካትያኮ ኪቲደ፥ “ኔንካ ነ አሳይ ኡባይካ ሃ ስምተ” ያጌድኖ። 15ካቲ ስሚደ፥ ዮርዳኖሳ ሻፋ ጋካናዉ ዬዳ። ይሁዳ አሳቱ ካትያ ሞካናዉነ ዮርዳኖሳ ሻፋ ፕንናዉ፥ ገልጋላ ግያ ሳኣ ዬድኖ።
16ባሁሪማ ካታማፐ ዬዳ ቢንያማ ዛሪ፥ ጌራ ናአይ ሽምእ ዳዊታ ሞካናዉ ኤሌሊደ፥ ይሁዳ አሳቱዋና ቤዳ።#2 ሳሜላ 16:5-13 17አናና ቢንያማ ዛረ ግዴዳ ሻአ አሳቱ፥ ሳኦላ ሶ ቆማይ ጺብ፥ አ ናናይ ታማነ እቼሻቱነ አ ቆማቱ ላታማቱ ደኢኖ። ኡንቱንቱ ካቲ ደእያ ሳኣ ዮርዳኖሳ ሻፋ ጃሚደ ቤድኖ። 18ካትያ ሶ አሳ ፕንናዉነ ካትያ ናሸችያዋ ኦናዉ ፕኑዋና ፕኒደ ቤድኖ።
ጌራ ናአይ ሽምእ ዮርዳኖሳ ሻፋ ፕኔዳ ዎደ፥ ካትያ ስንን ጉፋኒደ፥ 19ሀዋዳን ያጌዳ፤ “ታ ባይዙዋ ካቲ አቶ ጎ። ታ ጎዳይ ካቲ የሩሳላመፐ ከስያ ጋላስ ታን ነ ቆማይ ባሌዳ ባላ ኔን ሀሳዮፓ። ሄዋ ነ ኡሉዋን ኦይቆፓ። 20አያዉ ጎፐ፥ ነ ቆማይ ታን ናጋራ ኦዳዋ ኤራይ፤ ሽን ኔና ታ ጎዳ ካትያ ሞካናዉ፥ ዮሴፎ ሶ አሳ ኡባፐ ኮይሮታደ ታን ሀቼ ያድ” ያጌዳ።
21ሄዋፐ ጉይያን፥ ጻሩይ ናአይ አብሻይ፥ “ሽምእ መና ጎዳይ ኦኬዳ ካትያ ሸቄዳ ድራዉ፥ እ ሀይቃናዉ በሰኔየ?” ያጌዳ።
22ዳዊተ አብሻያ፥ “ህንተንቶ፥ ጻሩይ ናቶ፥ ህንተንታ ጋያዌ አዬ? ህንተንቱ ሀቼ ታዉ ሞርከ ግዲቴ! ሀቼ እስራኤላን አይ አሳይነ ሀይቀና! ሀቼ እስራኤልያ ካቲ ታናቴ!” ያጌዳ።
23ካቲ ሽምአ፥ “ኔን ሀይቃካ” ያጊደ አዉ ጫቄዳ።
24ቃይ ሳኦላ ናአይ ማንፍቦሼተ ካትያ ሞካናዉ ዱገ ዎዳ። ካቲ ቤዳ ጋላሳፐ ዶሚደ፥ እ ሳሮተን ጉየ ስምያ ጋላስ ጋካናዉካ፥ ማንፍቦሼተ ባረ ገድያ ሜጭቤና፤ ባረ ቡቻ ሜድቤና፤ ቃይ ባረ ማዩዋካ ሜጭቤና።#2 ሳሜላ 9:1-13፤ 16:1-14 25ማንፍቦሼተ ካትያና ጋከታናዉ የሩሳላመፐ ዬዳ ዎደ፥ ካቲ አ፥ “ማንፍቦሼታ፥ ኔን ታናና አያዉ ባበይኪ?” ያጊደ ኦቼዳ።
26እ፥ “ታ ጎዳዉ ካትያዉ፥ ታን ነ ቆማይ ስላ ግድያ ድራዉ፥ ‘ታን ቶጋደ ካትያና ባናዳን ታ ሀርያ ኮራ’ ያጋድ። ሽን ታ ቆማይ ጺብ ታና ጭሜዳ፤ 27ታና ነ ቆማ ታ ጎዳዉ ካትያዉ ዝግሬዳ። ኔን ታ ጎዳይ ካቲ ጾሳ ኪታንቻ ማላ፤ ሄዋ ድራዉ፥ ኔና ናሸችያዋ ኪተታ። 28ታ አዉዋ አዉዋ አሳይ ኡባይ ሀራባ ግደናን፥ ታ ጎዳይ ካቲ በን ዎናዉ በስያ አሳ፤ ሽን ታን ነ ቆማይ ነ ማዳፐ ምያዋንቱና ማናዳን ኔን ታዉ ሳኣ እማዳ። ያትና፥ ታን ሀዋፐ አያዋ ካትያ ኦቻናዉ ታዉ አይባ ማታይ ደኢ?” ያጌዳ።
29ካቲ አ፥ “ኔን ዳሮባ ሃሳያናዉ ኮሸና። ኔንነ ጺብ ጋድያ ሻክ አካና ማላ ታን አዛዛይ” ያጌዳ። 30ማንፍቦሼተ ካትያ፥ “ታ ጎዳይ ካቲ ሳሮ ሶ ስማፐ አትና፥ ኡባባካ ጺብ አኮ” ያጌዳ።
31ጋላኣድያ ባርዝላይ ካትያና እትፐ ዮርዳኖሳ ሻፋ ፕናናዉነ ያፐ አ ሞይዛናዉ ሮጋሊማ ግያ ሳፐ ዬዳ።#2 ሳሜላ 17:27-29 32ባርዝላይ ላይይ ሆስፑን ታሙዋ ግዴዳ ጭማ አሳ። እ ዳሮ ዱረ አሳ ግድያ ድራዉ፥ ካቲ ማህናይማ ካታማን ደእያ ዎደ፥ ካትያዉ ኮሽያዋ እሜዳ። 33ካቲ ባርዝላያ፥ “ኔን ታናና የሩሳላመ ደንዳ፤ ታን ኔው ያን ኮሽያዋ እማና” ያጌዳ።
34ሽን ባርዝላይ ካትያ፥ “ታን ሀዋፐ ስንን ዳሮ ላይ ደእከ፤ ያትና፥ ታን ካትያና የሩሳላመ አያዉ ቦ? 35ታን ሀእ ሆስፑን ታሙ ላይ አሳ፤ ታን ሀእ ኢታነ ሎኡዋ ሻካደ ኤራናዉ ዳንዳያይታ? ታን ነ ቆማይ ታ ምያዋነ ኡሽያዋ ማልኡዋ ሻካደ ኤራናዉ ዳንዳያይታ? አቱማዋንቱነ ማጫዋንቱ የጽያ የ ታን ስሳናዉ ዳንዳያይታ? ያትና፥ ታን ነ ቆማይ ታ ጎዳዉ ካትያዉ አያዉ ጉጃ ቶኮ ግዶ? 36ታን ነ ቆማይ ዮርዳኖሳ ሻፋ ፕናደ ኔና ላፋ ሞይዛና። ሽን ካቲ ታዉ ሄዋዳን ኩሸ ዛራናዉ አያዉ ኮሺ? 37ታን ታ አዉዋነ ታ ዳይ ዱፉዋ ማታን ታ ካታማን ሀይቃና ማላ ስማይ። ታ ናአይ ክምሃም ሀዌሽ፤ ታ ጎዳና ካትያና እትፐ እ ቦ፤ ኔና ናሸችያዋ ኔን አዉ ኪተታ” ያጌዳ።
38ካቲ፥ “ክምሃም ታናና ፕኖ፤ ኔና ናሸችያዋ ታን አዉ ኦና። ቃይ ኔን ታና ኦችያዋ አያነ ታን ነዉ ኦና” ያጌዳ። 39ሄዋፐ ጉይያን፥ አሳይ ኡባይ ዮርዳኖሳ ሻፋ ፕኔዳ፤ ካቲካ ፕኔዳ። ባርዝላያ የሪደ አንጄዳ፤ ያትና፥ ባርዝላይ ባረ ሶ ስሜዳ።
40ካቲ ፕኒደ ገልጋላ ብያ ዎደ፥ ክምሃምካ አናና እትፐ ቤዳ። ይሁዳ ኦላንቻቱ ኡባቱነ እስራኤልያ ኦላንቻቱዋፐ ባጋቱ ካትያና እትፐ ቤድኖ።
41ሄዋፐ ጉይያን፥ እስራኤላቱ ኡባይ ካትያኮ ቢደ፥ “ኑ እሻቱ ይሁዳ አሳቱ ካትያነ አ ሶ አሳ አያዉ ዉኤድኖ? ቃይ አ አሳ ኡባና እትፐ ዮርዳኖሳ ሻፋ አያዉ ፕንድኖ?” ያጌድኖ።
42ይሁዳ አሳቱ ኡባይ እስራኤላቱዋ፥ “ካቲ ኑዉ ማታ ዳቦ ግድያ ድራዉ፥ ኑን ሀዋ ኦዶ፤ ያትና፥ ህንተንቱ ሄዎ አያዉ ሀንቀትተ? ኑን ካትያ ቁማፐ አየንቶ ሜድኖየ? ዎይ ኑን አፐ አየንቶ ኑዉ አኬዶየ?” ያጌድኖ።
43እስራኤልያ አሳቱ ይሁዳ አሳቱዋ፥ “ካትያፐ ታሙ ኩሺ ኑና ጋ፤ ሄዋ ድራዉ፥ ዳዊታ ማታን ኑዉ ህንተፐ አ ማታይ ደኤ! ያትና፥ ህንተንቱ ኑና አያዉ ካድቴ? ኑ ካትያ ጉየ ዛሪደ አሀናዉ ካሰቲደ ሃሳዬዳዌ ኑና ግዶኮ?” ያጌድኖ።
ሽን እስራኤልያ አሳቱዋፐ ይሁዳ አሳቱ ሃሳያ ሎይ ዎልቃንድኖ።
Currently Selected:
2 ሳሜላ 19: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
