2 ሳሜላ 17

1ሄዋፐ ጉይያን አክጾፌል አበሰሎማ፥ “ሀቼ ቃማ ታን ታማነ ላኡ ሻአ አሳቱዋ ዶራደ፥ ዳዊታ የደርሳደ ኦይቃናዉ ከሳይ። 2እ ዳቡርናነ ጻላልና፥ ታን አ ቦላ ከሳና። ታን አ ዳጋንና፤ ሄዋን አናና ደእያ አሳይ ኡባይካ ባቃታና፤ ታን ካትያ ጻላላ ሾጫና። 3ያታደ ታን አሳ ኡባ ኔኮ ዛራና። ኔን እት አሳ ጻላላ ዎናዉ ኮያሳ፤ ሀራ አሳይ ሳሮ አታና” ያጌዳ። 4አክጾፌላ ዞሪ አበሰሎማነ እስራኤልያ ጭማቱዋ ኡባ ናሸቼዳ።

5ሄዋፐ ጉይያን አበሴሎም፥ “አርክያ ሁሻያ ቃይ ጼስተ፤ አነ እ ግያዋ ስሶይተ” ያጌዳ። 6ሁሻይ አኮ ዬዳ ዎደ፥ አበሴሎም አ፥ “አክጾፌል ዞሬዳ ዞሪ ሀዋ፤ ኑን እ ግያዋ ኦናዉ በሲ? በሰናዋ ግዶፐ፥ ነ ቆፋይ አዬ?” ያጌዳ።

7ሁሻይ አበሰሎማ፥ “አክጾፌል ዞሬዳ ዞሪ ሀ ዎድያን ሎአ ግደና። 8ነ አዉነ ነ አዉዋ አሳቱ ምኖ ኦላንቻቱዋ ግድያዋነ ባረ ማራቱዋ ቦንቀቴዳ ማህያ ማላ ያሽያዋንታ ግድያዋ ኔን ኤራሳ። ነ አዉ ኦላዉ ሜዘ አሳ፤ እ ቃማ ባረ ኦላንቻቱዋናካ አቀና። 9በአ፥ እ ሀኖደ ጎንጎሉዋ ግዶን ዎይ ሀራ ሳኣን ቆሰት ኡቴዳ። እ ህንተንቱ ጭታ ቦላ ኮይሮ ደንዶፐ፥ ሄዋ ስሴዳ አሳይ ኦንነ፥ ‘አበሰሎማ ካል ቤዳ አሳቱ ሾጨቴድኖ’ ያጋና። 10ነ አዉ ቶራ ቃራ ግድያዋነ አናና ደእያ አሳቱካ ምኖ ግድያዋ እስራኤልያ አሳይ ኡባይ ኤርያ ድራዉ፥ ሀራይ አቶ ጋሙዋዳን ጻልያ ምኖቱ ዎዛናይካ ያሻን ሴራና።

11“ሽን ታን ኔና ዞርያዌ ሀዋ፤ እስራኤልያ ዛዋን ዳናፐ ቢደ በርሳበሀ ጋካናዉ ደእያ እስራኤልያ ኡባ፥ አባ ዶናን ደእያ ሻፍያ ኬሻ ኔኮ ሺሻ፤ ያታደ ኔን ነ ሁጲያዉ ኡንቱንታ ኦላዉ ካለ። 12ያቶፐ ኑን አ ደሜዳ ሀቃንነ ሾጫና፤ ከተርሳይ ሳኣን ዎያዋዳን ኑን አ ቦላ ዎና። አ ግድናካ ዎይ አናና ደእያ አሳ ግድናካ እቱነ ፓጻ አተና። 13እ ካታማ ግዶ ገሎፐካ፥ እስራኤልያ አሳይ ኡባይ ዎዶሩዋ ሄ ካታማ አሂደ፥ ካታማ ግዶን እት ሹቻይካ ቤተናዳን ኑን ሄ ካታማ ዛንጋራዉ ዱገ ጎቻና” ያጌዳ።

14አበሰሎምነ እስራኤልያ አሳይ ኡባይ፥ “አርክያ ሁሻያ ዞሪ አክጾፌላ ዞርያፐ ሎአ” ያጌድኖ። ሄዌ ሀኔዳዌ፥ መና ጎዳይ አበሰሎማ ቦላ ኢታባ አሀና ማላ፥ አክጾፌላ ዞርያ ሎኡዋ ሀልሳናዉ ቃቼዳ ድራሳ።

15ሄዋፐ ጉይያን፥ ሁሻይ ቄሳቱ ዋ ጻዶቃነ አብያታራ፥ “አክጾፌል አበሰሎማነ እስራኤልያ ጭማቱዋ ሀዋ ሀዋ ጊደ ዞሬዳ፤ ታንካ ኡንቱንታ ሀዋ ሀዋ ጋደ ዞራድ። 16ሀእካ ዳዊታኮ ኤለካ ኪቲደ፥ ‘ባዙዋ ፕኑዋን ሀቼ ቃማ አቆፓ፤ ሄፍን ፕና ክቻ! ህና ዮፐ፥ ካቲነ አናና ደእያ አሳይ ኡባይ ያና’ ያጊደ ኦድተ” ያጌዳ።

17ዮናታንነ አህማኣጽ ቆንጭያን የሩሳላመ ካታማ ገልሽን ኡንቱንታ አሳይ በኤና ማላ፥ ኤንሮጌላ ግያ ሳኣን ኡቲደ ናጋናዉነ እት ቆማታ ያ ያደ ኡንቱንቶ ኦድና፥ ኡንቱንቱ ቢደ ካትያ ዳዊታዉ ኦዳናዉ ቆፔድኖ። 18ሽን እት ዎዳላይ ኡንቱንታ በኤዳ፤ አበሰሎማዉ ኦዴዳ። ሄዋ ድራዉ፥ ኡንቱንቱ ላአቱካ ሄ ሳፐ ኤለካ ክች ቢደ፥ ባሁሪማ ካታማን እት ብታንያ ሶ ጋኬድኖ። ሄ ብታንያዉ ድርሳፐ ሶ ባጋና ሃ ኦላይ ደኤ፤ ኡንቱንቱ ሄ ኦላ ግዶ ዱገ ገሌድኖ። 19አያይነ ኤረተናዳን ብታንያ ማቻታ ካምያዋ አካደ ኦላ ዶናን ሂጻዱ፤ ያታደ አ ቦላ ካ ምጫዱ።

20አበሰሎማ ቆማቱ ብታንያ ሶ ዪደ ምሽራቶ፥ “አህማኣጽነ ዮናታን ሀቃን ደኢኖ?” ያጊደ ኦቼድኖ።

ምሽራታ፥ “ኡንቱንቱ ሻፋ ፕኒደ ቤድኖ” ያጋዱ፤ ኡንቱንቱ ኮይና ቤተናን ይና፥ የሩሳላመ አጊደ ስሜድኖ።

21ሄ አሳቱ ቤዳዋፐ ጉይያን፥ ላኡ አሳቱ ኦላፐ ከሲደ፥ ካትያ ዳዊታዉ ኦዳናዉ ቤድኖ፤ ዳዊታ፥ “ኤሌል ደንዲደ ሻፋ ፕንተ፤ አያዉ ጎፐ፥ አክጾፌል ህንተንቱ ቦላ ሀዋ ሀዋ ጊደ ዞር ዎዳ” ያጌድኖ። 22ዳዊተነ አናና እትፐ ደእያ አሳይ ኡባይ ዮርዳኖሳ ፕኒደ ቤድኖ። ዎንትያ ዎደ ዮርዳኖሳ ፕነናን አቴዳ እት አሳይነ ባዋ።

23አክጾፌል ባረ ዞሪ አከትቤናዋ በኤዳ ዎደ፥ ባረ ሀርያ ኮሪደ፥ ባረ ደእያ ካታማ ቤዳ፤ አክጾፌል ባረ ሶያ ጊግሲደ፥ ባረካ ሱለቲደ ሀይቄዳ፤ ባረ አዉዋ ዱፉዋን ሞገቴዳ።

24ዳዊተ ማህናይማ ካታማ ጋኬዳ ዎደ፥ አበሰሎምነ አናና ደእያ አሳይ ኡባይ ዮርዳኖሳ ሻፋ ፕኔድኖ። 25አበሴሎም ባረ ኦላንቻቱ ቦላ እዮኣባ ኮታን አማሳ ሱንዳ። አማስ እስራኤልያ የተራ ናኣ፤ የተር አብጋሎ አኬዳዋ፤ አብጋላ ናኦሳ ናትዉነ እዮኣባ ዳይ ጻሩይ ምቻቶ። 26እስራኤላቱነ አበሴሎም ጋላኣደ ቢታን ኡቴድኖ።

27ዳዊተ ማህናይማ ካታማ ጋክያ ዎደ፥ አሞና ጋድያፐ ራባፐ ዬዳ ናኦሳ ናአይ ሾቢ፥ ሎዳባራ ካታማፐ ዬዳ አምኤላ ናአይ ማኪርነ ሮጋሊማ ካታማፐ ዬዳ ጋላኣድያ ባርዝላይ 28ሂጽያዋንታ፥ ሳምፓቱዋነ ኡርቃ ሚሻቱዋ አሄድኖ። ቃይ ኡንቱንቱ ዛርጋነ ባንጋ፥ ልያነ ሻሻ፥ ባኤላነ ምስርያ፥ 29ኤሳነ መኤዳ ማ፥ ሚዛ ማ ፕላነ ዶርሳ ዳዊተነ አ አሳይ ማናዳን አኪደ ዬድኖ። ሄዋ ኡንቱንቱ አሄዳዌ፥ “አሳይ ዎራን ኮሻቴዳ፥ ዳቡሬነ ሳመቴ” ጊደ ቆፔዳ ድራሳ።

Currently Selected:

2 ሳሜላ 17: DFBE

Highlight

Copy

Compare