1 ሳሜላ 19

ሳኦል ዳዊታ የደርሱዋ ዶሜዳ

1ሳኦል ባረ ናኣ ዮናታናዉነ ባረ ቆማቱዋ ኡባዉ፥ “ዳዊታ ዎተ” ያጊደ ኦዴዳ፤ ሽን ሳኦላ ናአይ ዮናታን ዳዊታ ሎይ ሲቄዳ። 2ሄዋ ድራዉ፥ ዮናታን ዳዊታዉ ሀዋዳን ያጊደ ኦዴዳ፤ “ታ አዉ ሳኦል ኔና ዎናዉ ኮዬ፤ ዎንት ጉራ ነዉ ናገታ፤ እት ሳኣን ቆሰታደ ደአሻ። 3ታን ታ አቡና ባደ፥ ኔን ቆሰቴዳ ጋደን ኤቃና፤ ታን ነባ አዉ ኦዳደ፥ አፐ ስሴዳባ ነዉ ኦዳና” ያጌዳ።

4ዮናታን ዳዊተዋ ናሺደ፥ ባረ አዉዋ ሳኦላ ሀዋዳን ያጌዳ፤ “ካቲ ባረ ቆማ ዳዊታ ናቆፖ፤ አያዉ ጎፐ፥ እ ኔና ናቂቤና፤ እ ኦዳባይ ኔና ሎይ ጎኤዳ። 5እ ፕልስጼምያ ዎያ ዎደ ባረ ሸምፖ ቃረትቤና። መና ጎዳይ እስራኤልያ ኡባዉ ዎልቃማ ጾኑዋ እሜዳ፤ ሄዋ በኣደ ኔንካ ናሸታዳ። ያትና፥ ኔን ጌሻ አሳ ናቃናዉ አያዉ ቆፓይ? ጋሱ ባይናን ዳዊታ ዎናዉ አያዉ ኮያይ?” ያጌዳ።

6ሳኦል ዮናታን ኦዴዳዋ ስሲደ፥ “መና ጎዳይ ኤሮ፥ ታን ዳዊታ ዎከ” ያጊደ ጫቄዳ።

7ዮናታን ዳዊታ ጼሲደ፥ ሃሳዬዳዋ ኡባ ኦዴዳ። ያቲደ ዳዊታ ሳኦላኮ አሄዳ፤ ዳዊተ ሳኦላና ካሰዋዳንካ ደኤዳ።

8ሀራ ኦላይካ ደንዴዳ፤ ዳዊተ ከሲደ ፕልስጼማ አሳቱዋና ኦለቴዳ፤ ኡንቱንታ ዎልቃማ ሾቻ ሾጭና፥ ኡንቱንቱ አ ስንፐ ባቃቴድኖ።

9ሄዋፐ ስሚደ፥ ሳኦል ቶራ ኦይቂደ ባረ ሶን ኡት ደእሽን፥ ኢታ አያናይ መና ጎዳፐ ኪተቲደ አ ኦይቄዳ። ያትና፥ ዳዊተ ዲ ዲጽሽን፥ 10ሳኦል ዳዊታ ጎዳና ጋደ ዳንናዉ (ኦይናዉ) ቶራ ጾንጌዳ፤ ሽን ዳዊተ አፐ ሀሌዳ፤ ቶራይ ጎዳን ኤቄዳ። ሄ ጋላሳ ቃማ ዳዊተ ባቃቲደ ከስ አኬዳ።

11ሄዋፐ ጉይያን፥ “ዳዊታ ጎልያ ናጊደ፥ ጉራ አ ዎተ” ያጊደ ሳኦል አሳ ዳዊታ ሶ ኪቴዳ።

ያትና፥ ዳዊታ ማቻታ ሚካላ፥ “ሀቼ ቃማ ኔን ነ ሸምፑዋ አሻና ዮፐ፥ ዎንት ሀይቃሳ” ያጋደ ዳዊታዉ ኦዳዱ።#ማዝ. 59 (ሁጲያ) 12ሚካላ ዳዊታ ማስኮትያና ዎዱ፤ ዳዊተ ባቃቲደ ከስ አኬዳ። 13ሚካላ ሶ ምስልያ አካደ አርሳን ግስሳዱ፤ ሁጲሳና ዴሻ እስክያ ዎዱ፤ ያታደ አፍላ ማይዛዱ።

14ዳዊታ ኦሞዲደ አሀና ማላ፥ ሳኦል አሳ ኪቴዳ፤ ሚካላ፥ “ዳዊተ ሳከቴዳ” ያጋዱ።

15ሄዋፐ ጉይያን፥ ዳዊታ በአና ማላ፥ ሳኦል ሄ አሳቱዋ ጉየ ኪቲደ፥ ሀዋዳን ያጌዳ፤ “ታን ዳዊታ ዎናዳን አ አርሳና ቶኪደ አኪደ አህተ” ያጌዳ። 16ሽን አሳቱ ሶ ገልያ ዎደ፥ ሄ ሶ ምስሊ አርሳን ግሴዳዋ ደሜድኖ፤ አ ሁጲሳና ዴሻ እስኪ ደኤ።

17ሳኦል ሚካሎ፥ “ኔን አያዉ ሀዋዳን ኦደ ታና ጭማድ? ታ ሞርኪ ከስ አካናዳን አያዉ ባቃትሳዲ?” ያጌዳ።

ሄዋፐ ጉየ ሚካላ፥ “እ ታና፥ ‘ታና ከሳደ የዳ፤ ህና ዮፐ፥ ታን ኔና ዎና’ ያጌዳ” ያጋደ ዛራዱ።

18ዳዊተ ባቃት አቲደ፥ ራማን ደእያ ሳሜላኮ ቤዳ፤ ሳኦል ባረና ኦዳ ኡባባ ሳሜላዉ ኦዴዳ። እነ ሳመል ራማን ደእያ ናዮታ ግያ ሳኣን ቢደ ኡቴድኖ። 19ሳኦል፥ “ዳዊተ ራማን ደእያ ናዮታን ደኤ” ያግያዋ ስሴዳ። 20ዳዊታ ኦሞዳና ማላ፥ አሳ ያ ኪቴዳ። ሽን ትምቢትያ ኦድያዋንቱ ጭታይ ትምቢትያ ኦድሺንነ ሳሜልካ ኤቂደ ኡንቱንታ ካለሽን ኡንቱንቱ በኤዳ ዎደ፥ ሳኦል የዴዳ አሳ ቦላ ጾሳ አያናይ ዎዳ፤ ኡንቱንቱካ ትምቢትያ ኦዴድኖ። 21ሳኦል ሄዋ ስሴዳ ዎደ፥ ሀራ አሳ የዴዳ፤ ኡንቱንቱካ ቃይ ትምቢትያ ኦዴድኖ። ሳኦል ሄዘን አሳ የዴዳ፤ ሄዋንቱካ ትምቢትያ ኦዴድኖ። 22ያትና፥ እ ባረ ሁጲያዉ ራማ ባናዉ ደንዴዳ፤ ቢደ ሴኩን ደእያ ዎልቃማ ኦላ ጋኬዳ፤ “ሳመልነ ዳዊተነ ሀቃን ደኢኖ?” ያጊደ ኦቼዳ።

ኡንቱንቱ፥ “ህን ራማን ደእያ ናዮታን ደኢኖ” ያጊደ ዛሬድኖ።

23ሄዋ ድራዉ፥ ሳኦል ራማን ደእያ ናዮታ ቤዳ፤ ቃይ ጾሳ አያናይ አ ቦላካ ዎዳ፤ ራማን ደእያ ናዮታ ጋካናዉ፥ ትምቢትያ ኦዲደ ቤዳ። 24ብ ጋኪደ፥ ባረ ማዩዋ ቃሪደ፥ ሳመላ ስንን ትምቢትያ ኦዴዳ፤ ሄ ጋላሳ ኡባነ ቃማ ኡባ ካሎ ግሴዳ። አሳይ፥ “ሳኦለካ ትምቢትያ ኦድያዋንቱ ዛቴየ?” ጉሳይ ሀዋሳ።#1 ሳሜላ 10:11-12

Currently Selected:

1 ሳሜላ 19: DFBE

Highlight

Copy

Compare