1 ሳሜላ 20
20
ዮናታን ዳዊታ ማዴዳ
1ሄዋፐ ጉይያን፥ ዳዊተ ራማን ደእያ ናዮታፐ ባቃቲደ፥ ዮናታናኮ ቤዳ፤ ዮናታና፥ “ታን አይ ኦድታ? ታ ባይዙ አዬ? ነ አዉ ታና ዎናዉ ኮይያዌ፥ ታን አ ዋታ ቆሂኔ?” ያጊደ ኦቼዳ።
2ዮናታን፥ “ሄዌ ኔፐ ሃኮ! ኔን ሀይቃካ። በአ፥ ጉባ ግዲና፥ ግታባ ግዲና፥ ታ አዉ ታዉ ኦደናን ደኢደ አያነ ኦና። ታ አዉ ሀ የዉዋ ታፐ አያዉ ቆስ? ሄዋዳን ግደና!” ያጊደ ዛሬዳ።
3ሽን ዳዊተ ዮናታና፥ “ኔን ታና ሲቅያዋ ነ አዉ ሎይ ኤሬዳ፤ ነ አዉ ባረዉ፥ ‘ዮናታን ሀ የዉዋ ኤሮፐ እ ካዮታና!’ ያጌዳ። ሽን መና ጎዳይ ኤሮ፤ ነ ሸምፑ ኤሮ፤ ታፐነ ሀይቁዋፐ ግዱዋን መጽ እት ታንጉ አቴዳ” ያጊደ ጫቄዳ።
4ዮናታን፥ “ኔን ኪተታ ጌዳዋ አያነ ታን ነዉ ኦና” ያጌዳ።
5ሄዋፐ ጉየ ዳዊተ ሀዋዳን ያጌዳ፤ “ስሳ፥ ዎንት አግና ጼሩዋ ቦንችያ ጋላሳ፤ ታን ካትያና ቁማ ማና ኮሼ። ሽን ታን ባደ ዎንት ፔሽና ኦማርስ ጋካናዉ፥ ጋደን ቆሰታና።#ፓይ. 28:11 6ነ አዉ ታና ኮዮፐ፥ ኔን አ፥ ‘ዳዊተንቱ ሶ አሳይ ኡባይ ላይ ያርሹዋ ያርሽያ ዎደ ግድያ ድራዉ፥ ቤተሌመ ባረ ካታማ ኤለካ ባና ጊደ፥ ታና ኦቺደ ቤዳ’ ያጋ። 7ሄዋፐ ጉየ እ፥ ‘ያኖፐ ሎአ’ ያጎፐ፥ ታዉ ነ ቆማዉ ሳሮ፤ ሽን እ ሀንቀቶፐ፥ እ ታና ቆሀናዉ ባረ ቆፋ ቃቼዳዋ ሄዋን ኤራ። 8ኔና ግዶፐ፥ ኔን ታዉ ነ ቆማዉ ሎኦባ ኪተታ፤ አያዉ ጎፐ፥ ኔን ታናና ነ ቆማና መና ጎዳ ስንን ጫቀታዳ። ሽን ታናን ባይዙ ደኦፐ፥ ታና ኔን ዎ! ነ አዎ ታና አ እሞፓ” ያጌዳ።
9ዮናታን፥ “ሄዌ ኔፐ ሃኮ! ታ አዉ ኔና ቆሀናዉ ባረ ቆፋ ቃቼዳዋ ታን ኤሬደንቶ፥ ነዉ ኦድክታየ?” ያጊደ ዛሬዳ።
10ሄዋፐ ጉየ ዳዊተ፥ “ነ አዉ ነዉ ኢታ ዛሩዋ ዛሮፐ፥ ታዉ ኦዳናዌ ኦኔ?” ያጊደ ኦቼዳ።
11ዮናታን፥ “ሃያ፤ ጋደ ቦይተ” ያጌዳ፤ ያትና፥ ላአቱካ ጋደ ቤድኖ።
12ዮናታን ዳዊታ ሀዋዳን ያጌዳ፤ “መና ጎዳይ እስራኤልያ ጾሳይ ኤሮ፥ ታን ዎንት ፔሽና ታ አዉዋ ቆራና። እ ነዉ ሎኡዋ ቆፖፐ፥ ታን ኪታደ ኔና ኤርሳና። 13ሽን ታ አዉ ኔና ቆሀናዉ ኮዬዳዋ ግዶፐ፥ ቃይ ሄዋ ታን ኔና ኤርሰናን አጎፐነ ኔና ሳሩዋን ሞይዛ የደናን አጎፐ፥ መና ጎዳይ ታዉ ኢቶ! መና ጎዳይ ታ አቡና እትፐ ግዴዳዋዳን ኔናናካ እትፐ ግዶ። 14ታና አሳይ ዎናዳን ታ ደኡዋ ላይ ኡባን አገና ሲቁዋ፥ መና ጎዳዋ ማላ ታዉ ኪተታ። 15ቃይ ጎዳይ ዳዊታ ሞርከቱዋ ኡባ ጋድያፐ ቆሌዳ ዎደካ፥ ታ ጎልያ አሳፐ ነ ሲቁዋ ሃሶፓ” ያጌዳ።#2 ሳሜላ 9:1
16ሄዋ ድራዉ፥ ዮናታን፥ “መና ጎዳይ ዳዊታ ሞርከቱዋ ኦቾ” ያጊደ ዳዊታ ጎልያ አሳና ቃላ ጫቁዋ ጫቀቴዳ። 17ዮናታን ዳዊታ ባረ ሁጲያዳን ሲቄዳ ድራዉ፥ “ኔን ታና ቱሙ ሲቅያዋ ቆንጭሳናዉ አነ ታዉ ላኤንዋ ጫቃ” ያጊደ ጫቂሴዳ።
18ሄዋፐ ጉይያን፥ ዮናታን ዳዊታ፥ “ዎንታ አግና ጼሩዋ ቦንችያ ጋላሳ፤ ኔን ኡትያ ሳአይ መላ ደኦፐ፥ ኔን ባይናዌ ኤረታናዋ። 19ዎንት ፔሽና ኦማርስ ባደ፥ ሀ መቱ ዶሜዳ ጋላስ ኔን ቆሰቴዳ ሳኣን ቆሰታ፤ ቆሰታደ ኤጸላ ግያ ዛላፐ ጉየና ታካሻ። 20ታን አየንቶ ጾንግያዋ ማላታደ፥ አ ምይያና ሄዙ ፖቱዋ ዎንዳፍያን ዱካና። 21ሄዋፐ ጉይያን፥ ታ ቆማ፥ ‘ባደ ዙበቱዋ ኮያ’ ያጋደ ኪታና፤ ታን አ ኪታደ፥ ‘በአ፤ ዙበቱ ኔፐ ሀ ባጋና ደኢኖ፤ ታኮ አካደ ያ’ ያግያዋ ግዶፐ፥ ሃያ፤ አያዉ ጎፐ፥ መና ጎዳይ ኤሮ፥ ነዉ ሳእ ሳሮ፤ ኔና አያይነ ቦቼና። 22ሽን ታን ታ ቆማ፥ ‘በአ፤ ዙበቱ ኔፐ ህን ባጋና ደኢኖ’ ያግያዋ ግዶፐ፥ ኔን አጋደ ባ፤ አያዉ ጎፐ፥ መና ጎዳይ ኔና ዎራ የዴዳ። 23ኔንነ ታን ሃሳዬዳ ቃላ ጫቁዋ ግዶፐ፥ ሄዎ ኔፐነ ታፐ ግዱዋን መና ጎዳይ መናዉ ማርካ” ያጌዳ።
24ሄዋ ድራዉ፥ ዳዊተ ጋደን ቆሰቴዳ። አግና ጼሩዋ ቦንችያ ጋላሳይ ጋኬዳ ዎደ፥ ካትያ ሳኦል ቁማ ማናዉ ዬዳ። 25ሀሮደ ባረ ኡትያ ሳኣን ጎዳ ላንቂያን ኡቴዳ፤ ዮናታን አፐ ስን ባዙዋን ኡቴዳ፤ አባኔር ሳኦላ ላንቂያን ኡቴዳ፤ ሽን ዳዊታ ሳአይ መላ ደኤ። 26ሳኦል ሄ ጋላሳ አይነ ግቤና፤ አያዉ ጎፐ፥ ሳኦል፥ “ዳዊተ አየንቶ ሀኔዳ፤ ሄ ጋላሳ ቦንቼናዳን ቱኔዳ፤ ቱማ እ ቱኔዳ” ያጊደ ቆፔዳ። 27ሽን ዎንተ ጋላስካ፥ አግናዉ ላኤን ጋላስ ዳዊታ ሳአይ መላ ደኤ። ሳኦል ባረ ናኣ ዮናታና፥ “እሰያ ናአይ ዝኖካ ሀችካ ቁማ ማናዉ አያዉ ይቤኔ?” ያጊደ ኦቼዳ።
28ዮናታን፥ “ዳዊተ ቤተሌመ ባና ጊደ ታና ኦቼዳ፤ 29እ ታንካ፥ ‘ኑ ጎልያ አሳይ ካታማን ያርሹዋ ያርሽያ ድራዉነ ታ እሻይካ ታና አዛዜዳ ድራዉ፥ ሀይ ታና የዳርኪ፤ ኔን ታና ሲቅያዋ ግዶፐ፥ አነ ታን ታ እሻቱዋ በአናዉ ባይ’ ያጌዳ። ካትያ ማዳፐ ማናዉ እ ይቤናዌ ሄዋ ግሻሳ” ያጊደ ዛሬዳ።
30ሳኦል ዮናታና ቦላ ሀንቁዋ ኤጽ ከሲደ ሀዋዳን ያጌዳ፤ “ላ ጌላነ ማካላንቻ ምሽራት ናአዉ፥ ኔን ነ ሁጲያዉ ካዉሻናዉነ ኔና የሌዳ ነ ዳዮ ካዉሻናዉ ኔን እሰያ ናኣ ባጋ ግዴዳዋ ታን ኤርክታየ? 31እሰያ ናአይ ሀ ሳኣ ቦላን ደኤዳ ፔሻን ኡባን ኔን ዎይ ነ ካዉተይ ኤቀና። ሀእ ኪታደ ታዉ አ አሂሳ፤ አያዉ ጎፐ፥ እ ሀይቃናዉ በሰ” ያጌዳ።
32ሄዋፐ ጉየ ዮናታን ባረ አዉዋ ሳኦላ፥ “እ አያዉ ሀይቂ? እ ኦዳባይ አዬ?” ያጊደ ኦቼዳ።
33ሽን ሳኦል ዮናታና ዎናዉ ቶራ አ ቦላ ጾንጌዳ። ሄዋ ድራዉ፥ ዮናታን ባረ አዉ ዳዊታ ዎናዉ ቆፋ ቃቼዳዋ ኤሬዳ። 34ሀንቁዋ ኤጸቲደ ማዳፐ ደንዴ ኤቄዳ፤ ባረ አዉ ዳዊታ ካዉሼዳ ድራዉ ዮናታን ካዮቲደ፥ ሄ አግናዉ ላኤን ጋላሳ ምቤና።
35ዎንታ ዮናታን ዳዊታና ጋከታናዉ ጋደ ቢደ ባረናና እት ያላጋ ናኣ አኪደ ቤዳ። 36ዮናታን ናኣ፥ “ታን ዎንዳፍያን ዱክያ ዙበቱዋ ዎጻደ ኮያ” ያጌዳ፤ ሄዋፐ ጉይያን ናአይ ዎጽያ ዎደ፥ ዙቢያ ሄፍን ዱኬዳ። 37ናአይ ዮናታና ዙቢ ዎዳ ሳኣ ጋኬዳ ዎደ፥ ዮናታን ናኣ ጼሲደ፥ “ዙቢ ኔፐ ህን ባጋና ደኤኔ?” ያጌዳ። 38ቃይካ ዮናታን ናኣ፥ “ኤሌላ፤ ኤሌላደ ባ፤ ኤቆፓ!” ያጊደ ባረ ቃላ ቁ ኦደ ኦዴዳ። ሄ ናአይ ዙቢያ ማጺደ አኪደ፥ ባረ ጎዳኮ አሄዳ። 39ናአይ ሀ የዉዋ አይነ ኤረና፤ ዮናታናነ ዳዊታ ጻላላይ ኤሪኖ። 40ዮናታን ባረ ኦላ ሚሻ ናአዉ እሚደ፥ “ቶካ አካደ ካታማ አፋ” ያጌዳ።
41ናአይ ቤዳዋፐ ጉይያን፥ ዳዊተ ሄ ዛላ ጉየፐ ከሴዳ፤ ዮናታና ስንን ጉልባቲደ፥ ባረ ዴሙዋ ቢታ ቦሽሲደ ሄዙ ገደ ጎይኔዳ። ሄዋፐ ጉይያን፥ እቱ እቱዋና የረቲደ ዬኬድኖ፤ ሽን ዳዊተ ዮናታናፐ አዋ ዬኬዳ።
42ዮናታን ዳዊታ፥ “ሳሮ ባ፤ ‘ነ ግዶንነ ታ ግዶን፥ ነ ዘረ ግዶንነ ታ ዘረ ግዶን፥ መና ጎዳይ መናዉ ማርካ ግዶ’ ያጊደ ኑን ላኡ መና ጎዳ ሱንን ጫቀዶ” ያጌዳ። ሄዋፐ ጉይያን፥ ዳዊተ ደንዲደ ቤዳ፤ ዮናታንካ ካታማ ጉየ ስሜዳ።
Currently Selected:
1 ሳሜላ 20: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
