1 ሳሜላ 18
18
ዳዊታነ ዮናታና
1ዳዊተ ሳኦላና ሃሳይያዋ ዉርሴዳዋፐ ጉይያን፥ ሳኦላ ናኣ ዮናታን ዳዊታና ዳሮ ማታ ዳቦተ መዳ፤ ዮናታን ዳዊታ ባረ ሁጲያዳን ሲቄዳ። 2ሄ ጋላሳፐ ዶሚደ፥ ሳኦል ዳዊታ ባረናና ዎዳ፤ ባረ አዉዋ ሶ ጉየ ስመናዳን ድጌዳ። 3ዮናታን ዳዊታ ባረ ሁጲያዳን ሲቅያ ድራዉ፥ አናና ቃላ ጫቁዋ ጫቀቴዳ። 4ዮናታን ባረ ማዬዳ ካባ ቃሪደ፥ ባረ ኦላ ማዩዋና፥ ባረ ማሻና፥ ባረ ዎንዳፍያናነ ባረ ሳቂያና እትፐ ዳዊታዉ እሜዳ።
5ሳኦል ኪቴዳ ኡባባ ዳዊተ ፖሊደ ኦያ ድራዉ፥ ሳኦል ዳዊታ ባረ ኦላንቻቱ ግዶን ጋዳዋ ሱንዳ፤ ሄዌ አሳ ኡባካ አ ኦላንቻቱዋካ ናሸቼዳ።
ሳኦል ዳዊታ ቃናቴዳ
6ዳዊተ ፕልስጼምያ ጎልያዳ ዎና አሳይ ሶ ስምያ ዎደ፥ ማጫ አሳይ ናሸቻ የ የጺድነ ዱሪደ፥ ካባሩዋ ባቂደነ ዲ ዲጺደ፥ ካትያ ሳኦላ ሞካናዉ እስራኤልያ ካታማቱዋ ኡባቱዋፐ ከሴዳ። 7ማጫዋንቱ ዱሪደ፥
“ሳኦል ሻኣ ዎዳ፤
ዳዊተ ታሙ ሻኣ ዎዳ”
ያጊደ የጼድኖ።#1 ሳሜላ 21:11፤ 29:5
8ሳኦል ሀ የይ ኢትና፥ ሎይ ሀንቀቴዳ፤ ሳኦል ባረ ቆፋን፥ “ዳዊታ፥ ‘ታሙ ሻኣ ዎዳ’ ጊደ፥ ታና፥ ‘እት ሻኣ ዎዳ’ ጌድኖ፤ ያትና፥ ካዉተፐ አትና አዉ አዬ አቴዳዌ?” ያጌዳ። 9ሄ ጋላሳፐ ዶሚደ፥ ሳኦል ዳዊታ ቃናተ አይፍያን ጼሌዳ።
10ዎንተ ጋላሳ ኢታ አያናይ ጾሳፐ ኪተቲደ፥ ሳኦላ ኦይቄዳ፤ ሳኦል ባረ ሶን ኤሉመቴዳ። ዳዊተ ሀሮደዋዳን ዲ ዲጼዳ፤ ሳኦል ቶራ ባረ ኩሽያን ኦይቂ ኡቴዳዌ፥ 11“ዳዊታ ጎዳና ጋደ ስካድ” ጊደ ቶራ ጾንጌዳ። ሽን ዳዊተ ላኡ ጌደ አፐ ሀሌዳ።
12መና ጎዳይ ሳኦላ አጊደ ዳዊታና ደእያ ድራዉ፥ ሳኦል ዳዊታዉ ያዬዳ። 13ሄዋ ድራዉ፥ ሳኦል ዳዊታ ባረ ስንፐ ሃሲደ፥ ሻአ ኦላንቻቶ ካፑዋ ከሴዳ። ያትና፥ ዳዊተ ባረ ጭታ ኦላን ካለዳ። 14መና ጎዳይ ዳዊታና እትፐ ደእያ ድራዉ፥ እ ኦያባይ ኡባይ አዉ እንጀቴዳ። 15ዳዊተ ኦያባይ ኡባይ ሎይ እንጀትያዋ ሳኦል በኢደ፥ አዉ ሎይ ያዬዳ። 16ሽን ዳዊተ ኡንቱንታ ኦላን ካለያ ድራዉ፥ እስራኤላነ ይሁዳ አሳይ ኡባይ አ ሲቄድኖ።
17ሄዋፐ ጉይያን፥ ሳኦል ዳዊታ፥ “ታ ናታ ባይራታ መራባ ሀናሽ፤ ታን ኦ ነዉ ማቸ ኦደ እማና፤ ኔን ምኖ አሳ ግዳ፤ ያታደ መና ጎዳ ኦላ ኦለታ” ያጌዳ። ሳኦል ባረ ዎዛናን፥ “ታን አ ቦችከ፤ ፕልስጼማ አሳቱ አ ዎና” ያጊደ ቆፔዳ። 18ሽን ዳዊተ ሳኦላ፥ “ካትያና ቦሎታናዉ ታን ኦኔ? ታ ሶ አሳይካ አዬ? ዎይ ታ አዉዋ ያራይካ እስራኤልያ አሳ ግዶን አዬ?” ያጌዳ። 19ሽን ሳኦላ ናታ መራባ ዳዊታው እመትያ ዎዲ ጋክና፥ ማሆላ ካታማፐ ዬዳ፥ አድሪኤላ ጌተትያ እት ብታንያዉ እመታዱ።
ዳዊተ ሳኦላ ናቶ አኬዳ
20ግዶፐነ፥ ሳኦላ ናታ ሚካላ ዳዊታ ሲቃዱ፤ ሳኦል ሄዋ ስሲደ ናሸቴዳ። 21እ ባረ ዎዛናን፥ “አዉ ጲረ ግዳና ማላነ ፕልስጼማ አሳቱ አ ዎና ማላ፥ ታን ሚካሎ ዳዊታዉ እማና” ያጊደ ቆፔዳ። ሄዋ ድራዉ፥ ሳኦል ዳዊታ፥ “ኔን ታናና ቦሎታናዉ ሀዌ ነዉ ላኤን ካጫ” ያጌዳ።
22ቃይካ ሳኦል ባረ ቆማቱዋ ጼሲደ፥ “ካቲ ኔናን ናሸቴዳ፤ አ ቆማቱ ኡባይካ ኔና ዶሲኖ፤ ሀእ ኔን ካትያና ቦሎታ ያጊደ ጹራን ዳዊታዉ ኦድተ” ያጊደ አዛዜዳ።
23ኡንቱንቱ እ ጌዳዋዳንካ ዳዊታዉ ኦዴድኖ፤ ሽን ዳዊተ ኡንቱንቶ፥ “ካትያና ቦሎታናዌ ህንተንቶ ላፋባ ማላቲየ? ታን ህዬሳነ ኤረተና አሳ” ያጊደ ዛሬዳ።
24ሳኦላ ቆማቱ ዳዊተ ጌዳዋ ሳኦላዉ ኦዴድኖ። 25ሳኦል ባረ ቆማቱዋ፥ “ዳዊታው ሀዋዳን ያጊደ ኦድተ፤ ‘ካቲ ባረ ሞርከቱዋ ሀሉዋ ከሳናዉ ጼቱ ፕልስጼማ አሳቱዋ ቃራቱዋፐ አትና፥ ኔፐ ሀራ ጭሎሻ ኮየና’ ያግተ” ያጌዳ። ሳኦል ሄዋ ጌዳዌ፥ “ዳዊተ ፕልስጼማቱዋ ኩሽያን ሀይቆ” ጊደ ቆፔዳ ድራሳ።
26ሳኦላ ቆማቱ ሳኦል ጌዳዋ ዳዊታዉ ኦዴድኖ፤ ካትያና ቦሎትያዌ ዳዊታ ናሸቼዳ። ሄዋ ድራዉ፥ ቡላቻ ጋላሳይ ጋካናፐ ካሰቲደ፥ 27ዳዊተነ አ አሳይ ደንዲደ ቤድኖ፤ ፕልስጼማቱዋፐ ላኡ ጼቱ አሳ ዎድኖ። ዳዊተ ካትያና ቦሎታናዉ ሄ አሳቱዋ ቃራቱዋ አሂደ፥ ካዎ ኩመን ፓይዲደ ሼዳ። ሄዋ ድራዉ፥ ሳኦል ባረ ናቶ ሚካሎ ዳዊታዉ እሜዳ።
28ሳኦል መና ጎዳይ ዳዊታና እትፐ ደእያዋነ አ ናታ ሚካላ ዳዊታ ሲቅያዋ ኤሬዳ። 29ሄዋ ድራዉ፥ ሳኦል ዳዊታዉ ካሰዋፐ አደ ያዬዳ። ሳኦል ባረ ደኡዋ ላይ ኡባን ዳዊታዉ ሞርከ ግዴዳ።
30ፕልስጼመ ካፓቱ ኦለታናዉ ከስያዋ አግበይክኖ፤ ሽን ኦላዉ ከሴዳ ፓይዱዋ ኡባን ሳኦላ ጋዳዋቱ ኡባፐ ጾኑ ሀንያዌ ዳዊተሳ፤ ሄዋ ድራዉ፥ እ ኤረቴዳ አሳ ግዴዳ።
Currently Selected:
1 ሳሜላ 18: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
