1 ኦዱዋ 21

ዳዊተ አሳ ፓይድና ዬዳ ጾሳ ሀንቁዋ

(21:1-30፤ 2 ሳሜላ 24:1-25)

1ሴጻናይ እስራኤልያ ቦላ መቱዋ አሀናዉ ኮዪደ፥ ዳዊተ እስራኤልያ አሳ ፓይዳናዳን ደንዳ። 2ዳዊተ ዮኣባነ ኦላንቻቱ ካፓቱዋ ሀዋዳን ያጌዳ፤ “ዳናፐ በርሳበሀ ጋካናዉ ቢተ፤ እስራኤልያ አሳ ፓይድተ። ያቲደ አሳ ፓይዱ አፑነንቶ ታና ኤርስተ” ያጌዳ።

3ሽን ዮኣበ አ፥ “መና ጎዳይ ሀ ደእያ ባረ አሳ ቦላ ጼቱ ኩሽያ ጉጆ! ታ ጎዳዉ፥ ካትያዉ፥ ኡንቱንቱ ኡባይ ታ ጎዳ ቆማቱዋ ግድክኖየ? ታ ጎዳይ ሄዋ ማላ ኦናዉ አያዉ ኮዪ? እስራኤልያ ካዉተ አያዉ ባይዛንቻ ከሲ?” ያጌዳ። 4ሽን ካትያ ቃላይ ዮኣባ ጾኔዳ። ዮኣበ ከሲደ፥ እስራኤልያ ቢታ ኡባ ዩዬዳ፤ የሩሳላመ ስሜዳ። 5ዮኣበ ፓይዴኤዳ አሳ ፓይዱዋ ዳዊታዉ እሜዳ። እስራኤልያ ቢታን ኡባን ማሻን ኦለታናዉ ዳንዳይያ እት ሚሎነነ እት ጼቱ ሻአ ምኖ አሳቱ ደኢኖ። ቃይ ይሁዳ ቢታን ማሻን ኦለታናዉ ዳንዳይያ ኦይዱ ጼታነ ላፑን ታሙ ሻአ ምኖ አሳቱ ደኢኖ። 6ዮኣበ ካትያ አዛዙዋ ሸነቴዳ ድራዉ፥ ሌዋቱዋነ ቢንያማ ዘረ ፓይዱዋን ጉጅቤና።

7ጾሳይ ሀ የዉዋን ናሸትቤና ድራዉ፥ እስራኤልያ ሙሬዳ። 8ያትና ዳዊተ ጾሳ፥ “ታን ሀ ኪታን ዎልቃማ ናጋራ ኦድ። ሽን ሀእ ኔና ዎሳይ፤ ታ ባይዙዋ፥ ነ ቆማ ባይዙዋ ቁጫ። ታን ዳሮ ኤያባ ሀናድ” ያጌዳ።

9መና ጎዳይ ዳዊታዉ ትምቢትያ ኦድያ ጋዳ ሀዋዳን ያጊደ ሃሳይሴዳ፤ 10“ባደ፤ ዳዊታ፥ ‘መና ጎዳይ ኔና፥ “ታን ኔና ሄዙባፐ ዶሩዋ በሳይ፤ ታን ነ ቦላ ፖላናዉ ታዉ ኡንቱቱፐ እቱዋ ዶራ” ያጌ’ ያጋ” ያጌዳ።

11-12ጋድ ዳዊታኮ ቢደ አ፥ “መና ጎዳይ ኔና፥ ‘ሀዋንቱፐ እቱዋ ዶራ: ሄዙ ላይ ኮሻ ዶራይ? ዎይ ነ ሞርከቱ ኔና የደርስሽን፥ ሄዙ አግና ኡንቱንቱ ስንፐ ባቃታናዋ ዶራይ? ዎይ መና ጎዳ ማሻይ ነ ጋድያ ሄዙ ጋላሳ ሾጫናዋነ ሄዋናካ ቃይ እስራኤልያ ጋድያ ፕን ከሳናሽን ሀይቁዋ ኢታ ሀርግያን ሾጭያ ኪታንቻ እ ኪትያዋ ዶራይ?’ ያጌ። አነ ሀእ ቃቻደ፥ ታን ታና ኪቴዳዎ ዛርያዋ ኦዳ” ያጌዳ።

13ዳዊተ ጋዳ፥ “ታን ሎይ ኡንኤታድ። መና ጎዳ ማሮተይ ሎይ ዎልቃማ ግድያ ድራዉ፥ አነ ታን አ ኩሽያን ኩንዳና፤ ታን አሳ ኩሽያን ኩንድከ” ያጌዳ።

14ሄዋ ድራዉ፥ መና ጎዳይ እስራኤልያ ቦላ ኢታ ሀርግያ የድና፥ ላፑን ታሙ ሻአ እስራኤልያ አሳቱ ሀይቄድኖ። 15ሄዋፐ ጉይያን፥ መና ጎዳይ የሩሳላመ ባይዛናዉ ኪታንቻ ኪቴዳ። ሽን ኪታንቻይ የሩሳላመ ባይዛናዉ ማታ ኡት ደእሽን፥ መና ጎዳይ ያቲደ ካዮቴዳ። ካዮቲደ ባይዝያ ኪታንቻ፥ “አጋ! ሄዌ ግዳናዋ!” ያጌዳ። ሄ ዎደ ጾሳ ኪታንቻይ ያቡስያ ኦርና ኡዱማ ማታን ኤቄዳ።

16መና ጎዳ ኪታንቻይ ባረ ማሻ ባረ ኩሽያን ኦይቂደ፥ የሩሳላመ ባይዛናዉ ሳኣፐነ ሳሉዋፐ ግዱዋን ኤቄዳዋ ዳዊተ በኤዳ። ሄዋፐ ጉይያን፥ ዳዊተነ ጭማቱ ዋሩዋ ማዪደ፥ ባረንቱ ዴሙዋን ጉፋኔድኖ። 17ዳዊተ ጾሳ፥ “አሳይ ፓይደታናዳን ኦዳዌ ታና ግድክታየ? ናቄዳዌነ ኢታባ ኦዳዌ ታና። ሽን ሀ ዶርሳቱ፥ ኡንቱንቱ አያ ኦድኖ? አቤት መና ጎዳ፥ ታ ጾሳዉ፥ ሀያና ነ ኩሺ ታናነ ታ አዉዋ ሶይ አሳ ሙሮ። ነ ኩሺ ነ አሳ ሙሮፖ!” ያጌዳ።

18ሄዋፐ ጉይያን፥ መና ጎዳ ኪታንቻይ ጋደ ሀዋዳን ያጊደ አዛዜዳ፤ “ዳዊተ ፑደ ያቡስያ ኦርና ኡዱማ ቢደ፥ መና ጎዳዉ ያርሽያ ሳኣ ያን ግምባናዳን ኦዳ” ያጌዳ። 19መና ጎዳይ ናብያ ጋደ ባጋና ጌዳ ቃላዳን ዳዊተ ቤዳ።

20ሄ ዎደ ኦርንነ አ ኦይዱ አቱማ ናናይ ኡዱማን ዛርጋ ቡኪኖ። ጉየ ስም ጼሊደ፥ ኪታንቻ በኤድኖ፤ አናና ደእያ ናናይ ቆሰቴድኖ። 21ዳዊተ ኦርናኮ ዬዳ ዎደ፥ ኦርን አ በኢደ፥ ኡዱማፐ ጋጻ ከሲደ፥ ባረ ዴሙዋ ሳኣ ጋደ፥ ዳዊታዉ ጎይኔዳ።

22ሄዋፐ ጉይያን፥ ዳዊተ ኦርና፥ “ቦሻይ አሳ ቦላፐ ክቻና ማላ፥ ታን መና ጎዳዉ ያርሽያ ሳኣ ኬጻናዉ ነ ኡዱማ ታዉ ዛልኣርኪ። ታን ነዉ ኩመን ጋትያ ጭጋና” ያጌዳ።

23ኦርን ዳዊታ፥ “ነዉ አካ፤ ታ ጎዳይ ካቲ ባረና ናሸችያዋ ኦ። በአ፥ ጹግያ ያርሾ ቦራ፥ ኤናዉ ካ ቡክያ ሚሻነ ካ ያርሾ ዛርጋ ታን እማና። ታን ሀ ኡባካ ነዉ እማና” ያጌዳ።

24ሽን ካቲ ዳዊተ ኦርና፥ “ቱይት፥ ቺ! ታን ኩመን ጋትያ ቃንጻደ ሻማና። አያዉ ጎፐ፥ ታን ነባ መና ጎዳዉ አክከ፤ ቃይ ታን ሚሻ ከሳቤናዋ ጹግያ ያርሹዋ ኦደ ያርሽከ” ያጌዳ።

25ሄዋ ድራዉ፥ ዳዊተ ሄ ኡዱማዉ ኡሱፑን ጼቱ ዎርቃ ሳንትምያ እሜዳ። 26ሄዋፐ ጉይያን፥ ዳዊተ ሄ ኮሽያን መና ጎዳዉ ያርሹዋ ያርሽያ ሳኣ ኬጼዳ። ያቲደ ጹግያ ያርሹዋነ እትፐተ ያርሹዋ ያርሼዳ፤ መና ጎዳ ዎስና፥ መና ጎዳይ ጹግያ ያርሹዋ ቦላ ሳሉዋፐ ታማ የዲደ፥ አዉ ዛሬዳ።

27ሄዋፐ ጉይያን፥ መና ጎዳይ ኪታንቻ አዛዝና፥ ኪታንቻይ ባረ ማሻ ሾኮ ዛሬዳ። 28ዳዊተ መና ጎዳይ አ ዎሳዉ ዛሬዳዋ በኢደ፥ ያቡስያ ኦርና ኡዱማን ላኤንዋ ያርሼዳ። 29ሙሴ መላ ቢታን ጊግሴዳ መና ጎዳ ዱንካኒነ ጹግያ ያርሹዋ ያርሽያ ሳአይ ሄ ዎደ ጋባኦናን ጎይንያ ቃ ሳኣን ደኤ። 30ሽን ዳዊተ መና ጎዳ ኪታንቻ ማሻዉ ያዬዳ ድራዉ፥ ጾሳ ኦቻናዉ ሄ ሳኣ ባናዉ ዳንዳይቤና።

Currently Selected:

1 ኦዱዋ 21: DFBE

Highlight

Copy

Compare