1 ኦዱዋ 22

ጌሻ ጎልያ ኬጻናዉ ሀኔዳ ጊጉዋ

(22:1—29:20)

1ሄዋ ድራዉ፥ ዳዊተ፥ “መና ጎዳ ጾሳ ጌሻ ጎልያ ሀዋን ደአናዋ፤ እስራኤልያ አሳይ ጹግያ ያርሹዋ ያርሻና ሳአይ ሀዋ ግዳናዋ” ያጌዳ።

ጌሻ ጎልያ ኬጻናዉ ጊግስያ ጊጉዋ

2ሄዋ ድራዉ፥ ዳዊተ እስራኤልያ ቢታን ደእያ ሀራ ቢታ አሳቱዋ ሺሻናዳን አዛዜዳ። ጾሳ ጌሻ ጎልያ ኬጻናዉ ሹቻ ማስያዋንቱ ሹቻ ማሲደ ሎይናዉ ኡንቱንቱ ግዶፐ ሱንዳ። 3ዳዊተ ፐንግያ ሳንቃ ኦናዉ ምስማርያዉነ ማጻፍያዉ ሀንያ ጮራ ብራታነ ማዛናናዉ ዳንዳየተና፥ ዛው ባይና ናሃስያ ብራታ ጊግሴዳ። 4ሲዶና አሳቱነ ጺሮሳ አሳቱ ዳዊታዉ ዝጋ አህያ ድራዉ፥ ዳዊተ ፓይዱ ባይና ዝጋ ጊግሴዳ። 5ዳዊተ፥ “ታ ናአይ ሶሎሞነ ኦሱዋ ሜዘትቤናነ ያላጋ ናኣ። መና ጎዳዉ ኬጸትያ ጌሻ ጎልያ ቢታ ኡባን ኤረቴዳነ ቦንቼቴዳ፥ ሎኦ ጎልያ ግዳናዉ በሰ። ሄዋ ድራዉ፥ አዉ ኮሽያዋ ታን ጊግሳና” ያጌዳ። ዳዊተ ሀይቃናፐ ካሰቲደ ዳሮባ ጊግስ ዎዳ።

6ሄዋፐ ጉይያን፥ ዳዊተ ባረ ናኣ ሶሎሞና ጼሲደ፥ መና ጎዳዉ እስራኤልያ ጾሳዉ ጌሻ ጎልያ ኬጻናዳን አዛዜዳ። 7ዳዊተ ሶሎሞና፥ “ታ ናአዉ፥ ታን መና ጎዳ ታ ጾሳ ሱንዉ ጌሻ ጎልያ ኬጻናዉ ታ ዎዛናን ቆፓድ።#2 ሳሜላ 7:1-16፤ 1 ኦዱዋ 17:1-14 8ሽን መና ጎዳ ቃላይ ታና፥ ‘ኔን ዳሮ ሱ ጉሳዳ፤ ቃይ ዳሮ ኦላካ ኦለታዳ። ኔን ሀ ሳኣ ቦላን ታ ስንን ዳሮ ሱ ጉሴዳ ድራዉ፥ ታ ሱንዉ ጌሻ ጎልያ ኬጻካ። 9በአ፤ ነዉ እት ሳሮ ናእ የለታናዋ። አ ዩሹዋን ደእያ ሞርከቱዋ ኡባና ታን አ ሳሮ ኦና። አ ሱንይ ሶሎሞና፤ ታን እ ካተቴዳ ላይን እስራኤልያ አሳዉ ሳሮተነ ዎፓ እማና። 10እ ታ ሱንዉ ጌሻ ጎልያ ኬጻና። እ ታ ናኣ ግዳናዋ፤ ታንካ አዉ አዉዋ ግዳና። አ ካዉተ አራታ እስራኤላን መናዉ ምንሳ ኤሳና’ ያጌዳ።

11“ሀእካ ታ ናአዉ፥ መና ጎዳይ ኔናና ግዶ። ጾሳይ ካሰ ነባ ሃሳዬዳዋዳን፥ መና ጎዳ ነ ጾሳይ ጌሻ ጎልያ ኬጻናዋ ኔና ፖልሶ። 12መና ጎዳይ ኔና እስራኤልያ አሳ ቦላ ካትያ ኦያ ዎደ፥ መና ጎዳ ነ ጾሳ ህግያ ናጋናዳን፥ ጾሳይ ነዉ አዳ ኤራተነ አኬካ እሞ። 13መና ጎዳይ ሙሴ ባጋና እስራኤልያ አዛዜዳ አዛዙዋነ ዎጋ ናግያዋ ግዶፐ፥ ኡባይ ነዉ ሀናና። አይነ ባዋ ምና! ያዮፓ ዎይ ዳጋሞፓ!#ኢያሳ 1:6-9 14ታን ዳሮ ቱጋን መና ጎዳ ጌሻ ጎልያ ኬጻናዉ ሄዙ ሻአነ ኦይዱ ጼቱ ኪሎ ግራመ ዴጽያ ዎርቃነ ሀታማነ ኦይዱ ሻአ ኪሎ ግራመ ዴጽያ ብራ ሺሻይ፤ ቃይ ዛዋይ ባይና ናሃስያነ ብራታ ሺሻይ፤ ቃይካ ምነ ሹቻ ጊግሳድ። ግዶፐካ፥ ኔን ሄዋ ቦላ ሀራ ጉጃናዉ ኮሼ። 15ነ ማታን ዳሮ ኦሳንቻቱ ደኢኖ፤ ሹቻ ቆእያዋንቱነ ማስያዋንቱ፥ አናጸቱነ ኡባ ኪታ ኦናዉ ዳንዳይያ ኤራንቻ አሳቱ ደኢኖ። 16ኡንቱንቱ ኦያ ዎርቃዉ፥ ብራዉ፥ ናሃስያዉነ ብራታዉ ዛዋይ ባዋ። ሀእ ኔን ኪታ ዶማ። መና ጎዳይ ኔናና ግዶ” ያጌዳ።

17ዳዊተ እስራኤልያ ካለያዋንቱ ኡባይ ባረ ናኣ ሶሎሞና ማዳናዳን ሀዋዳን ያጊደ አዛዜዳ፤ 18“መና ጎዳይ ህንተንቱ ጾሳይ ህንተናና ደኤኔየ? እ ህንተንታ ኡባ ሳና ሸምፕስቤኔ? ሀ ቢታን ደእያዋንታ እ ታ ኩሽያን አ እሜዳ ድራዉ፥ ሀ ቢታይ መና ጎዳዉነ አ አሳዉ ሞደቴዳ። 19ሀእካ መና ጎዳ ህንተንቱ ጾሳ ኮያናዉ ህንተንቱ ዎዛናነ ህንተንቱ ሸምፑዋ እምተ። መና ጎዳ ሱንዉ ኬጸቴዳ ጌሻ ጎልያ ግዶን መና ጎዳ ቃላ ጫቁዋ ታቦታነ ጾሳ ጌሻ ሚሻቱዋ አሂደ ዎናዳን፥ ህንተንቱ ደንዲደ፥ መና ጎዳ ጾሳ ጌሻ ጎልያ ኬጽተ” ያጌዳ።

Currently Selected:

1 ኦዱዋ 22: DFBE

Highlight

Copy

Compare