1 ኦዱዋ 20
20
ዳዊተ ራባ ካታማ ኦሊደ ኦይቄዳ
(2 ሳሜላ 12:26-31)
1ኦፍንን፥ ካተቱ ኦላዉ ከስያ ዎደ፥ ዮኣበ ኦላንቻቱዋ ካለደ፥ አሞና ጋድያ ዎራጄዳ፤ ማዪደ ራባ ካታማ ዶዴዳ። ሽን ዳዊተ የሩሳላመን ታኬዳ፤ ዮኣበ ራባ ካታማ ኦለቲደ ባይዜዳ።#2 ሳሜላ 11:1 2ሄዋፐ ጉይያን ዳዊተ ዪደ፥ ኡንቱንቱ ካትያ ዎርቃ ካላቻ አ ሁጲያፐ አኬዳ። ካላቻይ ማዛንያ ዎደ ሀታማነ ኦይዱ ኪሎ ግራመ ግዴዳ፤ አ ግዱዋን እንቁዋ ጌተትያ አልኦ ሹቻይ ደኤ። ሄ ካላቻ አክደ፥ ዳዊታ ሁጲያን ዎዳ። ቃይ ዳዊተ ሄ ካታማፐ ሎይ ዳሮ ኦሞዱዋ አኬዳ። 3ያቲደ ካታማን ደእያ አሳ ከሲደ፥ ማጋዝያን፥ ጎማንነ ካልታን ኦስሴዳ። አሞና ካታማቱዋን ደእያ አሳ ኡባካ ሄዋዳን ኦስሴዳ። ሄዋፐ ጉይያን፥ ዳዊተነ አ አሳይ ኡባይ የሩሳላመ ስሜዳ።
ፕልስጼማ አሳቱዋና ኦለቴዳ ኦላቱዋ
(2 ሳሜላ 21:15-22)
4ሄዋፐ ስሚደ፥ ፕልስጼማ አሳቱዋና ገዜራን ኦላይ ደንዴዳ፤ ሁሻፐ ዬዳ ስባካይ አዱሳ ምኖ አሳቱዋ ያራፐ ግዴዳ ስፓያ ዎዳ። ያትና፥ ፕልስጼማቱ ጾነቴድኖ።
5ሄዋፐ ዶምና ፕልስጼማ አሳቱዋና ሀራ ኦላይ ደንዴዳ፤ ያኢራ ናአይ ኤልሀናን ቶራ ቶማይ ሸማይንያ ዋንዳራሻ ኬሻቶ፥ ጋተ ካታማፐ ዬዳ ጎልያዳ እሻ ላህማ ዎዳ።#1 ሳሜላ 17:4-7
6ቃይካ ሀራ ኦላይ ጋተ ካታማን ደንዴዳ። ሄ ሳኣን እት ዎጋ አዱሳ ብታኒ ደኤ። ሄ ብታንያዉ እት እት ኩሽያን ኡሱፑን ብራቱ፥ እት እት ገድያንካ ኡሱፑን ብራቱ፥ ኡባና ላታማነ ኦይዱ ብራቱ ደኢኖ። ሄ ብታኒ አዱሳ ምኖ አሳቱዋ ያራፐ ግዴዳ አሳ። 7ሄ ብታኒ እስራኤላቱዋ ናሴዳ ዎደ፥ ዳዊታ እሻ ሻማ ናአይ ዮናታን አ ዎዳ። 8ሀዋንቱ ጋተ ካታማን ደእያ አዱሳ ምኖ አሳቱዋ ያራቱዋ፤ ኡንቱንቱ ኡባይ ዳዊታ ኩሽያንነ አ አሳ ኩሽያን ሀይቄድኖ።
Currently Selected:
1 ኦዱዋ 20: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
