फिलिप्पीऔ 2
2
मसी के हाँई चाल चलौ
1कैसेकै तुमकै मसी के संग एक होनै मै अगर हिम्मत मिलै है, और बाके पियार सै आराम, और पबित्तर आत्मा को संग मेल-मिलाब और एक दूसरौं के ताँई दया और तरस है, 2तौ मेरी जौ खुसी पूरी कन्नै कै ताँई तुम आपस मै एकई मकसद और एकई पियार, एकई मन और एकई सोच रक्खौ। 3मतलबी और बेकार के घमंड से कुछ काम ना करौ पर दीनता सै एक दूसरे कै अपने सै अच्छो समजौ। 4हर एक आदमी अपनेई फाएदा के ताँई ना सोचै, पर दूसरौं के फाएदा के ताँई बी सोचै। 5जैसो मसी ईसु की सोच ही बैसेई तुमरी बी सोच होए।
6बामै परमेसर के गुन होते भए बी बानै खुद कै परमेसर के बराबर होनै की जबरदस्ती ना करी। 7मगर बानै तौ खुद कै खाली कर दओ और एक दास के जैसो बन गओ और आदमी के हाँई बन गओ। 8और आदमी के रूप मै परकट होकै अपने आपकै दीन करकै और बौ इतनो आगियाँ माननै बारो बन गओ कै बानै अपनी जान तक दे दई बौ बी कुरूस मै। 9इसताँई परमेसर नै बी बाकै सबसै महान बनाओ और बाकै बौ नाम दओ जो सब नामौं मै सबसै बड़ो है। 10ताकि जो सुरग मै, धरती मै और जो धरती के नीचे हैं, बे सबई ईसु के नाम सै घूंटे टेकंगे। 11और पिता परमेसर की महिमा के ताँई सब आदमी जौ मान लंगे कै ईसु मसी ई परभु है।
दुनिया मै जोती के हाँई चमकौ
12इसताँई हे मेरे पियारे दोस्तौ, जैसे तुम हमेसा मेरी बातौं कै बा टैम मानै करै हे जब मैं तुमरे संग हो, और अब जब मैं तुमरे संग ना हौं तौबी तुम माने करौ, और तुम डरते और कांपते भए अपनी अपनी मुक्ति कै पूरो करते जाऔ। 13और जैसो परमेसर कै अच्छो लगो है बैसेई बौ उन बातौं कै पूरो कन्नै के ताँई इच्छा और तागत तुमरे भीतर पैदा करै है। 14सबई काम बिना कुड़कुड़ाए और बिना बैहैस के करे करौ, 15ताकि तुम निरदोस और पबित्तर होकै टेड़े लोग और बुरे रस्ता मै लेजानै बारौं के बीच मै परमेसर की निरदोस औलाद बन जाऔ और आसमान के तारौं के हाँई चमकते रौहौ। 16जिन्दगी के बचन मै मजबूती के संग चलते रौहौ, ताकि मसी के फिर सै लौहट आनै के दिन मै मैंकै जा बात को गर्ब होए कै मेरी जिन्दगी की दौड़ भाज और मैहनत बेकार ना गई। 17और अगर मैंकै तुमरे बिसवास के बलिदान और सेवा के संग अपनो खून बी बहानो पड़ै तौबी मैं खुस हौं और तुम सबके संग खुसी मनांगो। 18तुम बी बैसेई खुस रौह और मेरे संग खुसी मनाऔ।
तीमुथियुस और इपफरूदितुस
19परभु ईसु मै मैंकै उमीद है कै मैं तीमुथियुस कै तुमरे धौंरे जल्दीई भेजौ, ताकि तुमरी खबर सुनकै मेरो बी हौसला बढ़ सकै। 20कैसेकै मेरे धौंरे ऐंसो कोई बी आदमी ना है जो तीमुथियुस के जैसे सच्चे दिल सै तुम लोगौ की भलाई के बारे मै सोचै। 21कैसेकै सबई ईसु मसी की ना पर अपने फाएदा की बातौं मै लगे हैं। 22पर तीमुथियुस नै तुमरे सामने अपनी काबिलियत कै साबित करो है जौ तौ तुम जानौई हौ जैसो लौंड़ा अपने अब्बा के संग काम करै है, बैसेई बानै अच्छी खबर के परचार मै मेरे संग मैहनत करी है। 23मैं उमीद करौं हौं कै जैसेई मैंकै पतो चलैगो कै मेरे संग का होनै बारो है, तबई मैं तुरन्तई तीमुथियुस कै तुमरे धौंरे भेज दंगो। 24और मैंकै बिसवास है कै परभु की सायता सै मैं बी जल्दीई आंगो।
25मैं जौ जरूरी समजौ हौं कै इपफरूदितुस कै तुमरे धौंरे बापस भेज दौं जो मेरो भईया और संग काम कन्नै बारो और संगी सिपाई और तुमरो दूत और जरूरी बातौं मै मेरी सेवा कन्नै बारो है। 26कैसेकै बौ तुम सबई सै मिलनै के ताँई भौत बेचैन रैहबै है और तुम लोगौ नै सुनो हो कै बौ बेमार पड़ गओ है तौ जौ बात सुनकै बौ भौत दुखी हो गओ हो। 27हाँ, बौ बेमार तौ हो और बौ बी इतनो कै जैसे मरई जाऐ, मगर परमेसर नै बाके ऊपर दया करी, और ना सिरप बाके ऊपर बलकन मेरे ऊपर बी ताकि मैंकै दुख के ऊपर दुख ना मिलै। 28इसताँई मेरो मन बी बाकै भेजनै के ताँई भौत उताबलो हो, जिस्सै कै बाकै फिर देक्कै तुम खुस हो जाऔ और मेरी फिकर बी खतम हो जागी। 29और तुम सबई परभु मै बड़ी खुसी के संग बाको सुआगत करौ, और ऐंसे लोगौ को आदर करे करौ। 30कैसेकै बानै मसी के कामौ के ताँई अपनी जान तक की फिकर ना करी और बौ मरई गओ हो; ताकि जो कमी तुमरी ओर सै मेरी सेवा मै भई ही, बाकै पूरो करै।
Currently Selected:
फिलिप्पीऔ 2: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
