1 कुरन्थियों 11
11
1 #
1 कुर 4:16; फिलि 3:17 जैसो मैं मसी कै देक्कै करे करौ हौं तुम बी बैसेई मैंकै देक्कै करे करौ।
पिराथना के बखत मूड़ ढकनो
2मैं तुमरी बड़ाई इसताँई बतकावौं हौं, कैसेकै तुम सिगरी बातौं मै मैंकै याद करौ हौ, और जिन मसी सिक्छाऔ कै मैंनै तुमकै सिकाओ हो उनके ऊपर तुम अच्छे सै चलौ हौ। 3पर मैं चाँहौ हौं कै तुमकै जौ पतो लग जाऐ कै सिगरे आदमिऔ के ऊपर मसी को हक है, और बईयर के ऊपर बाके लोग को हक है, और मसी के ऊपर परमेसर को हक है।
4जो आदमी मूड़ ढक्कै पिराथना करै है, या परमेसर की ओर सै बोलै है, बौ मसी की बेजती करै है, जिसको हमरे ऊपर हक है। 5पर जो बईयर बिना मूड़ ढक्कै पिराथना या परमेसर की ओर सै बोलै है, तौ बौ अपने लोग की बेजती करै है, जिसको हक बाके ऊपर है। कैसेकै बौ बा बईयर जैसी है जो गंजी है। 6अगर कोई बईयर अपनो मूड़ ना ढकै है तौ बौ गंजी हो जाय; अगर बईयर कै बार कटबानो या गंजी होनो सरम की बात लगै है, तौ बौ अपनो मूड़ ढकै।
7आदमी कै अपनो मूड़ ढकनो सई ना है, कैसेकै बौ परमेसर को रूप है और आदमी परमेसर की बड़ाई कै दिखाबै है और बईयर आदमी की बड़ाई कै दिखाबै है। 8मैं ऐंसो इसताँई कैरओ हौं कै, आदमी बईयर सै ना पर बईयर आदमी सै बनी है। 9और आदमी बईयर के ताँई ना पर बईयर आदमी के ताँई बनाई है। 10इसताँई सुरगदूत के बजै सै बईयर कै जौ हक रखनै को चिन्न मिलो है कै बौ अपनो मूड़ ढकै।
11तौबी परभु मै आदमी कै बईयर की जरूरत है, और बईयर कै आदमी की जरूरत है। 12जैसे आदमी सै बईयर आई है तौ बैसेई आदमी को जलम बी बईयर सैई होवै है। पर सिगरी चीज परमेसर सैई आँई हैं। 13तुम खुदई सोचौ, का बईयर कै बिना मूड़ ढके पिराथना कन्नी सई है? 14परमेसर की बनाई भई दुनिया का तुमकै जौ बात ना सिकाबै है कै आदमी के ताँई लम्बे बार रखनो सरम की बात है। 15पर अगर बईयर लम्बे बार रक्खै तौ बाके ताँई इज्जत की बात है, कैसेकै बार बाकै हुनिया के रूप मै देए गए हैं। 16अगर कोई बैहैस कन्नी चाँहै है तौ बौ जौ जान ले कै ना तौ हमरे हिंया जाके अलाबा ऐंसो कोई रिबाज है और नाई परमेसर के बिसवासिऔ की मंडलिऔ मै।
परभु के नाम मै रोटी खानी
(मत्ती 26:26–29; मरकुस 14:22–25; लूका 22:14–20)
17मैं तुमरी बड़ाई ना करौ हौं पर अब एक हुकम देते भए तुमसै कैबौ हौं, तुमरे इखट्टे होनै सै कोई फाएदा ना है, बलकन नुकसान है। 18सबसै पैले मैंनै जौ सुनो हो कै जब तुम बिसवासिऔ की मंडली मै इखट्टे होबौ हौ, तब्बी तुमरे बीच मै फूट पड़ी रैहबै है, और मैं जा बात के ऊपर थोड़ो भौत बिसवास बी करौ हौं। 19तुमरे बीच मै फूट पड़नी तौ हैई। जिस्सै कै जितने तुमरे बीच मै सच्चे हैं, बे लोग सामने आ जाँय।
20इसताँई जब तुम आपस मै एक संग इखट्टे होबौ हौ, तौ परभु के नाम मै रोटी खानै के ताँई इखट्टे ना होबौ हौ, 21बलकन जब तुम परभु के नाम मै रोटी लेबौ हौ तौ तुम्मै सै हर कोई एक दूसरे को पैंड़ो देखे बिनाई बाकै खा लेबै है, पर कुछ आदमी भूँके और कुछ खा-पीकै टैट रैहबैं हैं। 22का तुमरे धौंरे खानै पीनै के ताँई घर ना है? और तुम परमेसर के बिसवासिऔ की मंडली कै नीचो दिखाबौ हौ, और जिनके धौंरे खानै के ताँई कुछ बी ना है उनकै तुम सरम महसूस करबाबौ हौ? अब मैं तुमसै का कैंऔ? का मैं तुमरी बड़ाई बतकाऔं? इन बातौं मै मैं तुमरी बड़ाई ना करंगो।
23कैसेकै जो बात मैंनै तुमकै सिकांई हैं। बे मैंकै परभु सै मिली हैं। जिस रात परभु ईसु कै पकड़बाओ गओ, बानै बा रात रोटी लई, 24और धन्नबाद की पिराथना करकै रोटी को टुकड़ा तोड़ो, और कैई, “जौ मेरो सरीर है, जो तुमरे ताँई है, तुम मैंकै याद कन्नै के ताँई जौई करे करौ।”
25फिर जब रोटी खानै के बाद बानै एक कटोरा लओ और कैई, “जौ कटोरा मेरे खून मै एक नओ करारनामो है। जब कबी तुम इसकै पिऔ, तौ मैंकै याद कन्नै के ताँई जौई करे करौ।” 26जब कबी तुम जा रोटी कै खावौ और जा कटोरा मै सै पिऔ हौ, तौ तुम परभु के आनै तक बाकी मौत को परचार करौ हौ।
27पर जिस किसी की बजै सै परभु के नाम मै रोटी खानै सै और कटोरा मै सै पीनै सै, परमेसर की बेजती होवै है तौ बौ परभु के सरीर और खून के खिलाप दोसी ठैराओ जागो। 28इसताँई आदमी पैले खुद कै परखै और तब जा रोटी कै खाऐ और कटोरा मै सै पिऐ। 29कैसेकै जो कोई परभु के सरीर कै बिना पैचाने जाकै खावै-पीवै है, तौ बौ इस खानै पीनै की बजै सै सजा को हकदार होगो। 30इसताँई तुम्मै सै भौस्से कमजोर और बेमार हैं, और कुछ लोग मर गए हैं। 31अगर हमनै खुद कै पैलेई अच्छे सै परख लओ होतो, तौ हमकै सजा ना मिलती। 32पर जब्बी परभु हमकै सजा देवै है, तौ बौ हमकै सुदान्नै के ताँई देवै है। जिस्सै कै हम जा दुनिया के लोगौ के संग दोसी ना बनै।
33इसताँई ओ मेरे पियारे भईयौ और बहनौ, जब तुम परभु के नाम मै रोटी खानै के ताँई इखट्टे होबौ हौ, तौ एक दूसरे को पैंड़ो देखे करौ। 34अगर किसी कै भूँक लगै है, तौ बौ अपने घर सै खाकै आय। जिस्सै कै तुम सबई को इखट्टो होनो तुमरे ताँई सजा की बजै ना बनै। बाकी की बातौं कै मैं आकै ठीक करंगो।
Currently Selected:
1 कुरन्थियों 11: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
