1 कुरन्थियों 10
10
ईसराइल के इतिहास सै सीक
1हे भईयौ और बहनौ, मैं चाँहौ हौं कै तुम जौ जानलो कै हमरे सबई बुजरगौं नै बादर की छाँई के आड़ मै होते भए लाल समन्दर पार करो हो। 2बे सबई बादर के नीचे और समन्दर के बीच मै मूसा के चेला बने और जल संस्कार लओ। 3और सबई नै एकई आत्मिक रोटी खाई। 4और सबई नै एकई आत्मिक जल पिओ, कैसेकै बे बा आत्मिक चट्टान सै पीवै हे, जो उनके संग चलै ही और बौ चट्टान मसी हो। 5पर उनमै सै ऐंसे भौस्से लोग हैं जिनसै परमेसर खुस ना हो, इसताँई बे बियाबान मै मारे गए।
6जौ बात हमरे ताँई सीक की है कै, हमकै बी बुरी चीजौ को लालच ना कन्नो चँईऐ, जैसे उन्नै लालच करो हो। 7मूरती पूजा कन्नै बारे मत बनौ, जैसे कै उनमै सै भौस्से लोग हे। जैसो पबित्तर सास्तर मै लिखो है कै, “लोग खा-पीकै मतबाले होकै उठे और नाचल लगे।” 8और ना हमकै कुकरम कन्नो चँईऐ, जैसे उनमै सै भौतौं नै करो हो, इसताँई उनमै सै तेईस हजार एकई दिन मै मर गए। 9और ना हम मसी कै परखैं, जैसो कै उनमै सै भौत लोगौ नै करो और बे साँपौ के काठनै सै मर गए। 10ना तुम परमेसर कै कुड़कुड़ाऔ, जैसो कै उनमै सै भौस्सेऔ नै करो, और नास कन्नै बारे सुरगदूत नै उनको नास करो। 11जे सबई बात इसताँई भई हीं कै हमरे ताँई उदाहरन रैंह। जे हमकै होसिआर कन्नै के ताँई लिखी गंई, जो आखरी बखत मै जी रए हैं। 12अगर कोई ऐंसो सोचै है कै, मैं मजबूताई सै खड़ो हौं, तौ होसिआर रैहकै, कहीं बौ गिर ना पड़ै। 13जैसे तुमकै परखो गओ है बैसेई दूसरे लोगौ कै परखो गओ हो। परमेसर बिसवासजोग है बौ तुमकै तुमरी सैहन सकति सै बाहार परखनै के ताँई ना छोड़ैगो, बलकन परखनै के संग-संग बौ बासै बचनै की रस्ता बी दिखागो, जिस्सै तुम उस्सै गुजर सकौ।
मूरती पूजा को बिरोद
14इसताँई ओ मेरे पियारे दोस्तौ, मूरती पूजा सै बचे रौह। 15मैं तुम लोगौ कै अकलमन्द समजकै जौ कैरओ हौं। तुम खुद मेरी बातौं कै परखौ। 16#मत्ती 26:26–28; मरकु 14:22–24; लूका 22:19,20धन्नबाद को बौ कटोरा जिसके ताँई हम धन्नबाद देवै हैं, तौ का हम मसी के खून मै साजेदार ना हैं? और बौ रोटी जिसकै हम तोड़ै हैं, तौ का हम मसी के सरीर के साजेदार ना हैं? 17एकई रोटी है और जाको मतलब है कै हम जो भौस्से हैं, एकई सरीर हैं, कैसेकै हम सबई एक रोटी मै साजेदार हैं।
18उन ईसराइलिऔ के बारे मै सोचौ, जो बलि करी भई चीजौ कै खावै हैं, तौ का बे परमेसर के बेदी के साजेदार ना हैं? 19मेरो बोलनै को मतलब जौ है कै मूरती या बाके अग्गे चढ़ाई भई चीजौ को कोई मतलब ना है। 20पर मेरे बोलनै को मतलब जौ है कै अबिसवासी लोग जिन चीजौ को चढ़ाबो चढ़ाबै हैं। बौ परमेसर के ताँई ना पर दुसट आत्माऔ के ताँई चढ़ाबै हैं। इसताँई मैं ना चाँहौ कै तुम दुसट आत्माऔ के संग किसी बी बात मै साती बनौ। 21तुम परभु के और दुसट आत्माऔ दौनौ के कटोरा मै सै ना पी सकौ हौ। तुम परभु और दुसट आत्माऔ दौनौ के संग बैठकै रोटी ना खा सकौ हौ। 22का हम परभु कै घुस्सा दिब्बावै हैं? का हम्मै बासै जादा तागत है?
सबई कुछ बाकी बड़ाई के ताँई करौ
23 #
1 कुर 6:12
तुमकै कैओ गओ है कै, सबई चीज हमरे ताँई सई हैं। पर सबई फाएदा बारी ना हैं। सबई चीज हमरे ताँई सई तौ हैं, पर सबई चीजौ सै तरक्की ना होवै है। 24तुम अपने ताँई फिकर काए करौ हौ, पर दूसरौं की भलाई के ताँई बी सोचौ।
25जो सिकार बजार मै बिकै है, बाकै खाऔ और अपने मन की समज सै बाके बारे मै सबाल मत पूँछौ। 26कैसेकै पबित्तर सास्तर मै लिखो है, “जौ धरती और जो कुछ जामै है, बौ सिगरो परभु को है।”
27बे लोग जो बिसवास ना करै हैं, उनमै सै अगर कोई तुमरो नौहता करै, और तुम जानो चाँहौ हौ, तौ जो कुछ तुमरे सामने परसो गओ है, अपने मन की समज सै बिना कुछ सबाल पूँछे सबई कुछ खाऔ। 28पर कोई तुमसै कैए कै, “जौ मूरती को चढ़ाओ भओ परसाद है,” तौ बा आदमी के ताँई जिसनै तेकै कैई है, और मन की समज की बजै सै ना खाऔ।
29मैं तेरी मन की समज के बारे मै ना पर बा दूसरे आदमी की मन की समज के बारे मै कैरओ हौं कै, मेरी आजादी दूसरे की मन की समज सै काए बंधी रैह? 30अगर मैं धन्नबाद की पिराथना कन्नै के बाद रोटी खावौं हौं तौ मैं जिस खाने के ताँई परमेसर कै धन्नबाद देवौ हौं। बा खाने के ताँई मेरी बदनामी कन्नै को किसी कै हक ना है। 31इसताँई तुम लोग चाँहे खाऔ-पिऔ, या जो कुछ बी करौ, सब परमेसर की बड़ाई के ताँई करौ। 32तुम लोग ना तौ यहूदिऔं के ताँई, ना गैर यहूदी लोगौ के ताँई और ना परमेसर के बिसवासिऔ की मंडली के ताँई ठोकर की बजै बनौ। 33जैसे मैं सबई बातौं मै सबई कै खुस रक्खौ हौं, और अपने फाएदा की ना पर औरौं के फाएदा की सोचौ हौं, जिस्सै कै बे मुक्ति पा सकैं।
Currently Selected:
1 कुरन्थियों 10: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
