रोमी 7

बेहाको एक उदाहरण

1हे मेरे ददाभइयओ, तुम जानत हओ, कि मए जा बात नियम कानुन जानन बारेनसे कहानडटो हओं। जब तक आदमी जिन्दा रहात हए तबसम इकल्लो आदमीमे नियम कानुनको अधिकार लागु होत हए।

2उदाहरणके ताहीं, एक बेहा भइ बैयर बोको लोगा जिन्दा होनतक अपन लोगा सँग कानुनी रुपमे बँधी होत हए, पर अगर बक लोगा मरिगओ कहेसे लोगा सँगको नियम कानुनसे बो मुक्त हुइजात हए। 3अइसियए करके लोगा जिन्दा होतएमे फिर बो बैयर औरो लोगा सँग बैठन गइ कहेसे बो व्यभिचारी कहेजाबैगी। पर लोगा मरिगओ कहेसे बो बैयर नियम कानुनसे मुक्त हुइजएहए, और औरो लोगा सँग बेहा करलेहए कहेसे फिर बो व्यभिचारी नाए हुइहए।

4तभीमारे हे बिश्वासी ददाभइयओ, जब तुम ख्रीष्टके सँग मरिगए, तओ तुम नियम कानुनके अधिकारके ताहीं फिर मरिगए। अब तुम ख्रीष्टके हओ जो मरके जिन्दा हुइगओ हए, ताकी तुम परमेश्वरके ताहीं फलदायी जीबन जिइ पाबओ। 5काहेकी जब हम हमर पापी स्वभाबके अधिनमे रहएं तओ पापमय इच्छा हमर भितर काम करत रहए। और नियम कानुन, जे बुरे इच्छन्के जगाएदइ, मौतको फल उत्पन्न करनके ताहीं हमर शरीरमे काम करत रहएं।

6पर हम अब बो नियम कानुनके ताहीं मरिगए हएं जौन एकचोटी हमके बन्दी बनाएलै रहए, और अब हम नियम कानुनसे छुटीगए हएं, ताकी बाकी आत्माकी आज्ञा मानके अब हम परमेश्वरको सेवा नयाँ तरिकासे कर सकएं, नाएकी पुरानो तरिकासे, जोमे लिखो भओ बातके पालन करनके पणत होबए।

नियम कानुन और पाप

7तओ हम का कहाएं? का नियम कानुन पाप हए? नाए! बिरकुलए नाए! बल्कि जा नियम कानुन रहए, जो मोके मिर पाप दिखाइ। मए जानो, कि लालच करन पाप हए काहेकी नियम कानुनमे जा लिखो हए कि, “लालच मत् करओ।” अगर नियम कानुनमे जा नाए लिखो हुइतो कहेसे मए जा नाए जानपैतो, कि लालच करन गलत हए। 8पर पाप जा आज्ञाको इस्तमाल करके सब मेलके लालचको पैदा करी, काहेकी नियम कानुन बिना पापकी कोइ शक्ति नैयाँ।

9मए त पहिले नियम कानुनके सम्झे बिना जीबन जीइत रहओं, पर जब मए नियम कानुनके जानो, तओ पापको शक्ति बढन लागो, और मए परमेश्वरसे दुर हुइगओ। 10बो आज्ञा, जो मेरे जिनको कारण बनन बारो रहए, बहे आज्ञा मोके परमेश्वरसे अलग करबाइ। 11काहेकी पाप जा आज्ञाको इस्तमाल करके मोके धोखा दइ, और बहेके द्वारा मोके परमेश्वरसे अलग करबाइ। 12तओ हम जा कहे सकत हएं, कि नियम कानुन पबित्र हए। और आज्ञा पबित्र, धर्मी और अच्छी हए।

पापको छुटकारा नियम कानुन द्वारा नाए होतहए

13तओ का नियम कानुन जो अच्छी रहए, बहे मोके परमेश्वरसे अलग करबाइ? नाए! बिरकुलए नाए! पर जा पाप रहए जौन अइसो करी। पाप बहे नियम कानुनके इस्तमाल करी जो अच्छी रहए। और मोके परमेश्वरसे अलग करबाइ। जहे परकार पाप दिखाइ, कि बो खासमे का हए। और आज्ञा फिर दिखाइ, कि पाप पुरा रुपसे खराब हए। 14काहेकी हम जान्त हएं, कि नियम कानुन त आत्मिक हए, पर मए एक आदमी हओं और मए पापको नोकर हओं। 15मए जो बात करत हओं मए अपनए नाए बुझत हओं, काहेकी मए जो ठिक काम चाँहत हओं बो मए नाए कर्पात हओं पर जोसे मोके घृणा आत हए बहे मए करत हओं। 16और अगर जो मए नाए चाँहत हओं बहे खराब काम मए करबैठत हओं कहेसे तओ मए मानलेत हओं, कि नियम कानुन अच्छी हए। 17जा बेरा खराब काम करन बारो मए नाए, बल्कि जा मेरे भित्तर भओ पाप करीहए। 18काहेकी मए जानत हओं, कि मोएमे अर्थात् मेरे पापमय आदमीको स्वभाबमे कोइ अच्छी चीज बास नाए करत हए, भले काम करनके ताहीं इच्छा त मोएमे हएं पर उनके करनके मोसे नाए हुइपात हए। 19काहेकी असल काम जो मए करन चाँहत हओं बा मए नाए करत हओं, पर खराब काम, जो मए करन नाए चाँहत हओं, बहे मए करेकर्त हओं। 20अब मए जो इच्छा नाए करत हओं, बहे करत हओं कहेसे बो करन बारो मए नाए हओं, पर मिर भितर रहान बारो पाप हए।

21जहेमारे अच्छो काम करन ढुणतए-ढुणत फिर मए बहे करत हओं जो खराब हए। जहे नियम कानुन मेरे जीबनमे काम करो अनुभव मए करत हओं। 22काहेकी मए अपनो पुरा मनसे त परमेश्वरको नियम कानुनसे बहुत खुसी राहात हओं। 23पर मिर शरीरको अंगमे भओ दुस्रो नियम मिर हृदयमे भओ नियम कानुन सँग युद्ध करत हए, और मिर शरीरको अंगमे भओ पापको नियम मोके पापको अधिनमे करत हए।

24मए कित्तो दुखी आदमी हओं! मोके जा आत्मिक मृत्युसे कौन छुटाबैगो? 25मए परमेश्वरके धन्यबाद देत हओं, काहेकी बा एक हए जौन मोके येशू ख्रीष्ट, हमर प्रभुके कारणसे बचात हए। मिर हृदयमे मए परमेश्वरको नियम कानुन पालन करन चाँहत हओं, पर मिर पापी स्वभाबके कारण मए लगातर पाप करबैठत हओं।

Currently Selected:

रोमी 7: THRNT

Highlight

Copy

Compare