रोमी 6

पापमे मृत्यु, ख्रीष्टमे जीबन

1तओ हम का कहामएं? कि परमेश्वर अपने अनुग्रहके कारण हमर पापनके क्षमा करत हए। पर हम अइसे नाए सोँचएं, कि हम पाप करतए रहामएं। 2नाए! बिरकुल नाए! हम पापके ताहीं मरिगए हएं, जहेमारे हमए लगातार पापमय काम करनके नाए चाहो। 3हम जानत हएं, कि जब हम ख्रीष्ट येशूमे बप्तिस्मा लए तओ हम एक तरिकासे बाके सँग मरिगए। 4जहेमारे जब हम बप्तिस्मा लए तओ जा अइसो रहए, जैसे हम ख्रीष्टके सँग मरिगए और बाके सँग दफ्नाए गए, ताकी जैसे ख्रीष्ट दौवा परमेश्वरकी महिमाके द्वारा मरो भओ मैसे जिन्दा करोगओ, उइसीयए हम फिर एक नयाँ जीबन जिमंगे।

5अगर हम बप्तिस्माके द्वारा बाकी मृत्युमे बाके सँग एकजुट भए हएं, तओ नेहात्तओ बाको मरके जिन्दा होनके समयमे फिर बाके सँग एकजुट हुइ जामंगे। 6काहेकी हम जानत हएं, कि हमर पुरानो पापमय स्वभाब, ख्रीष्ट येशूके सँग क्रूसमे चढाओगओ, ताकी हमर शरीरमे पापमए स्वभाब नाश हुइजाबए और अब अइसो हम पापको कमैया नाए होमएं।

7काहेकी जब हम ख्रीष्टके सँग मरिगए तओ हम पापको शक्तिसे मुक्त हुइगए। 8जहेमारे अगर हम ख्रीष्टके सँग मारे गए। तओ हमर बिश्वास जहेहए, कि बाके सँग जिमंगेफिर, 9काहेकी हम जान्त हएं, कि ख्रीष्ट मरे भए मैसे जिन्दा हुइके उठो और कभी फिर नाए मरैगो। मृत्युके बाके उपर अब कोइ अधिकार नाए हए। 10काहेकी जब ख्रीष्ट मरो, तओ बा एकए चोटी सब आदमीनके ताहीं मरिगओ, पर अब बा जिन्दा हए और परमेश्वरके आदर देनके ताहीं जिन्दा हए। 11अइसियए तुम फिर अपनएके पापके शक्तिके ताहीं मरे भए, पर ख्रीष्ट येशूमे परमेश्वरको सेवा करनके ताहीं जीइत हओ, करके सम्झओ।

12जहेमारे पापमय इच्छन्के अपने जीबनमे राज्य करन मतदेओ, ताकी अपनी पापमय इच्छन्के अनुसार काम नाए करसकओ। 13और अइसियए करके शरीरके अंगके खराब उदेश्यके ताहीं इस्तमाल होनके मतदेओ, पर अपनएके मरे भए मैसे जीइउठो करके जानके, अपने जीबन परमेश्वरके सौँप देओ, और अपने शरीरको अंगके धार्मिक उदेश्यके ताहीं इस्तमाल होनके ताहीं अपनो जीबनके पुरो रुपसे परमेश्वरके सौँप देओ। 14तओ पापके तुमर उपर कोइ अधिकार नाए हुइहए, काहेकी तुम मोशाको नियम कानुनके अधिनमे नाए, पर परमेश्वरके अनुग्रहके अधिनमे जीइत हओ।

धार्मिकताके कमैया

15काहेकी हम नियम कानुनके अधिनमे नाए, पर परमेश्वरके अनुग्रहके अधिनमे हएं, जहेमारे हमके पाप नाए करन चाहो। 16तुम जानत हओ, कि जब तुम कोइके कमैया हओ कहेसे बो आदमी तुमर मालिक हुइजात हए और तुमके बहे करन चाहो जो बो कहात हए। तुम पापके दास हुइ सकत हओ, जो मृत्यु घेन लैजात हए, याफिर तुम परमेश्वरको आज्ञापालन करसकत हओ, जो धार्मिक जीबन घेन लैजात हए। 17तुम पापको कमैया होए करत रहओ, पर अब तुम बहे शिक्षन्के पालन करेहओ, जो तुमके मिलो। जहेमारे मए परमेश्वरके धन्यबाद करत हओं। 18और परमेश्वर तुमके पापको शक्तिसे छुणाएके कारणसे तुम परमेश्वरके दास बनिगए, ताकी तुम बहे करओ जो सही हए।

19मए एक साधारण उदाहरणके इस्तमाल करके बतात हओं। जैसे तुम, अपने शरीरके अंगके अशुद्धता और अधर्म कामके ताहीं सौँपे गए रहओ, उइसीयए अब अपने अंगके पबित्रताके ताहीं धर्मी जीबन जिनन्के ताहीं सौँप देओ। 20जब तुम पापके दास रहओ, तओ तुम बो करनके लायक नाए रहओ, जो सही हए। 21तुम खराब काम करत रहओ, और अब तुमके बे काम करोके कारणसे सरम लगत हए। तओ तुमके का प्राप्त भओ? बे काम सिरफ मृत्यु लात हएं।

22पर अब पापसे स्वतन्त्र हुइके और परमेश्वरके दास बनके अब तुम बेहीं कामके करत हओ जो पबित्रता घेन लैजात हए। और जा तुमके अन्तमे कभी फिर नाश नाए होन बारो जीबनमे पुगबैगो। 23काहेकी पापको परिणाम मृत्यु हए, पर हमर प्रभु येशू ख्रीष्टमे कभी फिर नाश नाए होन बारो जीबन जिइनो सेँतएमे देन बारो परमेश्वरको बरदान हए।

Currently Selected:

रोमी 6: THRNT

Highlight

Copy

Compare