रोमी 3

परमेश्वरको बिश्वासयोग्यता

1कुछ आदमी पुँछसकत हएं, का यहूदीनके खतना करे फाइदा हए? 2हाँ, एक यहूदी होनको बहुत फाइदा हए। सबसे महत्त्वपूर्ण जा हए, कि परमेश्वरको सन्देश उनके सौँपो गओ। 3अगर कुछ यहूदी परमेश्वरमे बिश्वासयोग्य नाए रहएं तओ का भओ? तओ का जाको मतलब जा हए, कि परमेश्वर उनके सँग करो भओ अपनो बाचाके पुरा करनमे बिश्वासयोग्य नाए होबैगो? 4नाए! बिरकुल नाए! बल्कि परमेश्वर सदा सच्चो मस्कत हए और हर एक आदमी झुठा ठहिरे, जैसे पबित्र-शास्त्र परमेश्वरके बारेमे कहात हए,

“तुमर बोलो भओ बातमे ठिक हए कहिके आदमी देखंगे,

और फैसला होन बेला तुमरुए जीत होबैगो।”

5पर अगर हमर दुष्ट काम, परमेश्वरको धार्मिकता ठहिराए देतहए, तओ हम का कहामएं? तओ का परमेश्वरके क्रोधित होनो, और हमएं दण्ड देनो गलत हए? कित्नो आदमी अइसियए सोँचत हएं। 6नाए! बिरकुल नाए! अगर परमेश्वर हम यहूदीनको न्याय करनमे सही नाए हए, तओ बा संसारके आदमीनको न्याय कैसे करपाबैगो? 7कुछ आदमी कहेसकत हएं, “पर अगर मिर झुठ परमेश्वरको सत्यताके बढात हए और बाके औ जद्धा महिमा मिलत हए कहेसे बा कैसे मिर न्याय कर सकत हए और मोए एक पापीके रुपमे दोषी ठहिराए सकत हए?” 8कुछ आदमी जा कहिके हाम्रे उपर दोष लगान सिकत हएं, “आओ हम बुरे काम करएं, ताकी जासे अच्छाइ निक्रए।” जो आदमी मेरे बारेमे अइसियए बात कहात हएं, बे दण्ड पानके लायक हएं।

धर्मी कोइ नाए हए

9तओ हम का कहेसकत हएं? का, हम यहूदी आदमी, गैर-यहूदी आदमीनसे जद्धा अच्छे हएं? नाए! बिरकुल नाए! काहेकी हम यहूदी और ग्रीक दुनौके उपर जा दोष लग्गओ हए, कि बे सबके-सब पापको शक्तिके काबुमे हएं। 10जइसे कि पबित्र-शास्त्र कहात हए,

“परमेश्वरको नजरमे कोइ फिर धार्मि नाए हए, एकौ नाए।

11अच्छो बात बुझन बारो नेहात्तओ कोइ नैयाँ;

कोइ फिर परमेश्वरके जानन नाए चाँहत हए।

12बे परमेश्वरके इन्कार करी हएं, सबके-सब बाके ताहीं काम नाए लगन बारे हुइगए हएं;

भलाइ काम करन बारे कोइ नैयाँ, एकौ नाए हएं।

13बिनको मुँहुँ खुलो भओ गिन्धान बारो चिहान कता हए, काहेकी जो बात बे मस्कत हएं बे बात खराब हएं।

बे अपने शब्दके इस्तमाल अपनो आदमीनके धोखा देनके ताहीं करत हएं;

और जो कुछ बे कहात हएं, बो साँपको बिष कता बिनाशकारी होत हए।

14और उनको बातचित सरापन बारो और करुवान बारोसे भरोहए।

15बे नुक्सान करनमे और खुन बहानमे तेज हएं।

16बे जहाँ फिर जात हएं हुवाँ बिनाश करत हएं और पिडा लात हएं।

17बे शान्तिसे रहानके नाए जानत हएं।

18उनमे परमेश्वरको कोइ नाए हए।”

19हम जानत हएं, कि नियम कानुन जो कुछ कहात हए, बो उन्हीनसे कहात हए जो नियम कानुनके अधिनमे हएं जहेमारे, ताकी आदमीनके बहाना बनानसे रोक पाबए और संसारके सब आदमी परमेश्वरके न्यायके अधिनमे होमएं। 20जहेमारे नियम कानुनके पालन करन बारे कोइ फिर परमेश्वरके अग्गु धर्मी नाए ठहिरैगो काहेकी नियम कानुन त आदमीनको करोभओ पापके चिन्हाए देतहए।

बिश्वासके द्वारा परमेश्वरको धार्मिकता

21पर अब मोशाको नियम कानुनके सब नियमके पालन करे बिना परमेश्वरके अग्गु हम धर्मी ठहिरे जामंगे। मोशाको नियम कानुनमे और अगमबक्तनको किताबमे बहुत समय पहिले जा लिखो रहए, कि कैसे हम परमेश्वरके द्वारा धार्मि बनाए गए हएं। 22अइसियए परमेश्वर, येशू ख्रीष्टमे बिश्वास करन बारे सबएके धर्मी ठहिरात हए। काहेकी सब आदमी एक समान हएं।

23काहेकी सबए पाप करिहएं और परमेश्वरके घेनसे मिलन बारो महिमाके नाए पाइ हएं। 24पर परमेश्वर अपनो अनुग्रहसे हमके येशू ख्रीष्टके द्वारा हमर पापनको दण्डसे छुटकारा करत हए, हम कुछ करे बिना परमेश्वर हमके धार्मि घोषित करी हए।

25परमेश्वर, ख्रीष्ट येशूके हमर ताहीं पाप क्षमाको बलिदान स्वरुप दइके ख्रीष्टको खुन हमर ताहीं बहाओ गओ हए कहिके बिश्वास करन बारे आदमीनको पाप मिटाए दइ हए। परमेश्वर पापको सजाय ख्रीष्टमे दइके अपनएके न्यायी दिखाइ। परमेश्वर ख्रीष्ट आनसे पहिले अपनो गुस्सा थामके आदमीके पापको सजाय नाए दइ। 26परमेश्वर अब जा युगमे अपनो न्याय दिखनके ताहीं आदमीनको पाप हटाएके उनके धर्मी ठहिरात हए। अइसियए येशूमे बिश्वास करन बारे सबके परमेश्वर धर्मी ठहिरात हए। काहेकी परमेश्वर अपनए धर्मी हए।

27तओ, का अइसो कुछ हए, जोके बारेमे हम घमण्ड कर सकएं? घमण्ड करनको त बातए नैयाँ। कौनछो नियमके कारणसे हम घमण्ड करएं? का जा जहे कारण हए, कि हम नियम कानुनके पालन करत हएं? नाए! बिरकुल नाए! बल्कि, येशू ख्रीष्टमे हमर बिश्वासको कारण हममे धर्म-कर्मको घमण्ड करनकी बातए नाए आत हए। 28जहेमारे हम जानत हएं, कि हम येशू ख्रीष्टमे सिर्फ बिश्वासएसे परमेश्वरके सँग धर्मी ठहिरत हएं, जा नाएकी मोशाको नियम कानुनके पालन करनके कारण। 29का परमेश्वर सिर्फ यहूदीनको परमेश्वर हए? का गैर-यहूदी आदमीनको परमेश्वर नैयाँ? हाँ, बा गैर-यहूदीनको फिर परमेश्वर हए।

30काहेकी एकए परमेश्वर हए, जो खतना भएन बारेनके और खतना नाएभए बारेनके बिनको बिश्वासके आधारमे धर्मी ठहिरात हए। 31तओ का, हम नियम कानुनके बिश्वासके द्वारा बेकामको बनात हएं? नाए! बिरकुल नाए! बल्कि हम नियम कानुनके प्रमाणित करत हएं, कि जा परमेश्वर मोशाके द्वारा दइ रहए।

Currently Selected:

रोमी 3: THRNT

Highlight

Copy

Compare