रोमी 2

परमेश्वरको धार्मिक न्याय

1शायद तुम अइसो सोँचत हुइहओ, कि तुम दुस्रोके दोष लगाए सकत हओ। पर हे दोष लगान बारे, तुम जो औरेके उपर दोष लगात हओ, तुम कोइ बहाना नाए बनाए पाबैगे; काहेकी जौन बातमे तुम औरेके दोष लगात हओ, बहे बातमे तुम अपनएके फिर दोषी ठहिरात हओ। जहेमारे जौन कामको बधी तुम औरेनके लगात हओ, बो काम तुम अपना फिर करत हओ। 2और हम जानत हएं, कि परमेश्वर अपने न्यायमे, अइसे हर कोइ आदमीके दण्ड देबैगो जो अइसे काम करत हए।

3और तुम, जो अइसे-अइसे काम करन बारेके उपर दोष लगात हओ, और अपनए उइसो काम करत हओ कहेसे; का तुम जा सम्झत हओ, कि तुम परमेश्वरको दण्डसे बच्जाबैगे? 4का तुम परमेश्वरकी भलाइ, सहनशीलता और धिरजरुपी धनके तुच्छ मानत हओ? और तुम जा नाए सम्झत हओ, कि परमेश्वरकी भलाइ तुमके पाप करन छोडके परमेश्वर घेन घुमन सिखात हए?

5पर तुम जिद्दी हओ और पाप बन्द करनसे इन्कार करत हओ। बो दिन जब परमेश्वर अपनो क्रोध दिखाबैगो, जोमे परमेश्वरको सच्चो दण्ड प्रकट होबैगो। जब परमेश्वर न्याय करैगो तओ, बा तुमके और जद्धा कष्ट देबैगो। 6परमेश्वर हर आदमीनके उनको काम अनुसार प्रतिफल देहए। 7जौन असल काममे स्थिर रहिके महिमा, आदर और अमरकी खोजिमे हए, उनके परमेश्वर कभी फिर नाश नाए होन बारो जीबन देबैगो; 8पर जो आदमी केवल अपनएके इकल्लो प्रेम करत हए, और सत्यके नाए मानत हए, बल्कि दुष्ट काम करन चाँहत हए, उनके उपर परमेश्वरको अपनो क्रोध और दिक्क अखनाबैगो। 9और दुख, संकट हर एक आदमीके उपर आबैगो जो खराब काम करत हएं, परमेश्वर पहिले यहूदी आदमीनके न्याय करैगो। तओ फिर उनके, जो ग्रीक देशके आदमी हएं।

10पर महिमा, आदर और शान्ति हर आदमीके मिलैगो, जो असल काम करत हए। परमेश्वर पहिले यहूदी आदमीनके न्याय करैगो। तओ फिर उनके, जो ग्रीक देशके आदमी हएं। 11काहेकी परमेश्वर सब आदमीनके एक समान ब्यबहार करत हए। 12जहेमारे, कि जौन मोशाको नियम कानुन पाए बिना पाप करी, बे बिना नियम कानुनके परमेश्वरके द्वारा दण्ड पामङगे। और जौन मोशाको नियम कानुन पाएके पाप करीहए, उनको दण्ड नियम कानुन अनुसार होबैगो। 13काहेकी परमेश्वरकी दृष्टिमे धार्मि बे आदमी नाए हएं, जो नियम कानुनके सुनत इकल्लो हएं। पर धार्मि बे हएं जो नियम कानुनके सुनके पालन करत हएं। 14फिर जब अन्यजाति आदमी, जौनके ठिन नियम कानुन नाए हए, बे स्वाभाविक रुपसे मोशाको नियम कानुनमे पाए जान बारे काम मैसे कुछ कामके करत हएं। बे साबित करी हएं, कि बिनको अपनो मनमे ब्यवस्था हए। बे जानत हएं, कि का करनके हए और का नाए करनके हए। 15बे दिखात हएं, कि परमेश्वरके द्वारा दओगओ मोशाको नियम कानुन उनके मनमे लिखो हए। काहेकी उनको अप्नो सोँच दिखात हए, कि जा सच्चो हए। काहेकी उनको बिचार या त उनके उपर दोष लगात हए। या त बे बतात हएं, कि बे सही कर रहे हएं। 16जा बहे दिन होबैगो जब परमेश्वर अच्छो समाचार, जोको मए परचार करत हओं, बहेके अनुसार येशू ख्रीष्ट आदमीनको गुप्त बातकी न्याय करैगो।

यहूदी और मोशाको नियम कानुन

17पर तुम अपनएके यहूदी कहात हओ और मोशाको नियम कानुनमे भरोसा करत हओ। और घमण्ड करत हओ, कि तुम परमेश्वरके खास आदमी हओ। 18और तुम जानत हओ, कि परमेश्वर तुमसे का करबान चाँहत हए। और तुम जा फिर जानत हओ, कि का सही हए। काहेकी तुमके मोशाको नियम कानुन सिखाओ गओ हए। 19और अगर तुम जा भरोसा करत हओ, कि अन्धरा आदमीनके परमेश्वरको डगर दिखान चाहो। और तुम, अंधियारोमे रहेभए आदमीनके ताहीं एक ज्योति कता हओ। 20और मुरख आदमीनके ठिक बात सिखान बारे, और बालकनके शिक्षा देत हओ। और तुमके जा बातमे भरोसा हए। काहेकी तुमर ठिन परमेश्वरको नियम कानुन हए। तुम सब चीज पुरा रुपमे जानत हओ। और तुम जो कहात हओ, बो बात बिरकुल सच्चो हए।

21जहेमारे तुम, जो औरेन्के शिक्षा देत हओ, बहे शिक्षा अपनएके काहे नाए देत हओ? तुम औरेनके जा शिक्षा देत हओ कि, “चोरी मत् करियओ” का तुम अपना नाए चुरात हओ? 22तुम कहात हओ, “व्यभिचार मत् करियओ” का तुम अपनए व्यभिचार नाए करत हओ? मूर्तिके घृणा करन बारे, का तुम अपनए मन्दिरके नाए लुटत हओ? 23तुमर ठिन परमेश्वरको नियम कानुन हए कहिके घमण्ड हए, का तुम बहे ब्यवस्था नाए मानके परमेश्वरके अनादर करत हओ? 24काहेकी पबित्र-शास्त्रमे जा लिखो हए, “तुम यहूदीके बुरे कामके कारण गैर-यहूदी आदमी परमेश्वरको नाउँके बदनाम करत हएं।”

25मए तुमसे कुछ कहानके चाँहत हओं। तुमर खतना करोजानको मोल केवल तब्ही इकल्लो हए, जब तुम नियम कानुनके पालन करत हओ। पर अगर तुम बो नाए करत हओ जो ब्यवस्था कहात हए, तओ तुम खतना करेभए यहूदी आदमी बेहीं आदमी कता हओ, जो यहूदी नाए हएं और जौनको खतना नाए भओ हए। 26अगर खतना रहित आदमी नियम कानुनके नियमके पालन करत हए तओ परमेश्वर अइसे आदमीके बहे आदमी कता देखत हए जौनको खतना भओ हए। 27तुम खतना करेभए यहूदी, खतना नाए करेभए गैर-यहूदीनसे दोषी ठहिरेजाबैगे। काहेकी तुम मोशाको लिखो भओ बातके और खतना पाएके फिर नियम कानुनके पालन नाए करत हओ। पर खतना नाए लगाएसे फिर, गैर-यहूदी कानुनको पालन करत हएं।

28काहेकी बाहिरी रुपसे इकल्लो यहूदी हओं कहानएमे बो पक्का यहूदी नाए होत हए। अइसियए शरीरमे करोभओ देखावटी खतना फिर खास खतना नाए हए। 29एक सच्चो यहूदी बो हए जौनको हृदय परमेश्वरमे ठिक हए। मोशाको कानुन मानन इकल्लो सच्चो खतना नैयाँ, पर सच्चो खतनाको मतलब, परमेश्वरको आत्मासे हृदय बदल्नो हए। अइसे आदमी, आदमीनसे नाए बल्कि परमेश्वरसे प्रसंसा पात हएं।

Currently Selected:

रोमी 2: THRNT

Highlight

Copy

Compare