1 यूहन्ना 5
5
संसारके उपर बिजय
1जौनके जा बिश्वास हए, कि येशूए ख्रीष्ट हए, बे सब परमेश्वरके सन्तान हएं। और जो कोइ दौवा परमेश्वरके प्रेम करत हए, बो लौंणाके फिर प्रेम करत हए। 2जब हम परमेश्वरके प्रेम करत हएं, और बाकी आज्ञाके मानत हएं, तओ जहेसे हम जानलेत हएं, कि हम परमेश्वरके सन्ताननके प्रेम करत हएं। 3परमेश्वरसे प्रेम करनको अर्थ जहेहए, कि बाकी आज्ञाके पालन करनो। और बाकी आज्ञाके पालन करनके मुस्किल नाए हए। 4काहेकी जोकोइ फिर परमेश्वरके सन्तान हएं, बे संसारमे बिजय पातहएं। बो बिजय, जो संसारके हरात हए, बो हमर बिश्वास हए। 5संसार उपर बिजय पान बारो कौन हए? केबल बहे हए, जौनको बिश्वास हए, कि येशूए परमेश्वरको लौंणा हए।
ख्रीष्टके बारेमे गवाही
6बा येशू ख्रीष्ट हए, जौनके परमेश्वरके द्वारा जा संसारमे पठाओ गओ हए, और पानीसे बप्तिस्मा दओगओ रहए, और पिच्छु जब बा मरो, तओ बाको खुन बहो। बा बप्तिस्मा लेन इकल्लो नाए, पर अपनो खुन बहाएके क्रूसमे मरो। पबित्र आत्मा गवाही देतहए, कि येशू ख्रीष्ट परमेश्वरसे आओ हए, और पबित्र आत्मा सदिमान सच्चो मस्कत हए। 7जे तीन चीज गवाही देत हएं, कि येशू परमेश्वरसे आओ हए: 8पबित्र आत्मा, येशूको बप्तिस्मा, बाको खुन; जे तीनौं एकए चीजकी गवाही देत हएं। 9जब हम आदमीनको गवाही मानलेत हएं, तओ परमेश्वरको गवाही त बोसे और जद्धा मजबुत हए; और बो गवाही बो लौंणाके बारेमे गवाही हए, 10जो परमेश्वरको लौंणाके उपर बिश्वास करत हए। बो नेहात्तओ बिश्वास करत हए, कि जो कुछ परमेश्वर कही हए, बो सच्चो हए। जौन परमेश्वरमे बिश्वास नाए करत हए, बो बाके झुठो सम्झत हए। काहेकी बो परमेश्वरको गवाहीमे बिश्वास नाए करीहए, जो दौवा परमेश्वर अपन लौंणाके बारेमे गवाही दइ हए।
कभी फिर नाश नाए होन बारो जीबन
11और बो गवाही जहेहए, कि परमेश्वर हमके कभी फिर नाश नाए होन बारो जीबन दइ हए और जा परमेश्वरके लौंणाके द्वारा हए, कि हमएं कभी फिर नाश नाए होन बारो जीबन मिलो हए। 12जो कोइको फिर लौंणाके सँग ढिँगैको सम्बन्ध हए, बोके ठिन कभी फिर नाश नाए होन बारो जीबन हए। और जौननको परमेश्वरको लौंणाके सँग ढिँगैको सम्बन्ध नाए हए, बोके ठिन कभी फिर नाश नाए होन बारो जीबन फिर नाए हए। 13मए जा चिट्ठी तुमके लिखरहो हओं जो परमेश्वरको लौंणाके नाउँमे बिश्वास करत हओ, ताकी तुम जानपाबओ, कि तुमर ठिन कभी फिर नाश नाए होन बारो जीबन हए।
प्रभावशाली प्राथना
14और परमेश्वरमे हमर पुरा भरोसा हए, कि बाको इच्छा अनुसार प्राथनामे जो मागत हएं बा हमर सुनत हए। 15और जब हम जानत हएं, कि जो कुछ हम परमेश्वरसे मागत हएं बा हमर प्राथना सुनत हए, हम जा फिर जानत हएं, कि बासे प्राथनामे मागो भओ बात हम पातहएं। 16अगर कोइ अपन बिश्वासी भइयाके पाप करत देखत हए, और बो पाप मृत्यु घेन नाए लैजतहए कहेसे, बो अपन भइयाके ताहीं परमेश्वरसे प्राथना करदेबए। और परमेश्वर बोके माफ करैगो, और बोके बा जीबन देहए। मए उनके बारेमे बोलरहो हओं, जोको पाप मृत्यु घेन नाए लैजात हए। अइसे पाप फिर हएं जो मृत्यु घेन लैजात हएं, मए बोके जा पापके बारेमे प्राथना करन नाए कहात हओं। 17सब मेलके खराब काम पाप हएं, पर अइसे पाप फिर हएं, जौनके मृत्युमे नाए पुगात हए।
निष्कर्ष
18हम जानत हएं, कि जोकोइ परमेश्वरको सन्तान हए, बो पाप नाए करत हए, काहेकी परमेश्वरको लौंणा येशू बोके सुरक्षित रक्खत हए: और बोके शैतान नाए छुन पातहए। 19हम जानत हएं, हम परमेश्वरके सन्तान हएं, और सारा संसार बो शैतानके कब्जामे पणो हए। 20और जा फिर जानत हएं, कि येशू ख्रीष्ट परमेश्वरको लौंणा जा संसारमे आइगओ हए और बा हमके बुद्धि दइ हए, कि हम सच्चो परमेश्वरके चिन्हएं, और हम सच्चो परमेश्वरके सँग एकजुटमे हएं काहेकी हम परमेश्वरके लौंणा, येशू ख्रीष्टके सँग एकजुटमे हएं। बहे सच्चो परमेश्वर हए और बा कभी फिर नाश नाए होन बारो जीबन देतहए। 21मेरे बालका, जौन चीज तुमके परमेश्वरको उपस्थितिसे दुर करत हए बो चीजसे दुर रहाओ।
Currently Selected:
1 यूहन्ना 5: THRNT
Highlight
Copy
Compare
Share
Want to have your highlights saved across all your devices? Sign up or sign in
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
