1 यूहन्ना 4

सच्चो आत्मा और झुठे आत्मा

1हे मेरे प्यारे सँगीउ, हरकोइ आदमीनके उपर बिश्वास मत् करओ, जो पबित्र आत्मासे मस्कनको दाबि करत हए, पर आत्मनके जाँचओ कि बे परमेश्वरके घेनसे हएं, कि नाए हएं। काहेकी बहुतसे झुठे अगमबक्ता संसारमे हएं। 2परमेश्वरको आत्माके तुम जहे रितिसे चिनसकत हओ, कि जो कोइ आत्माके मानलेत हए, कि येशू ख्रीष्ट एक आदमीके रुममे आओ हए, बहे परमेश्वरके घेनसे हए। 3येशू, अइसो आदमी भओ कहिके नाए मानन बारे आत्मा परमेश्वरको आत्मा नाए हए। जा आत्मा ख्रीष्ट बिरोधीसे आओ हए। बो आबैगो कहिके तुम सुने हओ, और बो हबए संसारमे आइगओ हए।

4हे मेरे प्यारे बालकओ, तुम परमेश्वरके आदमी हओं, और तुम बे झुठे अगमबक्तनसे जितीगए हओ, काहेकी पबित्र आत्मा जो तुममे हए, बा शैतानसे बडो हए, जो जा संसारके आदमीनके उपर राज्य करत हए। 5बे झुठे अगमबक्ता संसारके हएं, जहेमारे बे संसारकी बात मस्कत हएं, और संसारके आदमी बिनकी सुनत हएं। 6हम परमेश्वरके हएं। जो परमेश्वरके जानत हए बो हमर बात सुनत हए; जो परमेश्वरके नाए जानत हए, बो हमर बात नाए सुनत हए; अइसियए हम सच्चो बोलन बारो आत्माके और झुठो बोलन बारो आत्माके पहिचान करसकत हएं।

परमेश्वरको प्रेम और हमर प्रेम

7हे मेरे प्यारे सँगीउ, हम एकदुस्रेके प्रेम करएं, काहेकी प्रेम परमेश्वरसे आत हए, और जो एकदुस्रेनसे प्रेम करत हए, बो परमेश्वरको सन्तान हए, और बे परमेश्वरके जानत हएं। 8जो एकदुस्रेनसे प्रेम नाए करत हए, बो परमेश्वरके नाए जानत हए, काहेकी परमेश्वर प्रेम हए। 9परमेश्वर हमके अइसे प्रेम दिखाइ काहेकी परमेश्वर अपनो अकेलो लौंणाके संसारमे पठाइ, ताकी बाके द्वारा हमके कभी फिर नाश नाए होन बारो जीबन मिलए। 10सच्चो प्रेम जा हए, कि हम परमेश्वरसे प्रेम नाए करे बल्कि परमेश्वर हमके प्रेम करीहए, और हमर पाप क्षमा करनके ताहीं अपन लौंणाके बलिदान होनके पठाइ। 11हे मेरे प्यारे सँगीउ, जब परमेश्वर हमके अइसो प्रेम करी, तओ हमके फिर एक-दुस्रेके प्रेम करन पणो।

प्रेम द्वारा परमेश्वरके देखनो

12कोइ कभु परमेश्वरके नाए देखी हए। पर हम एक-दुस्रेनके प्रेम करे कहेसे परमेश्वर हमर भितर रहात हए और बाको प्रेम हमरमे सिद्ध बनो होत हए। 13जासे हम जानन हएं, कि हम परमेश्वरके सँग एकजुटमे रहात हएं, और परमेश्वर हमर सँग एकजुटमे रहात हए, काहेकी बा अपनो पबित्र आत्मा हमके दइ हए। 14हम लौंणाके देखे हएं और जहेको गवाही देत हएं, कि दौवा परमेश्वर अपनो लौंणाके संसारके आदमीनके ताहीं मुक्तिदाताके रुपमे पठाइ हए। 15जोकोइ जा स्वीकार करत हए, कि येशू परमेश्वरको लौंणा हए तओ हम परमेश्वरके सँग एकजुटमे रहात हएं, और परमेश्वर हमर सँग एकजुटमे रहात हए। 16हम अच्छेसे जानत हएं और बिश्वास करत हएं, कि परमेश्वर हमसे प्रेम करत हए, काहेकी परमेश्वर प्रेम हए, जो प्रेममे बने रहात हएं, बे परमेश्वरके सँग एकजुटमे रहात हएं, और परमेश्वर उनके सँग एकजुटमे रहात हए। 17जहेमारे प्रेम हमरमे सिद्ध बनो रहात हए, कि परमेश्वर हमके दण्ड नाए देबैगो, हम जा संसारमे रहिके परमेश्वरके सँग एकजुटमे रहे हएं, जैसे येशू परमेश्वरके सँग एकजुटमे हएं। 18प्रेममे डर नाए होत हए। पर सिद्ध प्रेम डरके दुर करत हए, काहेकी डरको सम्बन्ध दण्डसे होत हए, और जो डरात हए, बो प्रेममे सिद्ध नाए होत हए। 19हम परमेश्वरसे और एक-दुस्रेनसे प्रेम करत हएं, काहेकी सुरुमे परमेश्वर हमके प्रेम करी। 20अगर कोइ कहाए, “मए परमेश्वरसे प्रेम करत हओं,” पर अपनो सँगी बिश्वासीके प्रेम नाए करत हए कहेसे बो ठग रहो हए। जौन, अपना देखसकन बारो सँगी बिश्वासीके प्रेम नाए करपात हए कहेसे, नाए देखपान बारो परमेश्वरके कैसे प्रेम करपाबैगो। 21और येशू प्रभुसे हमएं, जा आज्ञा मिलो हए, कि जोकोइ परमेश्वरसे प्रेम करत हए, बो अपने सँगी बिश्वासीसे फिर प्रेम करए।

Currently Selected:

1 यूहन्ना 4: THRNT

Highlight

Copy

Compare