LOMA 4

1MBWÔSO tunatôya beci ku bwalo bwa Abalami, tetecu a ku munyu ? Yei akasafiana beci ? 2Ndo Abalami akasuwixibwa ku makisa, udi yi mwanu ă kwana ; kate ku mpala a Ncembi kumoni. 3Bwalo bwatôya mukanda ă Ncembi beci ? Ene, Yi Abalami akakwetabuxila Ncembi ; yi kwakamubadidibwa ku nkwami. 4Mo ku bwalo bwa muntu akisa mudimo, difuto kadisobadibwa bea ku lwoxixi, kate bea ku mbata. 5Kaninga you utasosala, mo amakwetabuxila you asuwisa bantu batena yi mwosambu ă Ncembi, kwetabusa kwanci kwamamubadidibwa ku nkwami.

6Bea biatôya Dafidi kabidi dia kulwangwasanibwa kwa muntu you amamubadila Ncembi nkwami kutena makisa, 7ene, Balwangwasanibwi bobo bamalekyelebwa mona abo yi badi yi mabi abo amancibikibwa ; 8mulwangwasanibwi ndo muntu you utasomubadila Fumu bubi nyô.

9Kulwangwasanibwa koku kulolwa lolo kudi bantu bamakwelebwa bwadi batupu, sungu kudi bena mientonto kabidi ? Bwalo butwatôya ene, Kwetabusa kwakabadidibwa Abalami ku nkwami. 10Kwakabadibwa lolo beci ? Pakadi amakwelebwa bwadi, sungu pakadi ukidi muna mwontonto ? Kumoni mwelebu bwadi, kate muna mwontonto. 11Yi akangata kimonenu kia bwadi kwelebwa, bea kilembetelu kia nkwami ya kwetabusa yakadiyi yinaku pakadi ukidi muna mwontonto ; bixeakalayi tete a bantu boso bamakwetabusa, isanga badi bena mientonto ; bixebabadidibwa nkwami yei. 12Bixeakalayi lolo tete a bena bwadi kudi bantu bamakwelebwa bwadi, batasokwelebwa kanana, kate bendenda kabidi mu bipokye bia kwetabusa koku kwa tetecu Abalami kwakadiyi yinaku, pakadi ukidi muna mwontonto.

13Kakwakadi ku bwalo bwa bwadi bwa Mosese kwakalwa kilaka kudi Abalami ndo kudi mwananci, ene, uxekita loboko mwokito ; kate ku bwalo bwa nkwami ya kwetabusa. 14Ndo bobo bakala bena bwadi badi bena mwokito, kwetabusa kwamalengolebwa, yi kilaka kiamatekyebwa kanana. 15Bwadi ndo bwamalelesa bisusu ; mo kutasoakala bwadi kakuna kabidi kuxipa kwa bwadi.

16Mbwôso bwalo budi bwa kwetabusa bixeakalabu bwa lwoxixi ; bixeakala kilaka ko ku bwalo bwa bungi bwa bana ; kumoni kudi bantu ba bwadi bwa Mosese batupu, kate kudi bantu kabidi badi bena kwetabusa kwa Abalami. Yei udi tetecu a bungi bwecu, 17bea biakafundibwa ene, Namakuteka tete a mabila mangi. Udi noku ku meso a Ncembi akakwetabusayi, upapa bafu môyo, yi atamba bintu bikidi kabinako bea ndo bidiko.

18Isanga akadi kutena mudingidilu akakwetabusa yi mudingidilu, bixeakalayi tete a mabila mangi, bea biakafundibwa ene, Bana bebe banakala bungi noku. 19Kutena kupwangwa yi kwetabusa, yei akakwela mumbidi ănci lukanyi ăkadi luna mufu, (bwalo bwakadiyi yi mbula yenci nkama muncimancima), yi bokuta bwa Sala. 20Akadi kasoxitaxita bwalo bwa kilaka kia Ncembi ku mucwe ă kusaka yi kwetabusa kumoni ; kate akasubixibwa ku kwetabusa, yi akatumbisa Ncembi ; 21bwalo bwakakwetabusayi dyendeli ene, kilaka kioso kiamaxiyayi, yei ubili kukifikisa. 22Mbwôso kabidi kwakamubadidibwa ku nkwami.

23Kaninga diyi dedi kadiafundibwa ku bwalo bwanci kutupu, ene, kwakamubadidibwa noku ; 24kate ku bwalo bwecu kabidi banabadidibwaku ku nkwami bamakwetabuxila you akabisa Yisu Fumwecu kudi bafu, 25akalongolebwa ku bwalo bwa mona ecu atwamakwona, yi akabixibwa ku bwalo bwa kusuwixibwa kwecu.

Currently Selected:

LOMA 4: Luna_NT

Highlight

Copy