LOMA 5

1MBWÔSO bwalo butwamasuwixibwa ku kwetabusa, twapwakala yi polo ku mpala a Ncembi kudi Fumwecu Yisu Kalistu. 2Kudiyi, ku bwalo bwa kwetabusa, ndo kutwapwangata kabidi kibwelelu kiecu munda mwa lwoxixi lolu lutwamakwemana momu ; yi twañana mwanu yi mudingidilu ă dikai dia Ncembi. 3Yi kumoni noku kutupu, kate twañana mwanu bwalo bwa maxitu ecu kabidi ; bwalo butwalubukwa ene, buxitu bwencencañana bwika, 4yi bwika bwencencañana kielekyexelu, yi kielekyexelu kiencencañana mudingidilu. 5Yi mudingidilu kausoxipa bundu pô ; bwalo bwamapangufudibwa nyinga ya Ncembi munda mwa micima yecu kudi Mwoxixi a babala amatupebwa.

6Bwalo pakadi fukidi katuna yi ngulu, ku kikondo kia loko, Kalistu akafwila bantu batena yi mwosambu ă Ncembi.

7Bwalo ku mucwe ă muna nkwami, muntu kanananga kufwa mangwoso pô ; mo ku mucwe ă muna bonkangi ambeci muntu uxesañanibwa udi yi mucima isanga ă kumufwila. 8Mo Ncembi amakwebesa nyinga yenci ku bwalo bwecu, ene, bitwakadi tukidi boni, Kalistu akatufwila.

9Mbwôso kabidi, bwalo butwamasuwixibwa nkyekyu ku maxi anci, tunapandixibwa bisusu bia Ncembi kudiyi. 10Coco ndo twakakwameyebwa yi Ncembi kidi kimokimwe, patwakadi bena nkyetekyete, ku lufu lwa Mwananci, mbwôso kabidi, bwalo butwamakwameyebwa tunapandixibwa ku môyo ănci. 11Yi kumoni noku kutupu, kate twañana mwanu kabidi ku bwalo bwa Ncembi kudi Fumwecu Yisu Kalistu, utwapwangata kukwameyebwa koku kudiyi.

12Mbwôso luna biakabwela bubi ku loboko bwalo bwa muntu umoumwe, yi lufu ku bwalo bwa bubi ; mo nako kabidi lufu lwakadika kudi bantu boso bwalo bwamakwona bungi bwa bantu.

13Bwalo bwakadi bubi ku loboko buxi bwa bwadi ; mo bubi bwa munda kabusobadibwa bwalo ku kikondo kitena bwadi. 14Kate lufu lwakadi yi bufumu pôi Adami pôi Mosese, isanga kulu kwa bantu baba batakwona bea luna mwonenu ă Adami. Yei lolo udi kifwanisa kia you uxelwa kunyuma.

15Kate bwalo bwa kwona koku bwamaxiyañana yi bwalo bwa dilongi dia Ncembi. Bwalo bwa kwona kwa muntu umoumwe ndo bangi bamafwa, nako kabidi lwoxixi lwa Ncembi Iwamalekola bungi kudi bantu bangi, yi dilongi dienci diamalongebwa bwalo bwa lwoxixi lwa muntu umoumwe, Yisu Kalistu.

16Bwalo kabidi bwa muntu you umoumwe akakwona bwamaxiyañana yi bwalo bwa kampampa. Sambo akasambolebwa ku mucwe ă diona dimodimwe akafikisa lopelo ; mo dilongi diakalongebwa bwalo bwa mona mangi diakafikisa bisuwa.

17Ndo lufu lwakadi yi bufumu bwalo bwa muntu umoumwe, ku mucwe ă kwona kwa muntu umoumwe, nako kabidi bobo bangata lwoxixi bungi bungi, yi dilongi bungi bungi dia nkwami, banadika kwakala yi bufumu mu môyo kudi muntu umoumwe, Yisu Kalistu.

18Mbwôso lolo, bea biakadika lopelo kudi bantu boso bwalo bwa diona dimodimwe ndo biamadika bisuwa bia môyo kudi bantu boso bwalo bwa nkwami umoumwe. 19Yi bwalo bwamatekyebwa bantu bangi boni ku ntamu ya muntu umoumwe, ndo bwamatekyebwa bantu bangi kabidi bena nkwami ku diedya dia muntu umoumwe.

20Mo bwadi bwakasokama bixelekola kwona bungi. Mo ku kidi kwakalekola bubi bungi kwamadika lwoxixi kulekola bungi. 21Mo nako, bea biakadi bubi yi bufumu bwa kufikisa lufu, ndo bixeakala lwoxixi yi bufumu bwa kufikisa môyo ă kô kô yi mufikixilu ă nkwami, kudi Yisu Kalistu Fumwecu.

Currently Selected:

LOMA 5: Luna_NT

Highlight

Copy