LOMA 14

1KU bwalo bwa muntu udi yi kwetabusa kulebela, numwangati, mo kumoni kumusambolesa malo amakwelexebwa mbata. 2Muntu umoumwe amakwetabusa dia kudya bintu bioso ; mo you udi kulebela udedya bidibwa bitena munyenye. 3You udedya katamuni you utasodya, yi you utasodya kabedi you udedya ; bwalo bwamamwangata Ncembi. 4Owe udi ñani abela musadi a munga muntu ? Ndo amakwemana ndo amapona, kudi bwalo bwa Fumwanci. Yi unakwemanikibwa, bwalo bubili Fumu kumwemanika. 5Muntu umoumwe encenca ene, dituku dimodimwe diamaxiyañana yi dinga ; munga encenca ene, dituku dioso dilexi. Muntu mwoso a-etabuxixibwi dyendeli mu lukanyi Iwanci mikyenci. 6You anama dituku dioso amadinama ku bwalo bwa Fumu ; yi you udedya udedya ku bwalo bwa Fumu, bwalo bwamaxingayi Ncembi biloba ; yi you utasodya kasodya ku bwalo bwa Fumu, yi amaxinga Ncembi biloba.

7Bwalo butasoakala muntu umoumwe yinecu yi môyo ku bwalo bwanci mikyenci, kumoni muntu mwoso ufofwa ku bwalo bwanci mikyenci. 8Ndo tuxeakala yi môyo, twamakala yi môyo ku bwalo bwa Fumu ; yi ndo tuxefwa, twamafwa ku bwalo bwa Fumu. Mbwôso ndo tuxeakala yi môyo, sungu ndo tuxefwa, tudi bantu ba Fumu. 9Ku mucwe ou kwakafwa Kalistu yi akabika yi môyo, bixeakalayi Fumu a bafu yi a bena môyo.

10Mo owe kukai wabela muna kwebe ? Ndo owe munga, kukai watamuna muna kwebe ? Bwalo butunakwemana bungi bwecu ku kisambolelu kia Ncembi. 11Bwalo bwakafundibwa ene, Fumu ndo atôya ene, Bea bingwakala yi môyo binakonyama kinu kioso ku mpala amene, yi ludimi lwoso lunasakola kudi Ncembi. 12Mbwôso tunasakola muntu bwalo bwanci muntu bwalo bwanci kudi Ncembi.

13Mbwôso katubelañani kabidi nyô, kate nutungi kusambola noku ene, muntu mwoso kateki kipuminu kia diya ndo kiponexelu mu ncila a muna kwanci.

14Ngwalubukwa yi namakwetabuxixibwa mu Fumu Yisu, ene, kakuna kidibwa kioso kidi lobindu mikyekio ; mo kudi muntu amabala dia kintu kioso, ene, kidi lobindu, kudiyi ndo kudikio lobindu. 15Bwalo ku mucwe ă bidya, ndo muna kwebe amatekyebwa yi buxitu, owe kusokwenda mu nyinga nyô. Kumuxipixi yi munyenye ebe, you akafwila Kalistu. 16Bwalo bwenu bunengela kabutangolebwi ; 17bwalo butasoakala bufumu bwa Ncembi kudya yi kunwa ; kate nkwami, yi polo, yi kiango mu Mwoxixi a babala. 18You asadila Kalistu mu bwalo bobu, udi yi nonu ku mpala a Ncembi, yi udi yi mwalakanu kudi bantu.

19Mbwôso tulandi bintu bia polo, yi bintu bia kwabakanana yinabio muntu muna kwanci muntu muna kwanci. 20Kanwoni mudimo ă Ncembi ku mucwe ă munyenye. Bintu bioso bidi susu sôsôlwo ; kate bubi budi yi muntu you amateka kipuminu kia diya pa kudya. 21Kudi loko kumoni kudya munyenye, kumoni kunwa malufu, kumoni kwenca kintu kioso pako, kiamapuma muna kwebe diya kudikio, ndo amaponexebwa kudikio, ndo amalebexebwa kudikio.

22Owe udi yi kwetabusa ? Ikala yinaku owe mikyebe ku mpala a Ncembi. Kiango kidi yinanci utasodibela mikyenci ku kintu kiamakwetabuxilayi. 23Mo you axitaxita, akali yei udedya, amabelebwa, bwalo butasokwencayi ku kwetabusa ; yi bwalo bwoso butena bwa kwetabusa budi kwona.

Currently Selected:

LOMA 14: Luna_NT

Highlight

Copy