LOMA 13

1MUNTU mwoso adipwesi ku mpala a mamanya adi kulu kwanci. Bwalo butenako bumanya bwoso butasopebwa kudi Ncembi ; yi mamanya aa adi paxi amalungikibwa kudi Ncembi. 2Mbwôso you atombokyela mamanya amatanda yi mulungikilu ă Ncembi ; yi bobo batanda banadiangacila lopelo. 3Bwalo butasoakala basambodi bowa ku bwalo bunengela, kate ku bwalo bubi. Owe wakyeba lolo kumoni kucina bumanya ? Enca kunengela yi unakala yi mwalakanu kudibu ; 4bwalo budibu musadi a Ncembi ku bwalo bwebe ndo kukwencela kunengela. Mo ndo owe wencenca bwalo bubi, cina ; bwalo butasocwalabu mwele kanana ; bwalo budibu musadi a Ncembi, musombodi a kuponesa bisusu kulu kwa you akisa bubi. 5Mbwôso tudi yi dibambu dia kudipwesa kumoni ku bwalo bwa bisusu bitupu, kate ku bwalo bwa kilubukilu kia munda kabidi.

6Ku mucwe ou ndo kunwalambula milambu kabidi ; bwalo budibo milopwe ya Ncembi badi mu kwekyela ekyela yi bwalo bobu. 7Nufuti bantu boso bintu bixefucibwabo ; mulambu kudi fumu a mulambu ; sayi kudi muna sayi ; bowa kudi muna bowa ; kinemu kudi muna kinemu.

8Kanwakadi yi muntu mwoso mbata utena kunangañana ; bwalo bwamalelekyela yi bwadi you ananga muna kwanci. 9Milangu yei noku ene, Kunakwendela mukaxi abene, kunaxipa, kunakweba, kunakyeba, yi munga mulangu mwoso ndo udiko, ămafukudibwa mu diyi dedi ene, Unananga muna kwebe bea mikyebe. 10Nyinga kayisokwencela muna kwanci bubi ; mbwôso nyinga idi kulelekyela yi bwadi.

11 Ngwatôya noku, bwalo bunwalubukwa kikondo kieki, bwalo bwamafika ola nkyekyu coco kubika mu tulu ; bwalo bwamakokyela kupandixibwa kwecu pepe pôi kikondo kitwakakwetabusa. 12Butuku butani pepe yi kukya, yi munyinya ămakokyela pepe ; mbwôso tuncuii makisa a mwedima luna kilamba, tulati lolo micwala ya bipiko bia obo. 13Twendi yi mwosambu unengela bea ku munyinya ; kumoni yi masa yi nkolwa ya malufu, kumoni yi xindilu mibi yi budibi, kumoni yi bitumba yi mwokunyo. 14Kate nulati Fumu Yisu Kalistu, yi kanwedi munyu ěnu lukanyi bwalo bwa nyinga yau kuyidisa.

Currently Selected:

LOMA 13: Luna_NT

Highlight

Copy