LOMA 1

1PAULU, musadi a Yisu Kalistu, amabikidibwa mutumibwi, amabalolebwa bwalo bwa losangu lunengela lwa Ncembi, 2(lwakaxiyilayi kilaka kalikali kudi badimuxi banci mu mikanda ya babala). 3Losangu ludi bwalo bwa Mwananci, mulu kudi bana ba Dafidi ku bwalo bwa munyu, 4yi amakwebexebwa udi Mwana a Ncembi yi ngulu, bwalo bwa Mwoxixi you udi a babala, ku kubisa kwa bafu ; isanga Yisu Kalistu Fumwecu. 5Kudiyi ndo kutwamangata lwoxixi yi butumibwi bobu ku mucwe ă dina dienci, bwalo bwa diedya dia kwetabusa, mu mabila moso. 6Pakacikaci pabo ndo panudi kabidi bantu bamabikidibwa kudi Yisu Kalistu.

7Kudi bantu boso badi ku Loma, banangibwi ba Ncembi, bamabikidibwa bena babala ; lwoxixi Iwakali yinenu yi polo kudi Ncembi Tetecu yi kudi Fumu Yisu Kalistu.

8Ku buxi, ngwaxinga Ncembi amene biloba kudi Yisu Kalistu ku micwe yenu bungi bwenu, bwalo bwamasakolebwa kwetabusa kwenu ku loboko luncimancima. 9Bwalo budi Ncembi mutôbôdi amene, umwa sadila mudimo ănci ku kidimu kiamene mu losangu lunengela lwa Mwananci, a kutôbôla bingwatamba bwalo bwenu kangala kangala matuku moso ku ndombu yamene, 10ndi mu kulomba lomba ndo ambeci nkyekyu nxekwendexebwa bimpe ku nyinga ya Ncembi ndo kulwa kunudi. 11Bwalo bungwakyeba kungi kunumona, binxenulongola dinga dilongi dia Mwoxixi ndo kunusubisa ; 12nako kubondañana yinenu kwenu, you yi kwetabusa kwa muna kwana, you yi kwetabusa kwa muna kwanci, yi kwenu yi kwamene.

13Mo kisoli nonu kwakala kutena kulubukwa, bakunyi, munakadi matuku mangi ene, ndu kunudi (yi namaximbibwa pôi nkyekyu), binxeakala yi mamoma kwenu pako, bea mu manga mabila kabidi. 14Ndi muna mbata yi kudi bena Ngiliki yi kudi Basenci ; yi kudi bantu yi bwinu yi kudi bantu batena yi bwinu. 15Mbwôso, ku lwedi fwamene ndo kuntanalanda kunwambila losangu lunengela kabidi badi ku Loma.

16Bwalo buntasokwombwela losa ngu lunengela bundu ; bwalo budilu ngulu ya Ncembi ku kupandixibwa kwa môyo kwa muntu mwoso a-etabusa ; kwa muna Yuda buxi, mo kwa muna Ngiliki kabidi. 17Bwalo bwamakwebexebwa nkwami ya Ncembi momu, ku kwetabusa, kwoso kudi kwetabusa ; bea biakafundibwa ene, Kaninga muna nkwami unakala yi môyo ku kwetabusa.

18Bwalo bwamakwebexebwa bisusu bia Ncembi pôi diulu bwalo bwa mwosambu mwoso ă bantu utena ă Ncembi, yi kwona kwoso kwa bantu babamba sôsôlwo yi kwona kwabo ndongo. 19Bwalo bwa kilubukilu kioso kialubukwa bantu kia Ncembi kiamakwebexebwa munda mwabo ; bwalo bwamabebesakio Ncembi. 20Pôi kipangilu kia loboko, pamaxinguludibwa bintu bienci bitasomonebwa, bwalo bwamalembetelebwabio ku bintu bebi biamapangibwa ; ngulu yenci ya kô kô yi butonga bwanci bwa Ncembi ; mbwôso bantu kabena bena bisuwa pô. 21Bwalo kabidi butamutumbisabo bea Ncembi, pakadi bamalubukwa Ncembi, yi bakadi kabasomuxinga biloba ; kate bakaungaunga kanana mu nkanyi yabo yakamwelelabo, yi mucima ăbo utena yi lukanyi ăkapindixibwa ku mwedima fu. 22Bakaditôyela ene, badi bena bwinu, kate bakatulowa badibi, 23yi bakasumbanya dikai dia Ncembi utena yi musalu, ku mucwe ă kifwanisa kiafwana muntu udi muna musalu, yi kifwanisa kia nyonyi, yi kia nyama ya mikolo inai, yi kia bintu bialamba lamba paxi.

24Mbwôso Ncembi akabalongola ku malo a mbindu, akalelekyela yi xindilu ya micima yabo, ndo kukyesolañana ku mimbidi yabo ; 25bwalo bwakasumbanyabo sôsôlwo a Ncembi ku mucwe ă ncimi ; yi bakadika kunemeka yi kusadila kipangu kiakapangibwa, kumoni Mupangi, uxetumbixibwa mieciya mioso. Amen.

26Ku mucwe ou kwakabalongola Ncembi ku xindilu ya bundu. Isanga babakaxi babo bakasumbanya mwosambu ă bwabukaxi ku mucwe ă munga mwosambu utena ă bwabukaxi ; 27yi mo nako babalumi kabidi bakaxiya mwosambu ăbo yi mwamukaxi, yi bakalandañana mikyeabo ku bwefi ; yi babalumi bakakwenca yi babalumi bundu, yi bakadiangacila munda mwabo sayi ya kwona kwabo yakalelekyela yi mwosambu ou.

28Yi bea bitamonabo loko kwakala yi Ncembi mu kilubukilu kiabo, ndo biakabalongola Ncembi ku lukanyi lusaluki lwa kwenca malo atasolelekyela. 29Bakakwolubixibwa yi bwalo bwoso butena yi nkwami, yi bubi, yi bwefi, yi mwoxingi. Bakakwolubila yi mwokunyo, yi kwonda, yi bitumba, yi ncimi, yi bonkomba. Bakadi bena mieñonuñonu, 30batendañani ba bantu, bena yangonye ku meso a Ncembi, bena ntamu, bena disasa, bena mwanu, bapangi ba bipangu bibi, badiudi ba bateteabo yi bamamabo, 31batena yi lukanyi, batena yi kibaku kia malo, batena yi nyinga mioso ya bantu, batena yi mwengo. 32Baba noku, isanga balubukwa mulangu ă Ncembi, ene, bobo bencenca malo aa bamalelekyela yi lufu, kabasoxikila yi kwenca kwa noku, kate baxekyelelañana kabidi yi banga bantu bencenca noku.

Currently Selected:

LOMA 1: Luna_NT

Highlight

Copy