MAKISA 28

1BITWAKASABUKA ngengele ngengele, kunyuma twakalubukwa ene, kisala kiamabikidibwa ene, Melita. 2Yi Basenci bakatukixila yi mwengo mungi ; bakanamika mudilu yi bakatwangata bungi bwecu ku bwalo bwa mbula akadi mu kuloka, yi ku bwalo bwa maxika. 3Mo pakasangisa Paulu kibomba kia nkunyi, yi akayiteka kulu kwa mudilu, nyoka akabatuka bwalo bwa kilungu, akakwata kianca kienci. 4Yi pakamona Basenci nyama udi mu kulembelela ku kianca kienci, bakatôyelañana ene, Sôsôlwo, you muntu ndo muxipanani ; isanga amapanda bwalo bwa mai, Nemesisi kasomuxiya yi môyo. 5Kaninga yei akakupulula nyama munda mwa mudilu yi kombweli kusama pô. 6Kaninga bobo bakadingila uxekwolubila, ndo uxepona paxi yi kufwa kwa kikalankoso. Mo pakadingilabo kikondo kingi, kutena kumona kipoma kibi kiamalwa kudiyi, bakakulumuna nkanyi yabo yi bakatôya ene, udi Ncembi.

7Ku mbata koku noku kwakadi bibidi bia muntu munene a kisala, dina dienci ene, Pubilio ; yei akatwangata yi akatubungula loko matuku asatu. 8Yi Pubilio tetenci akalala yi kusama kwa mudilu yi lokyedi ; Paulu akabwela kwakadiyi yi akalomba, akabaka bianca bienci kulu kwanci, yi akamupandisa. 9Pakakwencebwa noku, banga kabidi bakadi yi masama mu kisala bakalwa, yi bakapandixibwa ; 10yi bakatuxekyelela maxekyelela mangi yi patwakabwela mu kibusu, bobo bakateka bintu munda, bioso bitwakasaka yinabio.

11Kunyuma kwa ngondo isatu, twakancuka mu kibusu kia Alesandalia kiakalala ku kisala ku ngondo ya maxika, kilembetelu kiakio ene, Diosokuli. 12Bitwakanamata ku Silakuse twakasala matuku asatu. 13Koku noku twakaya kuya cimba ku Lengiumu ; yi kunyuma kwa dituku dimodimwe, lupepele lwa ku Sudu lwakapupuya, yi ku diba diamubidi twakalwa ku Puteoli, 14kutwakasañana bakunyi, yi twakakwapanguxibwa dia kusala yinabo matuku sambwali. 15Mo nako twakalwa fika ku Loma. Yi bakunyi, bena koku, pakakwombwabo mwoximo ěcu, bakalwa pomana yinecu pôi ku Kisalu kia Apio, yi Ncibo isatu ya bisangusangu ; yi pakabamona Paulu, akaxinga Ncembi yi akasuba ku mucima ănci.

16Patwakabwelamunda mwa Loma, Paulu akalekyelebwa adixikamini mikyenci yi disalai diakamunama.

17Yi kunyuma kwa matuku asatu kwakababikilayi bakadi babakulu ba bena Yuda, yi pakadi bamasangila, akabambila ene, Bena kwami, meme isanga kiakwencela bubila kintu, ndo miesambu ya batetecu, namalongolebwa musungi ku Yelusaleme ku makaci a bena Loma ; 18bobo pakanguxiximabo, bakakyeba kungupaula bwalo butenako bwalo bwa kufwa yinami. 19Kaninga pakapetola bena Yuda mpeto, meme nakabambibwa dibambu dia kwabila Kyesa, kumoni bea kusanya bubila bwamene. 20Ndo binapunubikila kulwa monafiana yi kwambilafiana yinenu ; bwalo bunamasukibwa lukanu loiu ku mucwe ă mudingidilu ă Isalele. 21Yi bakamwambila ene, Coco biecu katwangacili mikanda ya ku Yudiya ku bwalo bwebe, muntu kaluli lolo a bena kwecu, kulwa cwala losangu, ndo kutôya kintu kioso kibi ku bwalo bwebe. 22Kaninga twakyeba kwombwa kudi owe mwakanyakanya ; bwalo bwa kibumbu kieki, kiamalubukibwa kutudi ene, ku kidi kioso kwamatamunibwakio.

23Yi pakamuxiyilabo kilaka kia dituku, bakalwa kudiyi ku ncibo anci bangi bangi ; yi akabasakolela, akakwambila dia bufumu bwa Ncembi, yi akababondabonda dia Yisu, yi ku bwadi bwa Mosese yi ku badimuxi, pôi butwatuku pôi butuku. 24Yi banga bakakwetabusa bintu biakatôyebwa yi banga bakanyañana. 25Yi pakadi kabasomonañana loko mikyeabo bakancuka, pakadi Paulu amatôya diyi dimodimwe ene, Mwoxixi a babala akatôya sôsôlwo kudi Esaya mudimuxi kudi batetecu 26ene, Yaka owe kudi bantu baba ; tôya ene, Ku kwombwa, nunakwombwa yi kanunalembetela pô ; ku kumona, nunamona kutena kuxingulula ; 27bwalo bwamabulunda mucima ă bantu baba, yi macu abo adi maxitu pa kwombwa, yi bamancibika meso abo, ximbi ambeci baxexingulula yi meso abo, yi baxekwombwa yi macu abo, yi baxelubukwa yi mucima ăbo, yi baxekulumuka, yi meme nxebapandisa môyo. 28-29Mbwôso nulubukwi ene, kupandixibwa koku kwa Ncembi kwamatumibwa kudi mabila, bobo kabidi banakwombwa.

30Yi akasala mu ncibo anci mikyenci mbula ibidi mincimancima, yi akangata bantu boso bakalwa kudiyi, 31udi mu kwambila dia bufumu bwa Ncembi, yi kweyesa bintu bwalo bwa Fumu Yisu Kalistu yi mucima mwoso, kutena muntu a kumukanda.

Currently Selected:

MAKISA 28: Luna_NT

Highlight

Copy