KIEBEXELU 16

1YI nakakwombwa diyi dikola diamalwa mu tempelo, didi mu kwambila bangele sambwali ene, Nuyi, nutudeyi mpamba sambwali ya bisusu bia Ncembi pôi ku loboko.

2Yi you a buxi akaya, yi akatudeya mpamba anci pôi ku loboko ; yi akalwa mbuta a bubi yi a kusama kudi bantu bakadi yi kilembetelu kia Nyama, yi bamaxingila kifwanisa kienci.

3Yi you amubidi akatudeya mpamba anci mu mai manene ; yi akalwa maxi, luna maxi a muntu mufu ; yi kipangu kioso kia môyo kia mu mai manene kiakafwa.

4Yi you amusatu akatudeya mpamba anci mu ncedi yi mu mpokolo ya mai, yi akalwa maxi. 5Yi nakakwombwa mwangele a mai udi mu kutôya ene, Owe udi yi nkwami, udiko, yi wakadiko, Owe a babala, bwalo bwamasambola noku ; 6bwalo bwakapangululabo maxi a bena babala yi badimuxi, yi wamabanusa bobo maxi ; bobo bamalelekyela. 7Yi nakakwombwa kilongolelu kidi mu kutôya ene, E, Fumu Ncembi, Ncembi Xadai, sambo yebe yasambola Owe idi sôsôlwo yi nkwami.

8Yi you amunai akatudeya mpamba anci kulu kwa diba ; yi diakapebwa ndo kwosa bantu mudilu ; 9yi bantu bakakwoxebwa mudilu mungi, yi bakatangola dina dia Ncembi akadi yi bumanya kulu kwa masama aa ; yi bakadi kabasokwela lwombixi ndo kumutumbisa.

10Yi you amutano akatudeya mpamba anci kulu kwa lukwasa lwa Nyama, yi bufumu bwanci bwakapinda ; yi bakancankunya ndimi yabo bwalo bwa kusama ; 11yi bakatangola Ncembi a diulu bwalo bwa masama abo yi mbuta yabo ; yi bakadi kabasokwela lwombixi bwalo bwa makisa abo.

12Yi you amusambomo akatudeya mpamba anci kulu kwa ncedi munene Ufulatese ; yi mai anci akakwomexebwa, bixelungikibwa ncila a bafumu balolwa kulolwa munyinya. 13Yi nakamona bidimu bisatu bia mbindu luna bidyamputoto biakabatuka mu musuku ă cici, yi mu musuku ă Nyama, yi mu musuku ă mudimuxi a mancanga ; 14bwalo budibio bidimu bia bidimu bibi, bidi mu kwenca bilayixilu, biyeya kudi bafumu ba loboko luncimancima kuya bakokyeya ku mbita a dituku dinene dia Ncembi, Ncembi Xadai. 15Mona, ndolwa luna mwefi. Mulwangwasanibwi ndo you amatebela yi amanama bilamba bienci, bitaxekwendayi butaka, yi bitaxemonabo bundu bwanci. 16Yi akabakokyeya ku kidi kiamabikidibwa luna Ebeleo ene, Ala-Mangedo.

17Yi you a sambwali akatudeya mpamba anci ku mwoxixi kulu ; yi mu tempelo mwakabatuka diyi dikola, ku lukwasa, ene, Kwamapwa. 18Yi misadi ya kapenya yakadiko, yi meyi, yi makongola ; yi kutepa kunene kwakalwa kwa loboko kutakadi nako pôi kikcndo kiakadi bantu pa loboko, kutepa kunene kwa noku, kwa bubi. 19Yi bula bunene bwakalwa bicini bisatu ; yi mala a mabila akaximbuka ; yi Babelono munene akakwelebwa lukanyi ku mpala a Ncembi ndo kumupa mpamba a malufu a bisusu bia bituku bienci. 20Yi kisala kioso kiakacina lubilu, yi mpongo yakadi kayisosafianibwa pô. 21Yi mabwe manene a mbula akapweka kudi bantu pôi diulu, dibwe dioso didi buxitu bwa talente ; yi bantu bakatangola Ncembi bwalo bwa kusama kwa mabwe a mbula ; bwalo butani kusama kwao kungi kungi.

Currently Selected:

KIEBEXELU 16: Luna_NT

Highlight

Copy

Compare