KIEBEXELU 15

1Yi nakamona kinga kilayixilu mu diulu kinene kia kikamakama ; bangele sambwali badi yi masama sambwali, aa a ku sula ; bwalo bwamakukixibwa bisusu bia Ncembi munda mwao.

2Yi nakamona luna mai manene a mulondo, maputola yi mudilu, yi bobo bakadi bamapidila Nyama yi kifwanisa kienci, yi lubadi lwa dina dienci, badi mu kwemana kulu kwa mai manene a mulondo, badi yi sese ya Ncembi. 3Badi mu kwembikisa lolo musambu ă Mosese, musadi a Ncembi, yi musambu ă Mwana a mukwakwa, ene, Makisa ebe adi manene yi a bikamakama, Fumu Ncembi, Ncembi Xadai. Miesambu yebe idi ya nkwami yi sôsôlwo, Fumu a mabila. 4Ñani ani unakala kasocina, Fumu, yi kasotumbisa dina diebe ? Bwalo budi Owe mutupu babala ; bwalo bunalwa mabila moso yi banaxingila ku mpala ebe ; bwalo bwamakwebexebwa makisa ebe a nkwami.

5Yi kunyuma kwa bintu bebi nakatebela, yi tempelo akadipudibwa a ncibo a ntôbô mu diulu ; 6yi bangele sambwali bakabatuka mu tempelo, bakadi yi masama sambwali, bamalatixibwa mbuxa a babala obo, yi biedi biabo bidinga yi miekaba ya ôlo. 7Yi kimo kipangu kia bipangu binai bia môyo kiakapa bangele sala sambwali ya ôlo, yamakwolubixibwa bisusu bia Ncembi, udi yi môyo ku mieciya ya mieciya. 8Yi tempelo akakwolubixibwa munyinga ămabatuka mu dikai dia Ncembi yi mu ngulu yenci ; yi kakwakadi muntu ubili kubwela mu tempelo biamamanibwa masama sambwali a bangele sambwali.

Currently Selected:

KIEBEXELU 15: Luna_NT

Highlight

Copy

Compare