BAROMA 9

Kyala nabandu bake

1Une nikuyoba isya naloli mwa Kristi, ndikuyoba isya butungulu; amabyebye gangu gikunsisimikisya mwa Mbepo Mwikemo, 2ukuti ndikusyoba apa nikuti ndi nubusulumanie fiyo, kangi nikitima ki kingi mundumbula yangu ikisitakuleka. 3Buno patigi njege ngunigwa itolo uyu ali pabutali na Kristi, panongwa ya bamyitu na bankikolo kyangu naba ilopa iyangu, 4#Kuso 9.4abene loli abanyaIsraeli; aba bo benenabo ubwana, ubukulumba, ulwitikano, bapegigwe indagilo, ububombeli bwa kumbombela Kyala, nifingo, 5bo bene nabo batata bala; kangi muli bababa mo afumilemo Kristi ulwa mbili. Kyala uyu ali pamwanya pali fyosa yo imikigwege bwila na bwila, Amen.

6Ndikuyoba ukuti ulufingo lwa Kyala lwatoligwe, namanga bakaya bo banyaIsraeli bosa aba bafumile mwa Israeli; 7#Bwa 21.12kangi bosa bakaya bana ba Abrahamu aba bafumile nduyungu lwake, mma, loli umwene ikuti, “Imbeyu yako yisakuyobeligwaga mwa Isaka.” 8Ko kuti bakaya bo bana ba mbili aba bipelile bana ba Kyala; loli bo bana ba ndufingo aba bikuyobigwa ukuya ba nduyungu. 9#Bwa 18.10Namanga ilisyu lya lufingo lyayobile ukuti, “Pakabalilo bo kakaka nisakwisaga kangi, po Sara isakuyaga numwana undumyana.” 10Sikaya syo sisisi syene, loli yope na yu Rebeka, bo ambilile ikifuba kumundu yumoywene, yo yu Isaka tata gwitu. 11-12#Bwa 25.23Namanga bo abanabo bakali nukupapigwa, kangi bo bakali nukubomba simo, inunu pamo imbibi, Kyala alimbulile Rebeka ukuti, “Unkulumba yo isakumbombelaga unnandi;” bunobuno ukusaligwa kwa yumo yula kukafumile mumbombo simo isi abombile, mma, loli kwafumile pa lubilikilo ulu Kyala alinogonile ngani, 13#Mala 1.2-3bo mumo amasimbo gikuyobela ukuti, “Yakobu yo nunganile, loli Esau yo numbengile.”

Kyala akaya nsitabugolofu

14Kali po tutigi fiki lelo? Kali tutigi Kyala nsitabugolofu? Mma, bo sikaya! 15#Kuso 33.19Buno Kyala alimbulile Mose ukuti, “Nisakumpakisyaga yuyo linga nikumpakisya, kangi nisakumpelaga ikisa yuyo linga nikumpelela ikisa.” 16Bunobuno lelo sitikukonga mbwigane bwa mundu pamo nkwiyula kwake, mma, loli sikukonga ndupakisyo lwa Kyala. 17#Kuso 9.16Namanga amasimbo gikumbula Farao gikuti, “Syo sisyo ngwimikile ugwe, ukuti mmyako mo nibonekesyege amaka gangu, ko kuti ingamu yangu yifumukege nkisu kyosa.” 18Bunobuno lelo uyu linga Kyala iganile ukumpakisya, yo ikumpa kisya, kangi uyu linga Kyala iganile ukumpa indumbula ingafu, yo ikumpa.

Ingalalisi sya Kyala nikisa kyake

19Loli yumo mmyinu isakuyobaga kumyangu isakutigi, “Linga bo sili bunobuno nongwa yafiki Kyala akali ikubuyoba ubusobi?” 20#Yes 29.16; 45.9Ywani uyu abagile ukulwa nubwigane bwake? Gwe mundu, gwe ani nanugwe gwe gwati gwamulanege na Kyala? Kali akandu akabumbigwa ko kati kayobege kuli uyu ikukabumba katigi, “Fiki umbumbile bo bunobuno?” 21Kali umbumbandeko akaya namaka ukubumba mumbulumbwa yimoyene ya mfu gwake, indeko yimo iya mbombo inyimikigwa, pamo indeko iyingi iya mbombo isitakubagila? 22Mo mumo yope na Kyala ikubombela. Ikulonda ukunangisya ingalalisi syake, nukunangisya amaka gake, afisile fiyo ilyoyo kufibombelo ifi fyabagile ukwambilila ingalalisi, ifi fyatendekekesigwe ukubuka kulonangiko? 23Kangi alondaga ukwinangikisyamo ubwingi bwa bukulumba bwake, pali uswe twe fibombelo twe twabagile ukwambilila ulupakisyo, twe atutendekisye ngani ukubuka kubukulumba? 24Yo uswe twe atubilikile, momma mu mbaYuda mwene, loli mope na mbapanja; 25#Hos 2.23bo lilyo ikuyobela mwa Hoseya ikuti,

“Nisakubayoba aba bakaya bandu bangu ukuya bandu bangu,

kangi nisakunjoba uyu akaya nkundwe gwangu ukuya nkundwe gwangu.

26 # Hos 1.10 Mosa muno bayobigwe ukuti, ‘Mukaya bandu bangu,’

mo bisakuyobigwaga ukuya bana ba Kyala umumi.”

27 # Yes 10.22-23 Umwene loli Yesaya bo ikukolela isya Israeli ikuti,

“Napapo linga abanyaIsraeli bali bo gu nsanga gwa kunyanja ubwingi,

bene aba basyele bo bisakupokigwaga;

28namanga uNtwa isakusimalisya nakalinga itolo isi alinogwine ukubomba pakisu.”

29 # Yes 1.9 Kangi bo apa Yesaya ayobile ngani ukuti,

“Linga uNtwa gwa filundilo akatusyakisye uluyungu,

po angali tuli bo ka kaya ka Sodomu,

angali tufwene itolo na kaya ka Gomora.”

Ikikolo kya Israeli ni Nongwa Inunu

30Kali po tutigi fiki lelo? Tutigi, abapanja aba bakabulondaga ubugolofu lilino babwagile. Bo bu bugolofu ubu bufumile ndwitiko. 31AbanyaIsraeli aba babulondaga ubugolofu ubu bukufuma mundagilo batoligwe ukubwagila mundagilo sisisi. 32Papo fiki? Papo bakiyulaga ukubulonda munjila ya lwitiko, loli munjila ya mbombo; balinkwikinya pibwe lya kwikinyapo. 33#Yes 28.16Bo apa lisimbigwe ili likuti,

“Keta nikubika nkaya ka Zioni ilibwe lya kwikinyapo,

ulwalabwe ulu lwisakubagwisya abandu;

uyu linga ikumwitika yo atisa kuyaga mbutolwe.”

Currently Selected:

BAROMA 9: NNBII

Highlight

Compare

Copy