BAROMA 8

Ubumi bwa mwa Mbepo

1Popapo lelo kukayako ukulongigwa aba bali mwa Kristi Yesu. 2Buno ululagilo lwa Mbepo umpelabumi, ulu luli mwa Kristi Yesu, lo lunyabwile kululagilo lwa butulanongwa, nulwa bufwe. 3Namanga isi indagilo syatoligwe ukusibomba, panongwa ya bonywa bwa mbili, syo Kyala abombile, alinkubutobekesya ubutulanongwa mu mbili gwa bundu, apa antumaga uMwanake nkifwani kya mbili gwa butulanongwa; ukuti abusosyepo ubutulanongwa. 4Abombile sisisi ukuti isi sikomelisye indagilo simalikilege mmyitu, twe tutikwendela ulwa mbili, loli tukwendela ulwa mwa Mbepo. 5Namanga aba akayilo kabo ka mbili bikwinogona si sya mbili, loli aba akayilo kabo ka mbepo bikwinogona si sya Mbepo. 6Bunobuno ukwinogona isya mbili bo bu bufwe, loli ukwinogona isya Mbepo bo bu bumi nulutengano. 7Namanga isi gukwinogona umbili sili kilugu na Kyala; buno sitikwilamba kundagilo sya Kyala, papo sikakumanya ukwilamba. 8Abene loli aba akayilo kabo ka mbili bo bakamanya ukunkyela Kyala.

9Umwe loli mukaya bakayilo ka mbili, mma, loli muli bankayilo ka Mbepo, linga naloli Mbepo gwa Kyala ayengile itolo mmyinu. Loli uyu linga akaya nagwe Mbepo gwa Kristi, bo akaya mundu gwake. 10Apene loli linga Kristi ali mmyinu, po ugwene umbili gukuya mfwe panongwa ya butulanongwa, loli isyene imbepo sikuya nyumi panongwa ya bugolofu. 11#1 Kor 3.16Loli linga Mbepo uyu ansyusyaga Yesu mbafwe ikutugala mmyinu, po umwene uyu ansyusyaga Kristi Yesu mbafwe, isakugipaga ubumi gyope nimibili gyinu imifwe mu mwa Mbepo gwake, uyu ikutugala mmyinu.

12Popapo lelo mwe bamyitu, uswe tuli ba kumeleligwa, tukaya ba kumeleligwa, ukuti tusikonge isya mbili. 13Namanga linga mukusikonga isya mbili, po mwisakufwaga, loli linga mwa Mbepo mukusigoga imbombo sya mibili, po mwisakuyaga bumi. 14Buno bosa aba ikubalongosya Mbepo gwa Kyala, bo bana ba Kyala itolo. 15#Mar 14.36; Gal 4.6#Gal 4.5-7Namanga Mbepo uyu Kyala abapele umwe atikubapelela umwe ukuya batumwa, nukubapelela ukuya nulutende, mma, loli ikubapelela umwe ukuya bana, yo uyu tukukutilamo bo tukwiputa tukuti, Abba, ko kuti Tata! 16Yo yu Mbepo uyu ikusisimikisya pamopene nimbepo syitu ukuti tuli bana ba Kyala, 17lelo linga tuli bana, po tuli benekilingo; bo tuli bingilapo pakilingo kya Kyala, bo tuli bingilanisi na Kristi, linga naloli tukukubilwa nagwe, ukuti nuswe twisetwimikigwege lumo nagwe.

Ubukulumba bwa nkyeni

18Namanga apa nikwinogona une po nikuti, syosa isi tukukubilwa nkabalilo kakaka, syo tukabagila ukusifwanikisya nubukulumba ubu bukuya pakutubonekela. 19Buno fyope nifipeligwa fyosa fikusyukwa fiyo, fikugulila ukuboneka kwa bana ba Kyala. 20#Bwa 3.17-19Namanga ifyene ifipeligwa fyo filambile muli uyu afilambikaga, ndusubilo ulwa kuti 21fyope na fi fipeligwa fisakwabuligwaga ukufuma mbutumwa bwa kubola, ukwakufika kubwabuke ubwa bukulumba bwa bana ba Kyala. 22Namanga tumenye ukuti ifipeligwa fyosa fikwikema fili mbufumbwe ukwisakufika kulilino kuno. 23#2 Kor 5.2-4Fikaya fyo fifyo fyene, mma, loli na yuyuswe twe tulubukile Mbepo, na yuyuswe tukwikema munda mmyitu, tukugulila nubusyukwe ukwambilila ubwana, nukubangigwa umbili gwitu. 24Namanga twapokigwe ndusubilo lululu, loli ulusubilo ulu ikuboneka, lukaya lusubilo lwene; kali ywani ikusisubila isi ikusiketa mmaso? 25Loli linga tukusisubila isi tukasiketa mmaso, po tukusigulila itolo nubufisalyoyo.

26Bunobuno yope na yu Mbepo ikututula ubonywa bwitu; namanga kope na ku kwiputa tukamanya bo apa fikuti twiputege, loli yuyo yu Mbepo ikutupyelekesya nkwikema namasyu aga mapala nukugayoba. 27Umwene loli uyu ikusipima indumbula, yo asimenye isi Mbepo ikusinogona, namanga Mbepo ikubapyelekesya abikemo ukufwana nubwigane bwa Kyala. 28Loli uswe tumenye ukuti bosa aba banganile Kyala, bo ikubapelela utundu tosa ukulabila kubununu, nikubala aba ababilikile, bo papo alinogonile ngani umwene. 29Buno aba abamanyile ngani liyolo umwene, bope abasungulile ngani ukuti bafwanege nikifwani kya Mwanake; ko kuti ayege gwa kipanda mbamyabo ba bingi. 30Abene loli aba abasungulile ngani, bo alinkubabilikila; aba ababilikile bo alinkubayoba ubugolofu, naba abayobile ubugolofu, bo alinkubapa ubukulumba.

Ulugano lwa Kyala mwa Kristi Yesu

31Kali tutigi fiki pali sisisi? Apene apa linga Kyala ali kulubafu lwitu, po ywani at'akindanege nanuswe? 32Kyala uyu na yu Mwanake akalimpakisye, loli alinkumbika mbufwe panongwa yitu twesa, yo at'asite ukutupela lumo nagwe fyosa itolo? 33Po ywani ati abapege inongwa abasunguligwa ba Kyala? Kyala yo uyu ikubayoba ubugolofu. 34Ywani ati abayobege ububibi? Yo yu Kristi Yesu uyu afwile; ena, pamwanya pali isi asyukile mbafwe, yo uyu ali kukiboko ikililo kya Kyala, kangi yo uyu ikutupyelekesya. 35Ywani uyu abagile ukutupagula uswe kulugano lwa Kristi? Kali ubutolwe, kali ubukamandanigwa, kali ukufwimigwa, kali ukusitakuya nifya kufwala, kali ubulugu, kali ukugogigwa? 36#Salimo 44.22Bo lilyo lisimbigwe ilya kuti,

“Panongwa yako tukugogigwa ilisiku lyosa;

tukubaligwa ukuya bo si ng'osi isya kuboligwa.”

37Loli muli syosa sisisi, tukukindilila itolo ukusitolela muli yuyo atuganile. 38Buno singolile une isya kuti, Nalinga buye bufwe pamo bumi, nalinga bandumi pamo bulagili, nalinga tundu twa lilino pamo twa linga siku, 39nalinga ba maka, nalinga bwinufu pamo busolofu, nalinga ko kandu kamo akangi akapeligwa, fyosa itolo fikabagila ukutupagula kulugano lwa Kyala, ulu luli mwa Kristi Yesu uNtwa gwitu.

Currently Selected:

BAROMA 8: NNBII

Highlight

Compare

Copy