BAROMA 7

Ikifwanikisyo kya bwegi

1Mwe bamyitu, mwisakusyagania isi nikuya pakuyoba, (namanga nikuyoba kuli umwe mwe musimenye indagilo), mukasimanya ukuti umundu ikupinyigwa nindagilo bo akali aliko kubumi? 2Namanga unkikulu uyu ali nundume, yo apinyigwe nindagilo kundume akabalilo kosa bo undume aliko kubumi; loli linga afwile, po abuligwe kundagilo isi syalinkungisenie nundume. 3Popapo lelo linga ikusimila njungi, bo undume akali aliko kubumi, po ikuyobigwa ukuya ndogwe; loli linga undume ikufwa, po ikuya mwabuke itolo kundagilo, atikuya ndogwe napa linga ikwegigwa nuyungi.

4Bunobuno lelo mwe bamyitu, nanumwe mufwile kundagilo mu mumbili gwa Kristi, mwipelile ukuya ba yungi itolo, muli ba uyu asyukile mbafwe; ukuti twesa tumpege iseke Kyala. 5Namanga bo tukali tuli ba mbili, po ifinyonyo fya butulanongwa filinkusumusigwa nindagilo, ukubomba ntumbakasya twa mmibili gyitu ukupa iseke imbelabufwe. 6Loli lilino po twabuligwe kundagilo, tufwile kuli aka katupinyile; ukuti tubombelege mbumi ubupya ubwa mwa Mbepo, bomma ubukulu ubwa ndagilo isi sisimbigwe.

Ululagilo nubutulanongwa

7 # Kuso 20.17; Kukumbu 5.21 Kali tutigi fiki lelo, kali tutigi indagilo bo butulanongwa? Mma, tungasulwa! Loli linga sikaliko indagilo, po angali ngabumanya ubutulanongwa; buno kope na ku kutotomela angali ngakumanya, linga sikalimbulile indagilo ukuti, “Ungatotomelaga.” 8Loli ubutulanongwa bo buyagile injila ndukomelesyo, bulinkusumusya ifinyonyo fyosa munda myangu; namanga apa sikayapo indagilo, ubutulanongwa bufwe itolo. 9Lumo une nali mumi itolo bo indagilo sikayako, lelo bo ingomelesyo sisile, ubutulanongwa bulinkusyuka kangi, 10po ndinkwenda nukufwa; po ndinkwaga ukuti ingomelesyo isi syali sya kumba ubumi, sipelile ukuya sya kumba ubufwe sisyo. 11#Bwa 3.13Namanga ubutulanongwa bo buyagile injila mungomelesyo, bulinkunsyoba une nukungogela mu mungomelesyo.

12Bunobuno lelo indagilo syo nyikemo; syope ningomelesyo nyikemo, ngolofu kangi nunu itolo.

Ubwite nkati mmundu

13Loli ngimba lelo akandu aka kali kanunu, ko kalimbelile une ukufwa? Mma bo sikaya! Loli ubutulanongwa bo bulinkubomba sisisi, apa bwabombelaga nkandu akanunu, ubutulanongwa bulinkundwalila une ubufwe, ko kuti bubonekege ukuya butulanongwa naloli; lelo popapo ubutulanongwa bulinkubonekela mu mungomelesyo ukukindilila itolo ukuya butulanongwa naloli. 14Buno tumenye ukuti indagilo syo sya Mbepo, loli une ndi gwa mbili; nulisigwe bo yu ntumwa ukuti njege mbutulanongwa. 15#Gal 5.17Namanga isi nikubomba ndikwibona, papo ndikubomba isi niganile, loli nikubomba isi nsibengile. 16Apene lelo linga nikusibomba sisyo ngigana ukusibomba, bo nikusitika indagilo ukuya nunu. 17Bunobuno lelo ngaya yo yuyune ne nikusibomba sisisi, loli bo bu butulanongwa ubu buyengile mmyangu. 18Namanga menye ukuti nkati mmyangu, ko kuti mumbili gwangu, bukayamo nabumo ubununu; buno napa nikulonda ukubomba inunu, loli ukusibomba ko kundolile. 19Namanga ndikubomba inunu isi nikusilonda, loli imbibi isi ndikusilonda syo ngubomba. 20Lelo linga nikubomba isi ndikusilonda, po ngimba ngaya yo une ne nikusibomba, loli bu butulanongwa ubu buyengile mmyangu.

21Lelo popapo nikusyaga indagilo isya kuti, apa linga nikulonda ukubomba inunu, nikwaga ukuti ububibi bukuboneka mmyangu. 22Namanga umundu gwangu ugwa nkati yo sinkyelile indagilo sya Kyala, 23loli mu ntumbakasya twa mumbili gwangu, mo nikwaga lulimo ululagilo, ulu lukulwa nululagilo lwa mmahala gangu; lukumbela nkoligwa ndulagilo lwa butulanongwa, ulu luli ntumbakasya twa mumbili gwangu. 24Ne mundu ne ntolwe une, kali ywani amboke kumbili gwa bufwe ugu? 25Nikugwa ulupi kwa Kyala, mwa Yesu Kristi uNtwa gwitu. Bunobuno lelo, nimwene namahala gangu nikulubombela ululagilo lwa Kyala, loli umbili nikulubombela ululagilo lwa butulanongwa.

Currently Selected:

BAROMA 7: NNBII

Highlight

Compare

Copy