BAROMA 6

Ukufwa kubutulanongwa nukuya bumi mwa Kristi

1Kali tutigi fiki lelo? Ngimba twendelelege mu mbutulanongwa ukuti ilipyana lya Kyala libalege? 2Mma, tungasulwa; uswe twafwile itolo kubutulanongwa, po tuyege bulebule mumo? 3Mukamanya ukuti uswe twesa twe tokesigwe mwa Kristi Yesu, tokesigwe itolo mbufwe bwake? 4#Kolos 2.12Po apa ndosyo tulinkusyiligwa lumo nagwe ukwingila mbufwe; ukuti bo apa ubukulumba bwa Gwise bwalinsyusisye Kristi mbafwe, mo mumo nanuswe twendelege mbumi ubupya.

5Namanga linga tuli pamopene nagwe mbufwe bwake, po twisakuyaga pamopene nagwe bunobuno na pa pakusyuka. 6Tusimenye ukuti umundu gwitu unkulu akomeligwe lumo nagwe pakipingika ukuti umbili gwa butulanongwa gupyutigwege, ko kuti tungayaga batumwa ba butulanongwa kangi. 7Namanga uyu afwile yo mwabuke itolo kubutulanongwa. 8Apene loli linga tufwilile lumo nagwe Kristi, po tukwitika ukuti mope na mbumi twisakuyaga nagwe. 9Namanga tumenye ukuti, apa Kristi asyukile mbafwe, po atisakwandisyamo ukufwa; ubwene ubufwe butisakwipela ukuya bunyafyale kangi kumyake. 10Namanga ubufwe ubu afwile, bo abufwilile bu butulanongwa kamokene itolo kisita kwandisyamo; ubwene ubumi ubu ali nabo, bo mumi mu mwa Kyala. 11Bunobuno na yuyumwe mwimanyege ukuti muli bafwe kubutulanongwa, loli muli bumi kwa Kyala mwa Kristi Yesu.

12Popapo lelo ubutulanongwa bungipelaga ukuya bunyafyale mmibili gyinu imifwe, ukuti mufitikege ifinyonyo fyabo. 13Tope nutumbakasya twammibili gyinu to mungabupaga ubutulanongwa ukuya fibombelo fya buniongafu; mwiningege itolo ku kwa Kyala, mufwanege bo abandu abumi aba bafumile mbafwe. Tope nutumbakasya twa mmibili gyinu to munningege yu Kyala tuyege fibombelo fya bugolofu. 14Buno ubutulanongwa butisakuyaga bunyafyale pamyimu, papo mukaya pasi pandagilo, loli muli pasi pipyana.

Abatumwa ba butulanongwa

15Bule lelo, kali po tutulege inongwa papo tukaya pasi pandagilo, loli tuli pasi pipyana? Mma, tungasulwa! 16Mukamanya ukuti uyu linga mukwininga ukuya batumwa bake kangi mukupilika kumyake, po mukuya batumwa ba yuyo mukumpilika, nalinga ko kuya mbutumwa bwa butulanongwa ubu bukulabisya kubufwe, nalinga ko kuya mbutumwa bwa lwitikilo ubu bukulabisya kubugolofu? 17Loli tugwege ulupi kwa Kyala, papo umwe mwe mwali batumwa ba butulanongwa, lilino mwipelile bakupilikila nindumbula yosa, ndumanyisyo lulalula ulu mwabikigwemo. 18Kangi apa mwabuligwe ubutulanongwa, po mwipelile ukuya batumwa ba bugolofu. 19Nikuyobela ulwa bundu, panongwa ya bonywa bwa mibili gyinu; namanga bo apa mwatubikile utumbakasya twa mibili gyinu mbutumwa bwa bunyali na mungilanio, ukuti tubombege isi sikaya mundagilo; bunobuno lilino mutubikege utumbakasya twa mibili gyinu mbutumwa bwa bugolofu, ukuti muyege bikemo.

20Namanga apa mwali batumwa ba butulanongwa, po mwali babuke itolo kubugolofu. 21Kali po mwapaga seke siliku akabalilo kala? Nasimo, loli syene isi sikubakosya isoni lilino; namanga isyene ubumalikilo bwabo bo bu bufwe. 22Loli lilino apa mwabuligwe kubutulanongwa, mwipelile ukuya batumwa ba Kyala, mukupa iseke syinu isi silabile kubwikemo, isyene loli kubumalikisyo bo bu bumi bwa bwila. 23Namanga ifihombigwa ifi ubutulanongwa bukunhomba umundu bo bu bufwe; ifyene loli ifyabupe fya Kyala, bo bu bumi bwa bwila na bwila, mwa Yesu Kristi uNtwa gwitu.

Currently Selected:

BAROMA 6: NNBII

Highlight

Compare

Copy