BAROMA 5

Ukutengana na Kyala

1Lelo papo ulwitiko lutupelile ukuyobigwa ubugolofu, po tuli ndutengano na Kyala mu muNtwa gwitu Yesu Kristi; 2muli uyu munjila ya lwitiko tubwagile ubwingililo bwa mwipyana lilili, ili twimilemo; kangi tukwitukifya ndusubilo lwa bukulumba bwa Kyala. 3Kakaya ko kakaka kene, loli tukwitukifya na mbutolwe, bo tumenye ukuti ubutolwe bukupela ubufindang'oma, 4ubwene ubufindang'oma bukupela ubunyambala indumbula, ubwene ubunyambala indumbula bukupela ulusubilo; 5ulwene ulusubilo lutikunsusya yumo, namanga Kyala onile itolo ulugano mundumbula syitu, mwa Mbepo Mwikemo uyu tupegigwe.

6Buno naloli Kristi atufwilile twe batulanongwa pakabalilo akanunu, bo tukali tuli bonywa. 7Namanga kupala ukuti umundu yumo amfwile ungolofu, napapo pamo yumo abagile ukukiba ukumfwila umundu unnunu. 8Loli Kyala anangisye ulugano lwake kumyitu, pala Kristi atufwilege bo tukali tuli batulanongwa. 9Apa lelo tuyobigwe ubugolofu mwilopa lyake, po tukukindililaga ukupokigwa kungalalisi mu mmyake yuyo. 10Namanga linga bwatusayenie na Kyala bu bufwe bwa Mwanake bo tukali tuli balugu itolo, po tukukindililaga itolo ukupokigwa mbumi bwake, apa tusayene lilino. 11Kakaya ko kakaka kene, loli tukwitukifya mwa Kyala muNtwa gwitu Yesu Kristi, uyu twambililemo ulusayano lilino.

Adamu na Kristi

12 # Bwa 3.6 Bo mumo ubutulanongwa bwalyendile mmundu yumoywene ukwisa nkisu muno, mo mumo bope nubufwe bwendile mbutulanongwa, po apa ubufwe bulinkusatanila mbandu bosa papo bosa batulile inongwa. 13Namanga bo sikali indagilo, ubutulanongwa bwalimo nkisu; loli ubutulanongwa butikubaligwa ukuya butulanongwa linga indagilo sikayapo. 14Loli ukufuma pa Adamu ukwisakufika pa Mose, ubufwe bwali bunyafyale itolo, bwabalambike bosa naba ubutulanongwa bwabo bukafwene nulukilanio lwa Adamu, uyu yo kifwani kya uyu ayaga pakwisa.

15Loli ikyabupe kya Kyala iki, kikaya bo ubusobi bula; namanga linga bingi bafwile panongwa ya busobi bwa mundu yumoywene, po likukindililaga itolo ukubalefukila ba bingi ilipyana lya Kyala, nifyabupe fya mwipyana lya mundu yumoywene yula, yu Yesu Kristi. 16Kangi ifyabupe fila, fikaya bo ubutulanongwa bwa mundu yumo yula; namanga ukulongigwa kwa mundu yumoywene kutwele ukuyobigwa ububibi, loli ikyabupe iki kisile mbusobi bu bwingi, kyo kikutwala ukuyobigwa ubugolofu. 17Syanaloli isyakuti mbusobi bwa mundu yumoywene, ubufwe bwalipelile bunyafyale panongwa ya mundu yumoywene yulayula. Loli aba bikwambilila ilipyana, ili likulefuka itolo nifyabupe ifya bugolofu po bikukindililaga itolo ukuya banyafyale bo bali mbumi bwa mundu yumoywene, yu Yesu Kristi.

18Popapo lelo linga ubusobi bwa mundu yumoywene, bwabapelile ukuyobigwa ububibi abandu bosa, po apa bope nubugolofu bwa mundu yumoywene, bubapelile abandu bosa ukuyobigwa ubugolofu nukubapa ubumi. 19Namanga bo apa ulufuyo lwa mundu yumo lwabapelile ba bingi ukuya batulanongwa, bunobuno kope nukwitikila kwa mundu yumoywene kwisakubapelelaga ba bingi bagolofu. 20Isyene indagilo sisile itolo kunyuma ukuti sibubasye ubusobi, posa apa ubutulanongwa bwabele, 21po lyope ilipyana lilinkukindilila ukulefuka, ko kuti bo apa ubutulanongwa bwalipelile ukuya bunyafyale mbufwe, bunobuno lyope nilipyana lipelege ukuya inyafyale mbugolofu, ukututwala kubumi bwa bwila na bwila mwa Yesu Kristi uNtwa gwitu.

Currently Selected:

BAROMA 5: NNBII

Highlight

Compare

Copy