BAROMA 16
16
Uluponio lwake
1Loli une nikuntuma kumyinu Febe ulilumbu gwitu, umbombi gwa kipanga kya Kenkrea, 2ukuti mumwambililege mu muNtwa, bo papo babagile ukubambilila abikemo; muntulege kosa aka linga mwagile afumbilwe, namanga yope ali ntuli gwa bingi, kangi andulaga na yuyune.
3 #
Imbo 18.2
Mumbonekesyege Priska na Akwila, ababombanisi binangu mwa Kristi Yesu, 4aba ubumi bwabo babubikile mbulugu panongwa yangu, ngaya yo yuyune ne nikugwa ulupi kumyabo, loli na fi fipanga fyosa ifya mbapanja; 5Mumbonekesyege na Epeneti unganigwa gwangu, uyu alipelile ukuya gwakwanda pakumwitika Knsti nkisu kya Asia. 6Mumbonekesyege na Maria, uyu iyulaga fiyo pakubabombela umwe. 7Mumbonekesye Androniko na Yuniya, aba tuli kikolo kimo, kangi aba twali pamopene munnyololo, abandu aba bafumwike mbatumigwa, bo aba batalile ukuya mwa Kristi bo ngali une. 8Mumbonekesyege Ampiliati unganigwa gwangu muNtwa. 9Mumbonekesyege Urubani umbombanisi mwinitu mwa Kristi, na yu Staki unganigwa gwangu. 10Mumbonekesyege Apele uyu afumwike fiyo pambombo ya Kristi; mumbonekesyege nabannyumba ya Aristobuli. 11Mumbonekesyege na Herodioni, uyu tuli kikolo kimo; mumbonekesyege nabannyumba ya Naakisi, aba bali mu muNtwa. 12Mumbonekesyege Trifaina na Trifosa, abakikulu aba bikwiyula pambombo ya Ntwa; mumbonekesyege na Persidi unganigwa uyu iyulaga fiyo mumbombo ya Ntwa. 13#Mar 15.21Mumbonekesyege na Rufu unsunguligwa gwa Ntwa, na yu nna, uyu ipelile ukuya yo yuba nanine. 14Mumbonekesyege ba Asinkriti, Flego, Herme, Patroba, Herma, nabamyabo aba bali pamopene nabo. 15Mumbonekesyege Filologi na Yuliya, Nerea nilumbu, na Olimpa, pamopene nabikemo bosa aba bali nabo. 16Amuponaniege mwe babo batupu nuluponio lwa buKristi. Ifipanga fyosa fya Kristi fikubaponia.
Isya kulingania pabumalilo
17Mwe bamyitu, nikubasuma ukuti mwandege kuli aba bikupela indapukano, kangi bikubasofya kulumanyisyo ulu mwamanyisigwe; bo mubepukilege. 18Namanga bababa bo batikumbombela uNtwa gwitu Kristi, loli si nyanda syabo syene; kangi bikubasyoba abandu aba ndumbula isi sitikwinogona imbibi, namasyu gabo amatembelefu nubulyapabili. 19Namanga ukupilikila kwinu kufumwike mbandu bosa, po apa ndi nulusekelo panongwa yinu; lelo une naliganile ukuti muye ba mahala ku bununu; loli ku bubibi ko munginogonelangako. 20Umwene loli Kyala umwenelutengano, yo isakuntikaniaga mbibimbibi Setano kusi kumalundi ginu. Ilipyana lya Yesu Kristi uNtwa lyo liyege nanumwe.
21 #
Imbo 16.1
Timoti umbombanisi mwinangu ikubaponia, na Lukio, na Yasoni na Sosipateri abinangu. 22Nanine ne Tertio, ne nsimbile kalata yuyuyu, nikubaponekesya muNtwa. 23#Imbo 19.29; 1 Kor 1.14; 2 Tim 4.20Ibikubaponia yope na Gayi uyu anyambilile une nnyumba yake, pamopene nikipanga kyosa; ikubaponia yope na Erasto undindililandalama sya kaya aka; na Kwarti ugwamyitu.#16.23 Amasimbo gamo gokongolelako 24: Ilipyana lya Ntwa gwitu Yesu Kristi liyege nanumwe mwesa. Amen.
Ukumalisya nulwiputo lwa lutufyo
25Umwene loli Kyala uyu amenye ukubakasya umwe ukufwana ni Nongwa Inunu isi nikufumusya isya Yesu Kristi, kangi ukufwana nubusetuli bwa sya mbutitu, isi syalibilile ukwanda liyolo. 26Lilino loli po sibonike pabwelu, sifumusigwe kubapanja mmasimbo ga basololi, kangi sikomelesigwe na Kyala uyu aliko bwila na bwila, sifumwike mfikolo fyosa, ukuti bosa bamwitikege nukumpilika. 27Kwa Kyala uyu yo gwa mahala mwene itolo, yo ulwimiko luyeko kumyake, mwa Yesu Kristi, bwilabwila itolo. Amen.
Currently Selected:
BAROMA 16: NNBII
Highlight
Share
Compare
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
