MALAKI 2

1Untwa gwa filundilo ikuyoba ikuti, “Mwe baputi, indagilo isi nikuyoba kumyinu lilino syo syakuti: 2Mubagile ukunyimikila une muli isi mukubomba. Linga mutikupilika kuli isi nikuyoba po nisakutuma ikigune pa fyosa ifi mukwambilila ukuya fyakubatula umwe. Ena mbapele ikigune litasi, papo mutikusikonga nindumbula yosa isi nikubabula. 3Keta, nisakubafunda abaninu nukubapaka indope pafyeni fyinu, indope ya fitimigwa ifi mukwikemesya, nayuyumwe mwisakutwaligwa apa balundike indope. 4Bunobuno mwisakusyagania ukuti ululagilo ulu Youne mbapele umwe, kokuti ulwitikano lwangu ulu nalitikene na baputi ba nduyungu lwa Levi lungisa komoligwaga.

5“Isi nafingene nabo, kwali ko kubapa ubumi nulutengano, kangi nabapele fififi, ko kuti abene bangandekaga une. Mmasiku gala bangindikaga une kangi bandilaga une. 6Balinkubamanyisya abandu isi syali ngolofu, syomma imbibi. Bapilikanaga nanine, sikaya syo nunu syene isi babombaga, loli balinkubagomola ba bingi ku bubibi bwabo. 7Namanga yo mbombo yabaputi ukubamanyisya abandu ukummanya Kyala mbwanaloli abene abandu bo babagile ukubuka kumyabo ukwakumanyilako ubwigane bwangu, papo abene bababa bo babombi ba Ntwa Umwenemaka gosa.

8“Loli umwe mwe baputi mupagwikemo munjila, iya bugolofu kangi bingi aba musofifye nubumanyisi bwinu muli isi mukumanyisya. 9Momwile ulwitikano ulu nalitikene nanumwe, bunobuno nikuya pakubapelela abanya Israeli ukubaywelula umwe, papo mutikwitika ukukonga ubwigane bwangu, papo linga mukubamanyisya abandu bangu mukuketela mbundu bwa mundu.”

Abanya Israeli bikukemeligwa papo bakaya basubiligwa

10Ngimba uswe twesa tukaya na tata yumoywene? Ngimba akaya yo yu Kyala yumoywene itolo uyu atupelile? Nongwa yafiki tukaya basubiligwa, uyu na uyu kunnine: nukonanga ulwitikano ulu Kyala alitikene nabatata? 11Abandu ba nkisu kya Yuda bomwile ulwitikano ulu balitikene na Kyala kangi babombile imbela kinyanyasi mu Yerusalemu nankisu kyosa. Bayinyasisye Inyumba ya Kyala iyi ayiganile umwene. Abanyambala begile abakikulu aba bikwiputa ku bakyala abahesya. 12Oko, Untwa Kyala abasosyemo mbanya Israeli bosa aba bikubomba sisisi nukubakanisya ukuti bangayaga nikiyabo kimo mmakemo aga abankikolo kyitu kikuntwalila Untwa Kyala Umwenemaka gosa.

13Akandu akangi aka mukubomba ko kakuti. Mukwisusya amasosi pakigemo kya Ntwa, apa mukulila nukwikema panongwa yakuti Untwa Kyala akanile ukwambilila amakemo aga mukuntwalilaa. 14Mukulalusya mukuti, “Nongwa yafiki atikwambilila amakemo aga?” Inongwa yake yakuti Untwa asimenye ukuti ugwe gomwile ulwitikano ulu lulipo pakati pali ugwe nunkasigo ugwa mbutubwa bwako, umwene unkasigo yo alindilanisi palikimo nanugwe. Loli lilino gomwile isi gwafingile ku nkasigo, napapo ugwe gwafingile nkyeni mUntwa Kyala ukuti kwisakuyaga nsubiligwa kunkasigo. 15Ngimba akaya yo Kyala uyu abapelile umwe ukuya mbili gumogwene nagwe numoyo gumogwene? Ngimba isi atendekisye syali syakuti fiki? Ngimba bukali bwigane bwa Kyala ukuti umundu ayege nabana aba bikuntila Kyala? Bunobuno muketege bununu ukuti akayako yumo mmyinu uyu ikomola isi afingene nunkasi gwake. 16Untwa Kyala gwa filundilo, uyu yo Kyala gwa Israeli ikuyoba ikuti, “Namanga une nsibengile isya kulekana. Une nsibengile apa linga yumo mmyinu nindumbula ingasi ikumbombela unkasi gwake bo sisisi. Ukete bununu ukuti utikomola ulufingo ulu gwafingile ku nkasigo ukuti kuyaga nsubiligwa kumyake.”

Ilisiku lya bulongi lisegelile

17Munkatesye Untwa namasyu ginu. Loli umwe mukulalusya mukuti, “Ngimba tunkatesye bulebule?” Apa mukuyoba mukuti, “Untwa Kyala ikwinogona ukuti umbombambibi gwesa nnunu itolo kumyake, kangi umwene ikwikyela nabandu aba bali bo bunobuno.” Ena, mukunkatasya Untwa napa linga mukulalusya mukuti, “Ngimba alikugu Kyala uyu ikulongela mbugolofu?”

Currently Selected:

MALAKI 2: NNBII

Highlight

Copy