MALAKI 3
3
1Untwa ikwamula ikuti, “Keta, nikuya pakuntuma umbombi gwangu ukwakutendekesya injila nkyeni mmyangu, po lelo Untwa Kyala uyu mukundonda, isakwisa mbibimbibi itolo nnyumba yake inyikemo. Umbombi gwake uyu mukunsyukwa ukumbona isakwisa nukufumusya isya lwitikano lwangu.” 2Loli ngimba ywani uyu abagile ukukiba mwisiku lila bo umwene ikwisa? Ywani abagile ukupona ukuti ayeko kubumi bo umwene abonike?
3Namanga Untwa isakuyaga bo yi sopo iya maka, kangi bo gu moto ugu gukwelusya ikyela. 4Isakwisa pakulonga bo yu mundu uyu ikwenga nukwelusya ikyela kya siliva. Bo mumo ikubombela umposi ukwelusya siliva na golide. Momumo isakubombelaga umbombi gwangu pakubelusya abaputi ukuti bantwalilege Untwa amakemo aga gabagile.
5Untwa Umwenemaka gosa ikuyoba ikuti, “Nisakuboneka itolo nkati mmyinu pakubalonga. Nisakubasisimikisyaga nakalinga itolo aba bikubomba isya manjele nisya bulogwe, naba bikwipela ukuya baketi ba butungulu naba bikubasyoba abandu aba babingisye pambombo, abandu aba bikunsyoba umfwilwe, numwana umpina, numundu uyu yo mponi nkati mmyabo, kangi nabandu bosa aba batikungindika une.”
Ifyakupa fya pilongo
6Untwa ikuti, “Namanga une ne Ntwa, ndinkwandukamo. Bunobuno nnumwe mwe bana ba Yakobu, mukali mukamalika losa. 7Umwe ukufwana itolo na bisemwe, mwepwikeko ku ndagilo syangu, mukasikonga mma. Gomokela kumyangu, po lelo nanine nikugomokelaga kumyinu. Loli umwe mukulalusya mukuti, ‘Ngimba tubombege sya fiki ukuti tugomokele kumyako?’ 8Po lelo nikubalalusya nikuti, Ngimba kununu ukuti umundu ansyobege Kyala? Naloli akabagila ukunsyoba. Loli umwe mukunsyoba une. Kangi mukulalusya mukuti, ‘Bulebule?’ Mukunsyoba une nifyakusopa finu ifya kiyabo kimo mfiyabo kalongo (1/10). 9Muli bagunigwa mwesa papo ikikolo kyinu kyosa itolo kikunsyoba une. 10Mutwalege Nnyumba ya Kyala ifyabupe finu ifya kiyabo kimo mfiyabo kalongo (1/10), ukuti ifyakulya fisulege itolo mumo. Oko, mungele tukete, mwisakwaga ukuti nigwile amatubulo ga kumwanya, nukonelela pamyinu umwe ulusayo ulu lukelilwe itolo. 11Nisakutukanisya utu tukonanga imbeyu sya mmigunda gyinu, kokuti tuleke ukulya ifi mubyele mmigunda gyinu. Kangi na ga mafilu ga mmigunda gyinu sitisakutoligwa ukupa iseke. 12Po lelo ifikolo fyosa fya bandu fisakubayobaga umwe ukuti muli basayigwa, namanga ikisu kyinu kisa kuya kinunu ukutugalamo.”
Kyala ikufinga ukunangisya ikisu
13Untwa ikuti, “Munjobile une inongwa imbalapala. Loli mukulalusya mukuti, ‘Ngimba tukuyobile isya fiki?’ 14Muyobile mutile, sya itolo fiyo ukuti tumbombelege Untwa. Ngimba bo bununu buliku ubu bulipo ukuti tusyumililege isi ikutubula, pamo ukuti tunnangisyege Untwa gwa filundilo ukuti tusulumenie pali isi tubombile? 15Bo mumo tusibonile, bo ba bandu balwiyumbiko aba bikutugala mbusangalufu. Aba bikubomba imbibi batikwaganila nubununu bwene mma, loli napa linga bangelile Kyala, katikubagwila nakamo akabibi.”
16Bunobuno abandu aba bantilaga Untwa Kyala balinkuyobesania uyu nunnine, po lelo Untwa Kyala alinkusimanya nukusipilika. Nkyeni mwa Kyala ingamu sya aba bantilaga Untwa nukumwimika, silinkusimbigwa mwa buku. 17Untwa ikuyoba ikuti, “Abene bisakuyaga bandu bangu. Mwisiku lilyo bo une nikusibomba sisisi, bisakuyaga bandu bangu abapaguligwa. Nisakunangisya ikisa kumyabo bo mumo ugwise ikubombela kumwanake uyu ikumbombela. 18Popapo abandu bangu bisakumanyaga ukukindana kwa isi sikubagwila abagolofu na baniongafu, kumundu uyu ikumbombela une na uyu atikumbombela une.”
Currently Selected:
MALAKI 3: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
