IMBOMBO SYA BATUMIGWA 27

Pauli ikwenda pa nyanja ukubuka ku Roma

1Lelo bo situmuligwe ukuti uswe tukwipakaga mungalaba ukubuka nkisu kya Itali, popapo Pauli nabapinyigwa abangi balinkubikigwa mmaboko ga sarjenti yumo ugwa kilundilo kya Kaisari, uyu ali yo Yuliasi ingamu. 2Bo twipakile mungalaba iyi yafumile pa kiloboko kya Adramiti, iyi yayaga pakwenda ntwaya twa mumbali nkisu kya Asia, tulinkubuka; twali na Aristarki ugwa nkisu kya Makedonia uyu afumile nkaya ka Tesalonike. 3Ulwa kilabo tulinkufika pakiloboko kya Sidoni; umwene Yuliasi alinkuya nikisa kwa Pauli, alinkumwitikisya ukubuka kubamanyani bake nukuti bakampayisyege ifyakupaya. 4Tulinkusumuka ukufuma mumo, tulinkwenda ndubafu ndusungo lwa Saiprasi, lo lulinkutusiga umbelo, namanga umbelo gwatupingaga. 5Lelo, bo tutumusenie inyanja ya kulubafu lwa kisu kya Kilikia nikya Pamfilia, popapo tulinkufika nkaya ka Mira nkisu kya mu Likia, 6mo sarjenti alinkuyaga ingalaba ya ku kiloboko kya Aliksandria iyi yabukaga nkisu kya Itali, popapo alinkutupakila mumo. 7Popapo tulinkwenda mbolambola amasiku ga mingi, tulinkufika nkaya ka Kinido nubupalapala; lelo papo umbelo gwatupingaga, popapo tulinkwendela kulusungo lwa Kreti, lo lulinkutusiga umbelo, tulinkwenda pabupipi nunkunda gwa Salamone. 8Tulinkulukinda nubutolwe fiyo, tulinkwakufika pabuyo bumo apa bikuti po pa Mikunda Iminunu, pabupipi nakaya ka Lasea.

9Tulinkutugala akabalilo akatali pakiloboko ikinunu pala kabuya akabalilo akapalapala kakinda ukuti twendege injila yitu, namanga akabalilo ka kufipika ifyakulya kakindile, popapo Pauli alinkubasoka abandu alinkuti, 10“Bagwitu, njibwene injila iyi ukuti yisakuya nulonangiko nukuyonga ku kwingi, ndikubala fyene fi fitwalo ningalaba, mma, loli bope na bu bumi bwitu.” 11Umwene loli sarjenti alinkusitika isya mwendesyangalaba nisya mwenenayo, ukukinda isi ayobaga Pauli. 12Lelo papo balyagile kukabagila ukugonamo nkiloboko kila nkabalilo ka mapepo, bingi balinkutumula ukuti basokengemo, ko kuti linga sikwitika, bakafikege pa kilobolo kya Feniki. Kikiki kyo kiloboko kya lusungo lwa Kreti, iki kikuketa kwitongokubwabuyongelo na kululukubwabuyongelo, ukuti mo bakayege mumo nkabalilo ka mapepo.

13Lelo bo gwinwike umbelo gwa kwitongo gukukula mbolambola, balinkwinogona ukuti basyagile isi balondaga; popapo balinkufyusya inyangula, balinkukonga mumbali ndusungo lwa Kreti pabupipi itolo nikisu. 14Lelo bo pakakindapo fiyo, popapo gulinkukula umbelo gwa kafulafumbi ukufuma kwisilya ugu bikuti yo Yurakilo ingamu; 15iyene ingalaba yilinkunyakigwa itolo, yilinkutoligwa ukulwa numbelo, popapo tulinkuyilekesya ukuti yegigwege itolo. 16Bo tukukinda mbibimbibi nkasungo aka bikuti yo Kauda ingamu, aka katusigaga umbelo, tulinkukafyusya akaboti nubutolwe ubukulumba fiyo. 17Lelo bo bakafyusisye, balinkubomba isya kuyitula ingalaba, balinkuyipinya ingwamba; kangi papo batilaga ukuti bisakwikolaga munsanga ugu bikuti yo Sirti ingamu, balinkusulusya umwenda gwa pandongoti, popapo balinkwegigwa itolo. 18Lelo bo twagile tukukubilwa fiyo nukusambuka kwa nyanja, ulwa kilabo balinkwanda ukufisopa ifitwalo mmisi; 19pisiku lya butatu, ifibombelo fya mungalaba balinkufitaga munyanja namaboko gabo. 20Lelo bo twagile ilisuba nindondwa fitikuboneka kumasiku mingi, nukusambuka kwa nyanja ku kwingi itolo kutumilisye, popapo ulusubilo losa ulwa kuti tukuponaga lulinkwenda nukuyonga.

21Lelo bo bagonile amasiku mingi kisitakulya ifyakulya, popapo Pauli alinkwima pakati pamyabo, alinkubabula alinkuti, “Mwe bagwitu, linga mwalimbilike apa natigi tungasokangamo ndusungo lwa Kreti, po angali tuponile kulonangiko lululu nukuyonga kukuku. 22Nalilino nikubakasya ukuti musangalukege, buno akayamo yumo mmyinu uyu ubumi bwake bwisakuyongaga, loli yene yi ngalaba. 23Namanga ikilo kikiki ugwandumi gwa Kyala uyu ndi mundu gwake, kangi uyu nikumbombela, alyimile pabupipi nanine, 24yo alinkumbula alinkuti, ‘Ungatetemaga gwe Pauli, buno fikuti ukimege nkyeni mwa Kaisari, keta Kyala akupele bosa aba kwenda nabo.’ 25Po apa nikuti amusangalukege bagwitu, buno nikunsubila Kyala ukuti sisakuyaga bo mumo ambulile. 26Loli tukwikolaga palusungo lumo.”

27Lelo pakilo ikya kalongo na buna, bo tukwelela itolo munyanja ya Adria, pakilo ababombi ba mungalaba balinkwinogona ukuti ikisu kimo kili pabupipi. 28Popapo balinkupima ubusolofu bwa misi, balinkwaga buli pa mikwamba amalongo mabili (20); bo bendilepo panandi, balinkupima kangi, balinkwaga buli pa mikwamba kalongo na mihano (15). 29Bo tukupasya ukuti pamo twisakwikinya muno silimo inyalabwe, popapo balinkusopa inyangula ina kunyuma; balinkwiputa ukuti bukyege. 30Lelo bo ababombi ba mungalaba bikulonda ukuyonga nukuyileka ingalaba, bo balisulwisye iliboti munyanja, bikufwana bikulonda ukusopa inyangula kukipulo, 31popapo Pauli alinkumbula sarjenti nabasikali alinkuti, “Linga abandu bababa batikuya mungalaba, mukabagila ukupona.” 32Popapo abasikali balinkubuta imbote sya iboti, balinkulileka ukuti liyongelege mmisi.

33Bo bukuya pakukya, popapo Pauli alinkubatengulila bosa ukuti balyege ifyakulya, alinkuti, “Lilino mulindile amasiku kalongo na mana bo mukugulila, muli ninjala, mukalyamo nafimo. 34Po apa lelo nikubasuma ukuti amulyege ifyakulya, namanga po mwisakuponaga; buno nayumo nkati mmyinu uyu ulunywili lwa kuntu gwake lwisakuyongaga.” 35Lelo bo ayobile sisisi, alinkwega ikisyesye, alinkugwa ulupi kwa Kyala nkyeni muli bosa, alinkumenyania, alinkwanda ukulya. 36Popapo bosa balinkwikasya, bope balinkulya ifyakulya. 37Lelo twesa muno twayilile mungalaba, twali twe bandu bamia babili na malongo mahano na mabili, na ntandatu (276). 38Lelo bo bikwite ifyakulya, popapo balinkuyipepula ingalaba, balinkutaga ingano munyanja.

39Lelo bo bukile, balinkusita nukukimanya ikisu; loli balinkugwaga unkunda ugu gwali nubutengamu, ugu binogonaga ukuyitwalapo ingalaba linga sitikaga. 40Popapo balinkusosyako inyangula, balinkusileka munyanja, bo kuno bikwabula ingoye isi bapinyile ingafi sya kufigila; lelo bo bafyusisye umwenda gwa kukipulo nukugulabisya kumbelo, popapo balinkuyilabisya kubutengamu. 41Abene balinkwaga bafikile pabuyo ubu bwatundumele munyanja, popapo ingalaba yilinkwikinya papo, yilinkwikola kukipulo, yilinkusita nukusukanika; loli kunyuma yilinkwanda ukupanguka panongwa ya maka ga mayiga. 42Abene abasikali balinkwitikana ukubagoga abapinyigwa, ukuti nayumo angogelaga nukuyonga. 43Loli umwene sarjenti bo ikulonda ukumpoka Pauli, alinkubakanisya isi balitikene, alinkubalagila aba bamenye ukogela, ukuti batalege ukwitaga mmisi nukubuka pisilya; 44abangi aba basyele, alinkuti bikufyukilaga pisilya, bamo pamatapwa, abangi ntundu utungi twa mungalaba. Bunobuno bosa itolo balinkuponela pisilya.

Currently Selected:

IMBOMBO SYA BATUMIGWA 27: NNBII

Highlight

Compare

Copy