IMBOMBO SYA BATUMIGWA 26
26
Pauli ikwinokesya nkyeni mwa Agripa
1Popapo Agripa alinkumbula Pauli alinkuti, “Gwitikisigwe ukwiyobela gwimwene.” Popapo Pauli alinkugolosya ikiboko, alinkwilongela alinkuti, 2“Nikwibona ukuya gwa lusako, gwe Malafyale Agripa, papo umusyugu nikuya pakwinokesya nkyeni mmyako, syosa isi bikundonga abaYuda; 3namanga ukindilile ukwisibisania ninyiho ningani syosa sya baYuda, po apa nikusuma kumyako ukuti umbilikisyege, singakukatasyaga. 4Bosa abaYuda bakamenye akayilo kangu ukufuma mu mbukeke, papo ukufuma pabwandilo, ngulile mu nkikolo kyangu nkaya ka Yerusalemu; 5#Imbo 23.6; Filip 3.5bamenye fiyo ukufuma liyolo linga biganile ukusisimikisya ukuti nali gwa nkabugutila ka aba bakindilile itolo ukwiyumika, bo mumo luyilile ulwitiko lwitu, nali mFarisai. 6Loli lilino nimile papapa nikulongigwa panongwa ya lusubilo lwa lufingo, ulu Kyala afingene nabatata; 7ulu ifikolo fyitu kalongo na fibili fikusubila ukulwaga, bo fikwiyula ukumbombela Kyala pamusi na pakilo; lo lusubilo ulu bikundonga abaYuda, gwe Malafyale. 8Fiki mukwinogona ukuti sikaya sya kusitika, isyakuti Kyala ikubasyusya abafwe? 9#Imbo 8.3; 22.4-5Nanine ninogonaga ukuti fikuti mbombege si nyingi isi sikindene ningamu ya Yesu gwa nkaya ka Nazareti; 10syo isi nasibombile nkaya ka Yerusalemu, nabigalilaga abikemo ba bingi munnyololo, bo abaputi abakulumba bambele amaka, kangi bo bikugogigwa ndinkwitikila itolo. 11Na nnyumba syabo syakwiputilamo ndinkubafunda kabilikabili, ndinkubafimbilisya ukutuka amahelu; ndinkufwana mbakimbilile itolo ikigili ukubafwima, ndinkwakufika na ntwaya twa bapanja.
Pauli ikupanga mu no apindukile
(Imbo 9.1-19; 22.6-16)
12“Popapo lelo bo nikubomba sisisi, ndinkubuka nkaya ka Damaska mmaka na mundagilo sya baputi abakulumba. 13Popapo lelo gwe Malafyale pamusi bo lili pantu, bo ngwenda munjila, ndinkulubona ulumuli lufumile kumwanya, lukumulika ukulikinda nisuba, lulinkumulika ukusyungutila une pamopene naba nali nabo. 14Bo twesa tugwile pasi, popapo ndinkupilika ilisyu likuyoba nanine nkiHiburi likuti, ‘Gwe Sauli, gwe Sauli, kufwima fiki? Kwifulasya itolo ukugubaya undunda.’ 15Loli une ndinkulalusya ndinkuti, ‘Gwe ani gwe Ntwa?’ Umwene uNtwa alinkwamula alinkuti, ‘Yo une Yesu ne kufwima. 16Loli sumukaga gwimege namalundi gako, namanga yo nongwa iyi ngusetukile, ukukwimika ugwe ukuya mbombi gwangu kangi nukuya nketi gwa syosa isi usibwene, na isi nisakwibonekesyangamo mmyako. 17Nisakukupokaga kubandu bababa, na kubapanja kuno nikukutuma lilino, 18ukuti ukabigulege amaso, ko kuti bagomokeko kumaka ga Setano, bisege kwa Kyala; nukuti bambililege ubuswe bwa nongwa, nikilingo nkati muli aba bipelile bikemo ndwitiko ulu luli mmyangu.’
Pauli ikupanga isya mbombo yake
19“Po apa lelo gwe Malafyale Agripa, ndinkusita nukukila ikisetuka kya kumwanya kikiki. 20#Imbo 9.20,28-29Loli ndinkutala ukulumbilila ku ba nkaya ka Damaska na ba nkaya ka Yerusalemu, na nkisu kyosa ikya mu Yudai, kangi na kubapanja bosa ukuti bapindukege nukugomokela kwa Kyala, babombege imbombo isi sibagisenie nulupinduko. 21Panongwa yiyiyi, abaYuda balinkungola Nnyumba ya Kyala, batigi bangoge. 22Lelo papo Kyala anyimile une ukwisakufika kulilino kuno, po apa nimile nikusisisimikisya kubafumuke nakubaywelufu; ndikuyoba nasimo isingi, loli syene isi bayobaga abasololi na Mose, ukuti sisakubonekaga, 23#Yes 42.6; 49.6; 1 Kor 15.20isya kuti Kristi fikuti akubilwege, nukuti ikuyaga ntasi yuyo ukusyuka mbafwe, ikulufumusyaga ulumuli lwa bupoki kukikolo iki na kubapanja.”
24Lelo bo ikwinokesya sisisi, Festi alinkwinula ilisyu alinkuyoba alinkuti, “Gwe Pauli, uli nikigili; ubumanyi ubu umanyile fiyo bukupelile ikigili.” 25Umwene Pauli alinkwamula alinkuti, “Ngaya nikigili gwe mwimikigwa Festi; loli amasyu aga nguyoba ga naloli kangi ga mahala. 26Buno uliMalafyale uyu asimenye syosa sisisi, kangi nikuyoba kumyake kisita kutila, namanga menye ukuti sikayako simo isi sindegenie; buno sisisi sikalipelile mbutitu. 27Bule gwe Malafyale Agripa, kubitika abasololi? Menye ukuti kubitika.”
28Popapo Agripa alinkumwamula Pauli alinkuti, “Nkabalilo kapimba itolo kulonda ukumbela ukuya nKristi?”
29Umwene Pauli alinkuti, “Nalinga kaye kabalilo kapimba, nalinga kaye katali, nansumaga Kyala ukuti ungayaga nKristi gwimwene, loli na bosa aba bambilike umusyugu, ukuti bayege bo yuyune; loli kwene ku kupinyigwa ko bangafwanaga nanine.” 30Popapo uMalafyale alinkusumuka pamopene nundindililakisu na Bernike na bosa aba batugasenie nabo; 31lelo bo bikwabilepo, popapo balinkuyobesania balinkuti, “Umundu yuyuyu akabomba simo isi simbagile ukugogigwa pamo ukupinyigwa.” 32Umwene Agripa alinkumbula Festi alinkuti, “Umundu yuyuyu angali abuligwe, linga akayobile ukuti inongwa yake yikindege kwa Kaisari.”
Currently Selected:
IMBOMBO SYA BATUMIGWA 26: NNBII
Highlight
Share
Compare
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
