IMBOMBO SYA BATUMIGWA 25
25
Pauli ikusuma ukuti Kaisari yo akalongege inongwa yake
1Umwene Festi bo ingile mbulindilili bwake, bo gakindile amasiku matatu, popapo alinkufyuka ukubuka nkaya ka Yerusalemu ukufuma nkaya ka Kaisaria. 2Popapo abaputi abakulumba nabakulumba mbaYuda balinkusitwala nkyeni mmyake inongwa sya Pauli, balinkumpyelesya, 3balinkunsuma ukuti abimilege, ambilikilege Pauli ukuti isege nkaya ka Yerusalemu; abene bo bitikene ukunsigila panjila nukungoga. 4Umwene Festi loli alinkwamula alinkuti, “Pauli ikulindililigwa nkaya ka Kaisaria, nanine ndi pipi ukubuka. 5Kangi alinkuti, Lelo aba bapegigwe amaka mmyinu, bo basulukege nanine, ukuti bakandongege imbibi isi ali nasyo umundu yuyuyu.”
6Lelo bo agonilemo amasiku aga bakakindilepo mahano namatatu pamo kalongo, popapo alinkusuluka ukubuka nkaya ka Kaisaria. Ulwa kilabo, alinkutugasya pakikota kya bulongelo, alinkulagila ukuti bantwalege Pauli. 7Lelo bo isile, popapo abaYuda aba bafumile mu Yerusalemu balinkunsyungutila, balinkumohela inongwa isito si nyingi, isi bakabagile nukusisisimikisya. 8Umwene Pauli alinkwilongela ilya kuti, “Ngatulamo inongwa yimo ku ndagilo sya baYuda, nalinga ko ku Nyumba ya Kyala, nalinga ko kwa Kaisari.” 9Umwene Festi bo ikuti banjobege ubununu abaYuda, alinkumwamula Pauli alinkuti, “Bule kulonda ukuti ufyukege mu Yerusalemu, ukuti mo ngalongelege inongwa syako sisisi?” 10Umwene Pauli alinkuti, “Une nimile nkyeni nkikota kya bulongi bwa Kaisari, po fikuti ndongeligwege papo. Ngabaligamo simo abaYuda, bo apa nanugwe usimenye fiyo. 11Apene loli linga ndi ntulanongwa, linga mbombile simo isi simbagile ukufwa, une ndikukana ukufwa; loli linga sikayamo simo muli isi bikundonga bababa, po nayumo akabagila ukumbika mmaboko gabo; nikusuma ukukinda kwa Kaisari.” 12Popapo Festi bo ayobene naba lukomano, alinkwamula alinkuti, “Utile nikukindaga kwa Kaisari, popapo kubukaga ku kwa Kaisari.”
Pauli ali nkyeni mwa Agripa na Bernike
13Lelo bo pagonilepo, po umalafyale Agripa pamopene na Bernike balinkubuka nkaya ka Kaisaria kukumponia Festi. 14Lelo papo bagonilemo mumo amasiku mingi, popapo Festi alinkumpangila umalafyale inongwa sya Pauli, alinkumbula alinkuti, “Alipo umundu yumo uyu Feliki alindekile munnyololo, 15uyu bo mbukile mu Yerusalemu, abaputi abakulumba nabakulumba mbaYuda basitwele inongwa syake, ukuti alongigwege nukufundigwa. 16Ndinkubamula ndinkuti lukaya lwiho abaRoma ukubabulila umundu gwesa ugwa nongwa, bo akali ukwaganila naba nongwa yake, ukuti apage pabwinokesyo munongwa yake. 17Lelo bo babungene papapa, po ndinkusita nukuhabapo; ulwa kilabo ndinkutugasya pakikota kya bulongi, ndinkulagila ukuti bantwale umundu yula. 18Lelo bo bimile aba nongwa yake, balinkusita nukutwala simo inongwa imbibi bo mumo ninogonelaga; 19ndinkwaga masyu gamo ga lukani itolo panongwa ya lwitiko#25.19 Lwitiko: bamo bikuti ikiputo. lwabo, nisya mundu yumo Yesu uyu afwile, uyu Pauli ikuti mumi itolo.
20“Lelo bo ndoligwe ukusyagania inongwa sisisi, popapo ndinkundalusya linga alondaga ukubuka nkaya ka Yerusalemu, ukuti mo sikalongeligwege syosa sisisi. 21Loli Pauli bo asumile ukuti alindililigwege ukufika papo isakutumulaga inongwa Kaisari, popapo ndinkulagila ukuti alindililigwege ukufika papo nisakuntumaga kwa Kaisari.” 22Popapo Agripa alinkumbula Festi alinkuti, “Nanine nalondaga ukumpilikisya umundu yuyuyu.” Umwene Festi alinkuti, “Kumpilikisyaga kilabo.”
23Ilya kilabo, Agripa na Bernike balinkwisa nubusisya ubukulumba, balinkwingila mbulongelo inongwa, pamopene nabalongosi ba basikali, nabakulumba ba kaya. Lelo bo Festi alagile, popapo balinkuntwala Pauli. 24Festi alinkuyoba alinkuti, “Gwe Malafyale Agripa, na mwesa mwe banyambala mwe muli nanuswe papapa, mukumbona umundu uyu, yo uyu ifilundilo kyosa kya baYuda kyasumaga kumyangu nkaya ka Yerusalemu na munomuno, kilinkuywega kilinkuti, Umundu yuyuyu akabagila ukuti ayengeko kubumi. 25Loli une nagile ukuti akabombamo simo isya kumpelela ukugogigwa; umwene loli bo asumile ukukinda kwa Kaisari, popapo ndinkusitumula ukuti nikuntumaga. 26Lelo une ngaya nasyo simo mmundu uyu isya bwanaloli, isya kunsimbila umalafyale Kaisari fyobene nuntwele kumyinu, fiyo kumyako gwe Malafyale Agripa, ukuti bo tundalusisye, nsyage simo isya kusimba. 27Namanga une nikuti sikuyaga sya bukonyofu itolo ukuntuma umpinyigwa, kisita kusimba inongwa isi ikulongigwa.”
Currently Selected:
IMBOMBO SYA BATUMIGWA 25: NNBII
Highlight
Share
Compare
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
