IMBOMBO SYA BATUMIGWA 24

AbaYuda bikumpa inongwa Pauli

1Lelo bo gakindile amasiku mahano, popapo umputi unkulumba Anania alinkubuka nabakulumba bamo, pamopene nunjobanongwa yumo uyu ali yo Tertuli ingamu; bo balinkumpangila undindililakisu isi bandongaga Pauli. 2Umwene Pauli bo abilikiligwe, popapo Tertuli alinkwanda ukohela alinkuti, “Bo mumo tukulwagila ulutengano ulwingi mmyako, gwe mwimikigwa Feliki, kangi bo mumo mmahala gako ufyandwile ikikolo iki, 3munjila syosa na mosamosa, popapo lelo tukusyambilila nukugwa ulupi fiyo. 4Loli kisita kukukabisya, nikupyelesya ukuti nkisa kyako utupilikisyege bo tukusinyaka itolo inongwa sisisi. 5Namanga tumwagile umundu yuyuyu ukuti ipelile mbungo ya kilalilali itolo, ikupalisya akapasyu mbaYuda nkisu fyosa; yo ntu gwa kabugutila ka baNazareti. 6Kangi agelaga nukuyinyasya iNyumba ya Kyala popapo tulinkunkola.#24.6 Amasimbo gamo gikongelelako amavesi 6b-7: Twalondaga ukundonga nindagilo syitu, loli Lisia unkulumba gwa basikali alinkwisa nukunsosyamo mmaboko gitu kumaka, alinkubalagila aba nongwa yake ukuti bisege kumyako. 8Nanugwe lelo linga kumwania yuyo, po ubagile ukusyaga syosa sisyo twandongaga.” 9Bope nabaYuda balinkongana nagwe pakumohela, ukuti naloli bo sili.

10Popapo undindililakisu alinkunsosola Pauli nikiboko ukuti ayobege. Umwene alinkwamula alinkuti, “Papo menye ukuti uli ndongi gwa kikolo kikiki ifyinja fi fingi, popapo nanine isi ndi nasyo nikwinokesya nulusekelo. 11Nanugwe linga utile naniege, kwisakwaga ukuti gakakindapo amasiku kalongo na mabili, ukufuma apa mfyukege ukubuka nkaya ka Yerusalemu nkwiputa. 12Kangi bakanyagamo Nnyumba ya Kyala bo nikukanikana nagwe yumo, kope nukupalisya akapasyu nkilundilo ngapalisyamo, nalinga muye mo mu nyumba yakwiputilamo pamo nkaya; 13syope nisi bikunyohela papapa, bakabagila ukusisisimikisya. 14Loli syo mbagile ukwitika kumyako, isya kuti ngubombela mwa Kyala gwa batata munjila iyi bikuti kabugutila itolo, une nikusitika isi sisimbigwe mundagilo sya Mose na mmasyu ga basololi. 15Ndi nulusubilo mwa Kyala, bo lulo bope bikulwitika, ulwa kuti kwisakuyako ukusyuka kwa bagolofu nabaniongafu. 16Po apa nanine nikwiyula ukuti inyibonelo syangu singayaga nakababye nakamo nkyeni mwa Kyala, na nkyeni mbandu utubalilo tosa. 17#Imbo 21.17-28Bo fikindilepo ifyinja fi fingi, nalisile mukubatwalila aba kikolo fyangu ifyabupe nifyakwikemekesya; 18po apa balinkunyaga Nnyumba ya Kyala bo niyelwisye kisita kilundilo, kangi kisita njwego. 19Loli balipo bamo abaYuda aba nkisu kya Asia aba balinyagile, bo aba babagile ukuyapo papapa nkyeni mmyako, nukundonga simo isi linga bali nasyo kumyangu. 20Nalinga bo bababa, balibuyobaga ububibi ubu babwagile mmyangu bo nimile nkyeni ndukomano; 21#Imbo 23.6pamo lyene li lisyu lila ndatege bo nimile ndukomano ili natigi, ‘Umusyugu ngulongigwa nkyeni mmyinu panongwa ya kusyuka abafwe.’ ”

22Umwene Feliki bo asimenye bununu inongwa sya njila yiyiyi, popapo alinkubimika tasi alinkuti, “Linga asulwikeko Lisia, unkulumba gwa basikali, po nisakutumulaga inongwa yinu.” 23Popapo alinkundagila sarjenti ukuti andindililege Pauli, nukuti anhobolege, nukuti bangankanisyaga yumo ummanyani ukumbombela.

Pauli ali nkyeni mwa Feliki na Drusila

24Lelo bo gakindilepo amasiku manandi, popapo alinkwisa Feliki nunkasi gwake Drusila, uyu ali nJuda, alinkutuma indumi iya kumbilikila Pauli, alinkumpilikisya bo ikuyoba isya lwitiko lwa mwa Kristi Yesu. 25Lelo bo ikusiyoba isya bugolofu, nisya kwifimbilisya, nisya kulongigwa uku kukwisaga, popapo Feliki alinkutetema, alinkwamula alinkuti, “Lilino bukaga tasi, nikukubilikilaga kangi bo nkagile akabalilo akanunu.” 26Kulubafu lumo asubilaga ukuti pamo Pauli ikunhombaga indalama. Po apa ambilikilaga kabili kabili ukwangala nagwe.

27Lelo bo fikindilepo ifyinja fibili, popapo Poriki Festi alinkupyamlapo pa Feliki. Umwene Feliki bo ikuti mbakyele abaYuda, popapo alinkundeka Pauli munnyololo.

Currently Selected:

IMBOMBO SYA BATUMIGWA 24: NNBII

Highlight

Compare

Copy