IMBOMBO SYA BATUMIGWA 23

1Popapo Pauli alinkubalulalila aba ndukomano, alinkuyoba alinkuti, “Mwe bamyitu, ndi gwa nyibonelo inunu itolo nkyeni mwa Kyala ukufika kulilino kuno.” 2Umwene loli umputi unkulumba Anania alinkubalagila aba balyimile pabupipi nagwe, ukuti bankome kukanwa. Popapo Pauli alinkumbula alinkuti, 3#Mat 23.27-28“Kyala isakukukoma gwe uliti imato lya mpanya ugwe; gwe utugele pakundonga une ukufwana nindagilo, kangi kukilania indagilo bo kulagila ukuti ngomigwege?” 4Abene aba balyimile papo balinkuyoba balinkuti, “Gwe gwati untukege umputi unkulumba gwa Kyala?” 5#Kuso 22.28Umwene Pauli alinkwamula alinkuti, “Mwe bamyitu, ngalimmenye ukuti mputi nkulumba; buno lisimbigwe ili likuti, ‘Unganjobaga ububibi undagili gwa ba kikolo kyako.’ ”

6 # Imbo 26.5; Filip 3.5 Lelo bo Pauli asyagenie ukuti ikiyabo kimo kyali kya baSadukai, ikingi kyali kya baFarisai, alinkukolela ndukomano alinkuti, “Mwe bamyitu, une ndi mFarisai, ndi mwana gwa baFarisai; nikulongigwa panongwa ya lusubilo lwa kusyuka kwa bafwe.” 7Lelo bo ayobile lilili, popapo lulinkutupuka ulukani nkati mbaFarisai nabaSadukai, lope nulukomano lulinkutapukana. 8#Mat 22.23; Mar 12.18; Luk 20.27Namanga abaSadukai bikuti kukayako ukusyuka, bope nabandumi bakayako, yope na Mbepo akayako; loli abaFarisai bo bikusitika syosa. 9Popapo gulinkuyapo unjwego gu mwingi. Balinkusumuka abamanyandagilo bamo aba kulubafu lwa baFarisai, balinkukanika balinkuti, “Uswe tukayagamo yimo inongwa mmundu uyu; apene lelo linga Mbepo ayobile nagwe pamo ugwandumi, po fiki?” 10Lelo ulukani bo lukindilile, unkulumba gwa basikali alinkutila ukuti bangisakunnyafulaniaga Pauli; popapo alinkubalagila abasikali ukuti basulukege bansosyepo kumaka pakati pamyabo, nukuntwala mwilinga.

11Lelo ikilo kikyo uNtwa alinkunsetukila Pauli, alinkumbula alinkuti, “Kibaga itolo, buno bo papo unsisimikisye une nkaya ka Yerusalemu, bo fikuti ukasisimikisyege bunobuno mope na nkaya ka Roma.”

AbaYuda bikwitikana ukungoga Pauli

12Lelo bo bukile, abaYuda bamo balinkwitikana, balinkufinga ukuti batikulyaga nukunwa ukufika papo bikungogaga Pauli. 13Abene aba bafingile, bakindile pa malongo mana (40) ubwingi. 14Bo balinkubuka kubaputi abakulumba na kubakulumba mbaYuda balinkuti, “Tufingile ulufingo ulukulumba, ukuti tutikulyaga ifyakulya ukufika papo tukungogaga Pauli. 15Lilino lelo, umwe pamopene nulukomano losa, mumbule unkulumba gwa basikali ukuti asulukege nagwe Pauli kumyinu, mufwanege mukulonda ukusyagania bununu inongwa syake; loli uswe twitendekisye ukungoga, bo akali nukusegelela.”

16Loli undumyana umwana gwa ilumbu gwa Pauli, bo apilike isya kuntegelela kwabo, alinkubuka nukwakwingila mwilinga, alinkumpangila Pauli. 17Popapo Pauli alinkumbilikila sarjenti yumo, alinkumbula alinkuti, “Buka kambike undumyana uyu kunkulumba gwa basikali, papo ali nasyo simo isya kumbula.” 18Umwene alinkumwega, alinkubuka nagwe kunkulumba gwa basikali, alinkwakumbula ukuti, “Umpinyigwa yula Pauli, ambilikile nukusuma ukuti nuntwale undumyana uyu kumyako, papo ali nasyo isi ikulonda ukukubula.” 19Popapo unkulumba gwa basikali alinkunkola ikiboko, alinkwepukapo, nukwakwiyekela nagwe, alinkundalusya alinkuti, “Syo siliku isi uli nasyo isya kumbula?” 20Umwene alinkuti, “AbaYuda bitikene ukukusuma kilabo, ukuti usulukege na Pauli kulukomano, ko kuti bafwanege bikulonda ukundalusya bununu inongwa syake. 21Loli ugwe ungabapilikaga; namanga abandu aba bakindile na pamalongo mana (40) bansigile, bafingile ukuti batikulyaga kangi batikunwaga, ukufika papo bikungogaga; lilino lelo bitendekisye bikugulila ukuti ubitikisye.” 22Popapo unkulumba gwa basikali alinkundekesya undumyana ukuti abukege, alinkumbula alinkuti, “Ungayakumbulaga yumo umundu ukuti umbulile sisisi.”

Pauli ikutumigwa kwa Feliki undindililakisu

23Popapo unkulumba gwa basikali alinkubabilikila basarjenti bake babili, alinkubabula alinkuti, “Amubasalege abasikali bamia babili (200) babukege nkaya ka Kaisaria, naba pafalasi amalongo mahano na mabili (70), kangi nabakolelangwego bamia babili (200); basumukege pakabalilo ka butatu pakilo. 24Syope nifalasi syakunkwesyapo Pauli musisalile nganila; ukuti mukamfikisyege bununu itolo kwa Feliki undindililakisu.” 25Popapo alinkusimba kalata uyu ikuti,

26“Klaudia Lisia, kuli gwe ndindililakisu, gwe mwimikigwa Feliki, nikukuponia. 27Umundu uyu akoligwe nabaYuda, balondaga ukungoga; popapo ndinkubuka nikilundilo kya basikali ndinkumpoka, bo nsyagenie ukuti muRoma. 28Lelo bo nikulonda ukusyagania isi bandongaga, popapo ndinkusuluka nagwe kulukomano lwabo; 29mo ndinkwaga bikundonga isya lukani lwa ndagilo syabo, loli yikalipo yimo inongwa iya kumpelela ukugogigwa pamo ukupinyigwa. 30Lelo bo mbufigwe ukuti bikulonda ukunsigila umundu uyu, nakalinga itolo nuntumile kumyako, bope naba nongwa yake, mbalagile ukuti bise bayobege nkyeni mmyako inongwa iyi bikundonga.”

31Abene lelo abasikali balinkumwega Pauli bo mumo balagiligwe, balinkwenda nagwe pakilo, balinkwakufika nagwe nkaya ka Antipatri. 32Nulubunju balinkubalekela aba pafalasi ukubuka nagwe; abene balinkugomoka ukubuka mwilinga lyabo. 33Abene bala bo bafikile nkaya ka Kaisaria, bo bampele kalata undindililakisu, balinkumbika Pauli mmaboko gake. 34Umwene bo abalile, popapo alinkulalusya ikisu kuno Pauli afumile; lelo bo abuligwe ukuti gwa nkisu kya Kilikia, popapo alinkuti, 35“Nikukupilikisyaga bo aba nongwa yako bisile.” Popapo alinkulagila ukuti alindililigwege munyumba ya bulindililakisu iya Herodi.

Currently Selected:

IMBOMBO SYA BATUMIGWA 23: NNBII

Highlight

Compare

Copy