IMBOMBO SYA BATUMIGWA 22

1“Mwe bamyitu na mwe batata, amumbilikisyege isi nikwilongela lilino nkyeni mmyinu.” 2Abene bo bagile ukuti ikuyobela munjobelo ya kiHiburi, balinkongelapo ukuya mye. 3#Imbo 5.34-39Popapo Pauli alinkuti, “Une ndi nJuda, napapigwe nkaya ka Tarisi nkisu kya mu Kilikia; nakulile nkaya kakaka mmalundi ga Gamalieli, namanyisigwe fiyo mundagilo sya batata; nabikilepo fiyo umoyo pambombo ya Kyala, bo muno mukubombela nanumwe lilino. 4#Imbo 8.3; 26.9-11Ndinkubafwima aba bendaga injila yiyiyi, kope nukubagoga ndinkubagoga; ndinkubapinya abanyambala nabakikulu, ndinkubabika munyumba ya bannyololo, 5umputi abagile ukusisimikisya kangi nulukomano losa; bo aba balimbele bakalata aba kwakubegela abaYuda abamyabo nkaya ka Damaska, ukuti ngabapinyege bosa aba bali mumo, nukubatwala nkaya ka Yerusalemu kokuti mo bakafundigwege.

Pauli ikuyoba isya lupinduko lwake

(Imbo 9.1-19; 26.12-18)

6“Lelo bo nikwenda, nsegelile nkaya ka Damaska, bo ilisuba liliti lili pantu, nakalinga itolo ndinkwaga ulumuli ulukulumba lukufuma kumwanya, lulinkumulika ukusyungutila apa nalipo. 7Popapo ndinkugwa pasi, ndinkupilika ilisyu likuyoba nanine Ukuti, ‘Gwe Sauli, gwe Sauli, kufwima fiki une?’ 8Popapo ndinkwamula ndinkuti, ‘Gwe ani, gwe Ntwa?’ Umwene alinkumbula alinkuti, ‘Yo une Yesu gwa nkaya ka Nazareti ne kufwima.’ 9Abene aba nali nabo balinkulubona ulumuli, loli ilisyu lya uyu ayobaga nanine, lyo balinkusita nukupilika. 10Popapo ndinkundalusya ndinkuti, ‘Mbombe fiki lelo gwe Ntwa?’ Umwene uNtwa alinkumbula alinkuti, ‘Sumukaga ubukege nkaya ka Damaska, mo kwakubuligwaga syosa isi silagiligwe ukuti syo usibombege.’ 11Lelo bo ngwaga ndikuketa panongwa ya busisya bwa lumuli lula, popapo aba nali nabo balinkungola ikiboko ndinkwakufika nkaya ka Damaska.

12“Lelo, nkaya mumo alimo umundu yumo uyu ali yo Anania, umundu uyu antilaga Kyala, kangi asikongaga indagilo, uyu nabaYuda bosa aba bali mumo banjobaga ubununu, 13yo alinkwisa kumyangu, alinkwima pabupipi nanine, alinkumbula, alinkuti, ‘Gwamyitu Sauli, ketaga kangi!’ Popapo pakabalilo kako itolo ndinkuketa kangi, ndinkumbona. 14Popapo umwene alinkumbula alinkuti, ‘Kyala gwa batata, akusalile ukuti ubumanye ubwigane bwake, nukumbona uNgolofu, kangi nukulipilika ilisyu ili Ukufuma nkanwa mmyake; 15namanga kwisakuyaga nketi gwake kubandu bosa, muli isi usibwene, nisi usipilike. 16Lilino lelo, kukabila fiki? Sumukaga gosigwege, usukigwege inongwa syako, bo kuyiyoba ingamu yake.’

Pauli ikubilikiligwa ukwakulumbilila mbapanja

17“Lelo bo mbyanilemo kangi nkaya ka Yerusalemu, bo nikwiputa Nnyumba ya Kyala, popapo ndinkukomwa, 18ndinkumbona umwene ikuyoba nanine ikuti, ‘Endelelaga usokemo mbibimbibi nkaya ka Yerusalemu, buno batisakusyambililaga isi kusisimikisya une.’ 19Popapo ndinkuti, ‘Gwe Ntwa, buno abene bamenye ukuti nnyumba syakwiputilamo syosa nabigalilaga nnyumba ya bannyololo, nukubakoma bosa aba bakwitikaga ugwe. 20#Imbo 7.58Pope na pala lyonekaga ililopa lya Stefani unketi gwako, na yuyune nalyimile papo ndinkuti bayile, ndinkulindilila imyenda gya babo bangogaga Stefani.’ 21Popapo umwene alinkumbula alinkuti, ‘Bukaga, namanga nikukutumaga kubutali kubapanja.’” 22Abene balinkumpilikisya Pauli ukwisakufika pisyu lilili, popapo balinkwinula amasyu gabo balinkuti, “Nsosyepo umundu yuyuyu pakisu apa; namanga kukambagila ukuti ayengeko kubumi.” 23Lelo bo bikuywega, bikutaga imyenda gyabo nukusopa ulufumbi kumwanya, 24popapo unkulumba gwa basikali alinkulagila ukuti bamwingisyege mwilinga, kangi alinkuti bandalusye bo bankomile nifikoti, ukuti basyage isi banjwegelelaga bunobuno. 25Abene lelo bo bampinyile ukuti bankomege nifikoti, popapo Pauli alinkundalusya sarjenti uyu alyimile papo alinkuti, “Kali sitikisigwe umwe ukunkoma umundu muRoma bo akalongigwa?” 26Umwene sarjenti bo apilike lilili, alinkubuka kunkulumba gwa basikali, alinkumbula alinkuti, “Kuya pakubomba sya fiki? Buno umundu uyu muRoma?” 27Popapo unkulumba gwa basikali alinkwisa, alinkundalusya Pauli alinkuti, Umbule, bule uli muRoma? Umwene alinkuti, “Ena!” 28Popapo unkulumba gwa basikali alinkwamula alinkuti, “Une mbukabile ubuRoma nindalama nyingi fiyo;” umwene Pauli alinkuti, “Na ku kupapigwa une ndi muRoma itolo.” 29Abene aba balondaga ukundalusya balinkwepukapo nakalinga itolo, yope nunkulumba gwa basikali alinkutetema bo asyagenie ukuti muRoma, kangi panongwa ya kuti alimpinyile.

Pauli ali nkyeni ndukomano

30Lelo ulwa kilabo, bo unkulumba gwa basikali ikulonda ukuyagania bununu inongwa iyi yabapelile abaYuda ukuti bandongege, popapo alinkumwabula, Pauli alinkulagila ukuti abaputi abakulumba pamopene naba lukomano bosa babungane; popapo alinkusuluka nagwe Pauli, alinkumbika nkyeni mmyabo.

Currently Selected:

IMBOMBO SYA BATUMIGWA 22: NNBII

Highlight

Compare

Copy