IMBOMBO SYA BATUMIGWA 21

Pauli ikubuka ku Yerusalemu

1Lelo bo tulagene nabo, popapo tulinkwipaka mungalaba, tulinkugoloka itolo ukubuka pa kiloboko kya Ko; ulwa kilabo tulinkufika ndusungo lwa Rodo, ukufuma mumo tulinkwakufika nkaya ka Patara. 2Mo tulinkuyaga ingalaba iyi yabukaga nkisu kya Fenike; tulinkwipaka tulinkubuka. 3Lelo bo lubonike ulusungo lwa Saiprasi, popapo tulinkululekela kukimama, tulinkubuka nkisu kya Siria, tulinkufika nkaya ka Tiri; namanga mo ingalaba yasulusyaga ifitwalo. 4Lelo bo tubalondile abitiki tubagile, tulinkugonamo mumo amasiku mahano na mabili; abene balinkumbulila Pauli mwa Mbepo ukuti angafyukaga ukubuka mu Yerusalemu. 5Lelo bo gamalike amasiku gitu, popapo tulinkusumuka, tulinkubuka; abene bosa pamopene nabakasi babo nabanabo, balinkutusindikila ukusoka nkaya, popapo tulinkufugama pasi pambali panyanja tulinkwiputa. 6Popapo tulinkulagana nabo, uswe tulinkwipaka mungalaba, abene balinkugomoka ukubuka kumyabo.

7Tulinkwendelela ninjila yitu ukufuma nkaya ka Tiri, tulinkwakufika nkaya ka Putolomai; tulinkubaponia abitiki, tulinkugona nabo ilisiku limo. 8#Imbo 6.5; 8.5Ulwa kilabo tulinkusumuka, tulinkwakufika nkaya ka Kaisaria, tulinkwakwingila nnyumba ya Filipu undumbilili gwa Nongwa Inunu yula, uyu ali yo yumo muli bala bahano na babili; popapo tulinkugona mmyake. 9Yo ali nabana abalindwana bana abasitakwegigwa, aba basololaga. 10#Imbo 11.28Lelo bo tugonilepo amasiku gamo papo, popapo alinkusuluka unsololi yumo ukufuma nkisu kya Yudai, uyu ali yo Agabu ingamu. 11Bo isile apa twalipo, popapo alinkwega umpango gwa Pauli, alinkwipinya amalundi gake namaboko, alinkuyoba alinkuti, “Bo ikuya buno buno Mbepo Mwikemo, ikuti, Umwenempango gugugu bo bisakumpinyaga bunobuno abaYuda ba nkaya ka Yerusalemu, nukumbika mmaboko ga bapanja.” 12Lelo bo tupilike sisisi, uswe nabandu ba mumo tulinkunsuma Pauli ukuti angafyukaga ukubuka mu Yerusalemu. 13Umwene Pauli alinkwamula alinkuti, “Mukubomba sya fiki apa mukulila nukungonyola indumbula yangu? Mungatigi niyalile ku kupinyigwa kwene nkaya ka Yerusalemu, mma, loli na ku kufwila mula panongwa ya ngamu ya Ntwa Yesu.” 14Lelo bo tutoligwe ukuntengulila, popapo tulinkundeka tulinkuti, “Ubwigane bwa Ntwa bo bubombigwege.”

Pauli alinkaya ka Yerusalemu

15Lelo bo gakindile amasiku gagaga, popapo tulinkwitendekesya, tulinkufyuka ukubuka nkaya ka Yerusalemu. 16Tulinkubuka nabo bope bamo abitiki ba nkaya ka Kaisaria, pamopene na Munasoni ugwa nkisu kya Saiprasi, umwitiki untasi uyu twabukaga kukugona kumyake.

Pauli ikubuka kukwangala na Yakobu

17Lelo bo tufikile nkaya ka Yerusalemu, popapo abitiki balinkutwambilila nulusekelo ulukulumba. 18Ulwa kilabo, Pauli pamopene nanuswe tulinkubuka kwa Yakobu; bosa nabakulu ba kipanga balinkuyapo. 19Lelo bo abaponisye, popapo alinkubapangila syosa muno syayilile yimoyimo, isi Kyala apelile mbapanja mbubombeli bwake. 20Abene bo bapilike, balinkuntufya Kyala. Popapo balinkumbula Pauli balinkuti, “Keta gwamyitu, usimenye muno bayilile abaYuda baelifu ba bingi aba bitike; bosa itolo babikilepo fiyo umoyo pa ndagilo. 21Babuligwe ukuti kubamanyisya abaYuda bosa aba bali mbapanja ukusileka indagilo sya Mose, ukuti bangababutangako abanabo, kangi bangasikongaga inyiho syabo. 22Kali tutigi fiki? Bosa bikuya pakupilika ukuti gwisile. 23#Kuba 6.13-21Lilino lelo ubombege isi tukukubulaga; tuli nabo abandu bana aba bafingile ulufingo, 24bo ubegege bababa ukayege nabo pa bunyago bwa kwiyelusya, ubahombelege yuyugwe ukuti bamwege inywili ku mitu gyabo; po bosa bisakumanyaga ukuti inongwa syako syosa isi babuligwaga syali sya itolo; loli bisebakwage nanugwe ukuti kwenda mundagilo nukuti kusikonga. 25#Imbo 15.29Isyene loli isya bapanja aba bitike syo tubasimbile isi tutumwile isyakuti bepukeko kuli ifi bikemekisye kufifwani, na kwilopa, na kuli ifi fipitigwe itolo, kangi na kubulogwe.”

26Popapo Pauli alinkubega abanyambala bala, ilya kilabo alinkwakubomba isya bunyago bwa kwiyelusya palikimo nabo, alinkwingila Nnyumba ya Kyala, alinkufumusya muno gayaga pakumalikila amasiku ga kwelusigwa; ukufika papo bisakutwalaga ilikemo lya yumoyumo.

Pauli ikukoligwa Nnyumba ya Kyala

27Lelo bo gikuya pakumalika amasiku mahano na mabili gala, popapo abaYuda aba bafumile nkisu kya Asia, bo bambwene Pauli Nnyumba ya Kyala, balinkukisambulania ifilundilo kyosa, bulinkunkola, 28balinkuywega balinkuti, “Mwe banyaIsraeli, isaga mututule; umundu uyu yo uyu ikumanyisya mosa itolo isi sikindene nikikolo kyitu, nindagilo sya Mose, kangi niNyumba ya Kyala iyi; pamwanya pali sisisi, abingisye abaGriki Nnyumba ya Kyala, abunyasisye ubuyo ubwikemo ubu.” 29#Imbo 20.4Namanga balimbwene Trofimo ugwa nkaya ka Efesi bo ikwenda nagwe nkaya, balinkwinogona ukuti kingamo Pauli alintwele Nnyumba ya Kyala. 30Popapo akaya kosa kalinkusambuka, abandu balinkubungana mbibimbibi, balinkunkola Pauli, balinkunkwaba nukunsosyamo Nnyumba ya Kyala; nakalinga itolo ififigo filinkwigaligwa. 31Lelo bo bikuti tungoge, popapo indumi yilinkumwaga unkulumba gwa basikali, ukuti akaya kosa ka Yerusalemu kafulunganike. 32Nakalinga itolo alinkubega abasikali nabasarijenti bake, alinkubopa ukusuluka apa balipo; abene lelo bo bambwene unkulumba gwa basikali nabasikali bake, balinkuleka ukunkoma Pauli. 33Popapo unkulumba gwa basikali alinkusegelela alinkunkola Pauli, alinkulagila ukuti apinyigwege niminyololo mibili; alinkulalusya alinkuti, “Kali ywani yuyuyu, kangi abombile sya fiki?” 34Popapo bamo nkilundilo kila balinkuywega isingi, abangi isingi. Umwene lelo bo atoligwe ukusyagania bununu isya naloli panongwa ya njwego, alinkulagila ukuti bantwalege Pauli mwilinga. 35Lelo bo Pauli afikile pantandalilo gwa pakifigo, popapo alinkupimbigwa itolo nabasikali panongwa ya bukali bwa kilundilo; 36namanga ikilundilo kya bandu kyakongaga munyuma kilinkuywega kilinkuti, “Amungoge umundu uyu!”

Pauli ikwinokesya

37Lelo bo bikuya pakumwingisya mwilinga, popapo Pauli alinkuyoba nunkulumba gwa basikali alinkuti, “Natigi njobe nanugwe.” Umwene alinkuti, “O, umenye ukuyoba ikiGriki? 38Ngimba ukaya gwe gwa nkisu kya Egiputi, uyu mbupipi itolo abasambuleme abandu abagogi baelifu bana (4,000), alinkubuka nabo ndukubo?” 39Umwene Pauli alinkwamula alinkuti, “Une ndi nJuda gwa nkaya ka Tarisi nkisu kya Kilikia; ndi mwenekaya gwa kaya akafumuke. Nikukusuma ukuti njobe nabo abandu aba.” 40Lelo bo amwitikisye, popapo Pauli alinkwima pantandalilo gwa pakifigo, alinkubabatamisya abandu nikiboko; bo kuli mye itolo, popapo alinkuyoba nabo munjobelo ya kiHiburi alinkuti,

Currently Selected:

IMBOMBO SYA BATUMIGWA 21: NNBII

Highlight

Compare

Copy