IMBOMBO SYA BATUMIGWA 20
20
Pauli ikubuka nkisu kya Makedonia nikya Akaya
1Lelo bo unjwego gumalike, popapo Pauli alinkubabilikila abitiki, alinkubakasya nukulagana nabo, popapo alinkusumuka ukubuka nkisu kya Makedonia. 2Alinkukisania mfisu fyosa, alinkubakasya namasyu ga mingi, alinkwakufika nkisu kya Akaya; 3mo alinkugona imyesi mitatu. Lelo bo ikuti nipake mungalaba ukubuka nkisu kya Siria, abaYuda balinkwitikana ukuntegelela; umwene alinkwinogona ukugomokela iya nkisu kya Makedonia. 4Abene aba bali nagwe bali bo ba Sopateri ugwa nkaya ka Berea unnya Piri, naba Aristarki na Sekundi aba nkisu kya Tesalonike, na Gayi ugwa nkaya ka Derbe, na Timoti; na Tikika na Trofimo aba nkisu kya Asia. 5Bo balinkulongola nkyeni, balinkwakutugulila nkaya ka Troa. 6Loli uswe tulinkwipaka mungalaba ukufuma nkaya ka Filipi, bo gakindile amasiku ga Kisyesye Ikisita Nkese; tulinkwakubaga nkaya ka Troa bo gakindile amasiku mahano, mo tulinkugonamo amasiku mahano na mabili.
Yutika
7Pisiku ilitasi ilya ndungu, bo tubungene pakulilanila ikisyesye, popapo Pauli uyu atigi nikulabilaga kilabo, alinkuyoba nabo, alinkukabisya fiyo ukuyoba ukufika pakilo pakati. 8Lelo nnyumba ya kwiyulu muno twakomene, mo syalimo inyale si nyingi. 9Undumyana yumo uyu ali yo Yutika ingamu, atugele pibwindo. Popapo tulinkunkola utulo utusito bo Pauli ikwendelela ukuyoba, lelo bo atoligwe nutulo, popapo alinkutunyuka ukufuma kwiyulu lya butatu; balinkumwinula umfwe itolo. 10Popapo Pauli alinkwika, alinkunkupamila alinkumfugatila, alinkuti, “Mungapasyaga, akali ali nubumi.” 11Lelo bo afyukile kangi, alinkumenya ikisyesye, alinkulya. Umwene alinkubabula si nyingi inongwa, alinkufika nabo kubukye, popapo alinkusumuka alinkubuka. 12Popapo balinkuntwala undumyana yula umumi itolo; balinkuhoboka fiyo.
Ukufuma nkaya ka Troa alinkulabila nkaya ka Mileti
13Popapo tulinkutalapo ukubuka kungalaba, tulinkwipaka ukubuka nkaya ka Aso, mo twatigi tukwakumpakilaga Pauli, namanga mo mumo alagilile, papo umwene alondaga ukwenda iya pisilya. 14Lelo bo aganile nanuswe nkaya ka Aso, tulinkumpakila, tulinkwakufika nkaya ka Mitilene. 15Popapo tulinkusumuka papo, ulwa kilabo tulinkuningana nikiloboko kya Kio; ilya kilabo ikingi tulinkufika ndusungo lwa Samu, pisiku ikongesi tulinkwakufika nkaya ka Mileti. 16Namanga Pauli alinogwine ukukinda itolo nkaya ka Efesi, papo akaliganile ukukabila nkisu kya Asia; akuyaga ukuti linga sibagile, akayege nkaya ka Yerusalemu pisiku lya Pentekosti.
Pauli ikulagana nabakulu ba kipanga nkaya ka Efesi
17Ukufuma nkaya ka Mileti, Pauli alinkutuma indumi nkaya ka Efesi iya kubabilikila abakulu ba kipanga. 18Lelo bo bisile kumyake, popapo alinkubabula alinkuti, “Umwe musimenye muno nayilile nanumwe akabalilo kosa, ukufuma pisiku lya kwanda lila mfikilege nkisu kya Asia; 19nambombelaga uNtwa nulwiyisyo losa, namasosi, ningelo isi syalinyagile bo bikundegelela abaYuda; 20ndinkusita nukwepukapo pakubafumukisya isi syali sya kubatula, ndinkubamanyisya pabwelu itolo, mope na nnyumba syinu; 21ndinkusisimikisya kubaYuda na kubaGriki isya kupindukila kwa Kyala, nisya kumwitika uNtwa gwitu Yesu Kristi. 22Pakulongosigwa na Mbepo Mwikemo, lilino, nikubuka ku Yerusalemu ne mpinyigwa itolo mumbepo; ngasimanya nisi sikwakunyisilaga mumo; 23loli syene si sya kuti Mbepo Mwikemo ikusisimikisya kumyangu ntwaya tosa, ukuti iminyololo nubutolwe fikungulila une. 24#2 Tim 4.7Loli ndikububikilako umoyo ubumi bwangu, ukuti kandu ka ntengo, kwene ku kumalisya injila yangu, nububombeli ubu nalyambilile kuNtwa Yesu, ukusisimikisya Inongwa Inunu sya ipyana lya Kyala.
25“Keta, lilino menye ukuti mwesa mwe nendilemo mmyinu bo ngufumusya isya butwa, mutisakwandisyamo ukumbona mmaso. 26Fyobene nikusisimikisya kumyinu gu musyugu, ukuti ndi mwelu itolo kwilopa lya bosa. 27Buno ngalyepwikepo pakubafumukisya syosa isi Kyala alinogwine. 28Mwandege lelo, mwiketege bununu, kangi muguketege nuntimo gosa ugu Mbepo Mwikemo ababikile ukuya mwe balindilili, ba kukutima ikipanga kya Kyala, iki akikabile nilopa lyake yuyo. 29Une menye ukuti bo mbukile, imbumbi ingali sisakubisilaga, syo sitisakugupakisyaga untimo. 30Mope na mu mmyinu yuyumwe bisakutupukaga abandu aba bikuyoba iniongafu bisakubakwabaga abitiki ukuti babakongege babo. 31Ko kuno nikuti amuyege maso, bo mukukumbuka ukuti kufyinja fitatu, pamusi na pakilo, ngalekilemo siku ukubamanyisya mwesa namasosi. 32Lilino lelo nikubabika mmaboko ga Kyala, na mwisyu lya ipyana lyake, ili libagile ukubayenga nukubapa Mingo mbikemo bosa. 33Nganyonywamo siku indalama sya yumo, isya siliva pamo isya golide, nalinga myenda gya yumo. 34Umwe mumenye ukuti ifi nalondaga une, naba nali nabo, gakabaga ga maboko gangu gagaga. 35Syosa sisisi mbanangisye ukuti, fikuti bo mwiyulege bunobuno ukubatula abonywa, bo mukukumbuka amasyu ga Ntwa Yesu, apa atigi, ‘Nukupa nukwambilila, kusayigwa ku kupa.’ ”
36Lelo bo ayobile sisisi, popapo alinkufugama pasi pamopene nabo bosa, alinkwiputa. 37Popapo bosa itolo balinkulila Syo, balinkungwilila Pauli mmakosi, nukumfipa balinkulagana nagwe. 38Balinkukindilila ukusulumania panongwa ya isyu ili ayobaga atigi, batisakwandisyamo ukumbona mmaso. Popapo balinkwakunsindikila ku ngalaba.
Currently Selected:
IMBOMBO SYA BATUMIGWA 20: NNBII
Highlight
Share
Compare
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
