IMBOMBO SYA BATUMIGWA 19

Pauli ali nkaya ka Efesi

1Lelo bo Apolo ali nkaya ka Korinti, popapo Pauli alinkukisania nkisu kya kululu, alinkwakufika nkisu kya Efesi; mo alinkubaga bamo abafundigwa, 2alinkubalalusya alinkuti, “Kali mwalyambilile Mbepo Mwikemo pala mwitikege?” Abene balinkuti, “Mma, kope nukupilika tukapilikamo ukuti aliko Mbepo Mwikemo.”

3Kangi alinkubalalusya alinkuti, “Po mwalyokesigwe mfiki lelo?” Abene balinkumwamula balinkuti, “Ndosyo lwa Yohani.”

4 # Mat 3.11; Mar 1.4,7-8; Luk 3.4,16; Yoh 1.26-27 Umwene Pauli alinkuti, “Yohani yo osyaga ulosyo lwa lupinduko, alinkubabula abandu ukuti bamwitikege uyu ikwisa munyuma mmyake, yu Yesu.”

5Lelo bo bapilike sisisi, popapo balinkokesigwa mungamu ya Ntwa Yesu. 6Umwene Pauli bo ababikilepo amaboko, popapo Mbepo Mwikemo alinkubasololokela, balinkwanda ukuyobela mundimi imbya, balinkusolola. 7Bosa pamopene baliti bali abanyambala kalongo na babili.

8Popapo Pauli alinkwakwingila nnyumba yakwiputilamo, alinkuyoba nubukifu imyesi mitatu, alinkukanikana nabandu nukubatobesya isya butwa bwa Kyala. 9Bamo loli balinkuya bakafu indumbula, balinkusita nukwitika, balinkuyiyoba ububibi injila iyi nkyeni nkilundilo. Popapo Pauli alinkusokapo alinkubaleka, alinkubapagula aba bakitikaga, bwila alinkumanyisya nnyumba yakumanyikisyamo iya Tirani. 10Alinkubomba bunobuno ifyinja fibili. Po apa bosa aba bali nkisu kya Asia abaYuda nabaGriki balinkulipilika ilisyu lya Ntwa.

Abana ba Sikeva

11Umwene Kyala alinkupelela ifika ifipala mmaboko ga Pauli; 12po apa bope ababine aba babikigwangapo utwenda nutusepe utu twafumaga mumbili gwake, balinkupona imbungo syabo, syope nimbepo inyali silinkusokamo mmyabo. 13Loli bamo abaYuda abembesi abasosyambepo inyali, balinkugela ukuyiyoba ingamu ya Ntwa Yesu kuli aba bali nimbepo inyali, balinkuti, “Nikubalagila mwa Yesu uyu Pauli ikumfumusya.” 14Abene aba babombaga sisisi, bali bana ba Sikeva, umputi unkulumba gwa baYuda, bali bahano na babili. 15Popapo imbepo inyali yilinkubamula yilinkubabula yilinkuti, “Yesu yo nummenye naloli, yope na Pauli numwagenie; loli umwe mwe bani?” 16Lelo popapo umundu uyu ali nimbepo inyali alinkubanyelela, alinkubatola nukubafunda bosa, balinkubopa kisitakufwala nakamo ukusoka nnyumba yila bo bafulele. 17Syo silinkufumuka kubaYuda nabaGriki bosa aba bali nkaya ka Efesi; bosa lulinkubaga ulutende lu lwingi; iyene ingamu ya Ntwa Yesu yilinkwimikigwa. 18Popapo bingi aba balitike balinkwisa, balinkwilata nukusiyoba syosa isi babombile. 19Abangi ba bingi aba babombaga isya manjele, balinkugabungania amabuku gabo, balinkugakosya mmoto bo abandu bosa bikuketa; lelo bo bikubala untengo gwa, kyuma kyabo balinkwaga gufikile pandalama sya siliva baelifu amalongo mahano (50,000). 20Bo lilinkuya bunobuno ilisyu lya Ntwa, lilinkukula nukukaba amaka.

Unjwego nkaya ka Efesi

21Lelo bo simalike sisisi, popapo Pauli alinkwinogonela mwa Mbepo ukuti ikwendaga iya nkaya ka Makedonia na ka Akaya ukubuka mu Yerusalemu; alinkuti, “Bo ngonilemo mumo, po fikuti ngafikemo na nkaya ka Roma.” 22Lelo bo abatumile nkaya ka Makedonia ababombi bake babili, Timoti na Erasti, alinkugonamo panandi nkisu kya Asia.

23Lelo pakabalilo kako, po gulinkuboneka unjwego panongwa ya njila yiyiyi; 24namanga umundu yumo umposi gwa siliva, uyu ali yo Demetrio ingamu, uyu apondaga utufwani twa siliva utwa nyumba ya kyala Artemi, abatwalilaga ubukabi bu bwingi abafundi bake, 25alinkubabungania bababa pamopene nabangi bosa aba mbombo yiyiyi, alinkubabula alinkuti, “Mwe binangu, nanumwe mumenye ukuti ubukabi bwitu bukufuma mumbombo yitu iyi, 26kangi musibwene nukupilika ukuti, mukaya mo nkaya ka Efesi mwene, loli nkisu kyosa kya Asia, umundu uyu Pauli abasongile nukubapindula abandu ba bingi ikuti bakaya bo bakyala aba bikutendekesigwa namaboko ga bandu. 27Mungatigi ubupalapala bububu ubwa kusyokeligwa imbombo yitu buli ku kumyitu kwene, mma, loli buliko na ku ku nyumba iya kyala gwitu unkikulu unkulumba Artemi, buno isakwipela gwa itolo, yope isakwisigwa ubukulumba bwake, uyu bosa aba nkisu kya Asia na nkisu kyosa bikwiputa kumyake.”

28Lelo bo abandu bapilike sisisi, popapo balinkukalala fiyo, balinkuywega balinkuti, “Nkulumba yu Artemi gwa nkaya ka Efesi!” 29Popapo akaya kosa kalinkwisula nunjwego, balinkwaluka pamopene, balinkubuka kunyumba ya tusumo, balinkubakola ba Gayi na Aristarki aba nkisu kya Makedonia, aba bendaga na Pauli. 30Umwene Pauli bo ikuti mbuke nkilundilo, abafundigwa bake balinkusita nukumwitikisya. 31Bope nabakulumba bamo aba nkisu kya Asia aba bamanyene nagwe, balinkuntumila indumi nukunsuma ukuti angasulwa ukwitupika nnyumba ya tusumo. 32Loli bamo balinkuywega isingi, bope abangi isingi; namanga ulukomano lula lwafulunganike, ba bingi balinkusita nukusimanya isi babunganile. 33Popapo balinkusumusya Aliksandara ukufuma nkilundilo, uyu abaYuda balimbikile nkyeni. Umwene Aliksandara alinkubabatamisya nikiboko bo ikuti nikanilege nkyeni mbandu bala. 34Loli bo basyagenie ukuti nJuda, popapo balinkuywega bosa pamopene ilisyu limolyene, balinkukolela utubalilo tubili balinkuti, “Nkulumba yu Artemi gwa nkaya ka Efesi!”

35Popapo unsimbi gwa kaya kako alinkukibatamisya ikilundilo, alinkuti, “Mwe bandu ba nkaya ka Efesi, ywani uyu akasyagania ukuti akaya ka Efesi ko aka kikuyilindilila inyumba ya kyala Artemi unkulumba, nikifwani iki kyatunywike ukufuma kumwanya? 36Buno sisisi syo nayumo atikusikana, po fikuti muyege yonjolo itolo, mungakuyaga ukubomba simo. 37Namanga mubatwele abandu aba, aba bakahiyamo ifya Nnyumba ya Kyala, kangi bakanhelulamo siku kyala gwitu unkikulu. 38Lelo linga Demetrio nabafundi aba balinongwa numundu yumo, pabulongelo palipo, nabalindililakaya balipo, po balitwalanaga aba nongwa. 39Loli linga muli nasyo isingi isi mukulonda, syo sisakulongigwaga ndukomano ulwimikigwa. 40Buno tuli mbupalapala bwa kulongigwa kunongwa ya kulundukana kwa musyugu; namanga sikayako simo isya kwinokesya panongwa ya njwego gugugu.”

41Lelo bo ayobile sisisi, popapo alinkulubalania ulukomano.

Currently Selected:

IMBOMBO SYA BATUMIGWA 19: NNBII

Highlight

Compare

Copy